Дипломатијата на Кубарси и плановите на Деко: Сè што треба да знаете за „случајот Бастони-Барса“

Како што се приближува летниот преоден рок, во Барса сè почесто одекнува името на Алесандро Бастони. Столбот на одбраната на Интер се наметна како примарна цел во дефанзивната реконструкција на Деко, иако во соблекувалната на „Блауграна“ сè уште владее воздржаност и верба во постоечкиот кадар.

Во интервју за време на репрезентативните обврски со Шпанија, Пау Кубарси не штедеше пофални зборови за играчот кој интензивно се поврзува со неговиот клуб. Младиот дефанзивец откри дека со Бастони одржуваат модерна професионална врска. „Се следиме на Инстаграм бидејќи сме го делеле теренот и сме колеги во истата професија“, истакна Кубарси.

Сепак, и покрај дигиталните симпатии и неоспорниот талент на италијанскиот репрезентативец, Кубарси брзо го префрли фокусот на своите сегашни соиграчи. „Сметам дека сме одлично покриени на стоперските позиции и нема смисла да дебатираме за играчи кои во моментов не се дел од нашиот тим“, дециден беше 19-годишниот фудбалер, демонстрирајќи лидерска зрелост и лојалност кон составот на Ханси Флик.

Додека Кубарси дипломатски ги смирува страстите, спортскиот директор Деко е далеку поактивен зад сцената. Португалецот во изминатите неколку месеци бил на стратешки патувања во Италија. Целта не беше само набљудување, туку детално испитување на теренот за евентуалниот трансфер на 26-годишниот дефанзивец.

Клубот го гледа Бастони како „совршен профил“: левоног стопер со извонреден преглед на играта, кој би го подигнал квалитетот на одбраната на едно повисоко ниво. Италијанецот е веќе свесен за конкретниот интерес од Барселона. Иако тој е среќен во Интер, предизвикот да биде новиот столб на одбраната на Камп Ноу е карта на која каталонските гиганти сериозно планираат да играат.

И покрај взаемното воодушевување, патот до официјализација на трансферот е исполнет со сериозни пречки. Првичните шпекулации за сума од 50 милиони евра беа брзо демантирани, Интер нема намера да се откаже од својот лидер за цена помала од 70 до 80 милиони евра.

За Барселона, целата операција зависи од целосното враќање на правилото 1:1 во финансискиот фер-плеј на Ла Лига. Иако управата е оптимистички расположена за летниот буџет, „Нероаѕурите“ не планираат да прават отстапки. Доколку се реализира, ова веројатно ќе биде најголемата сага на летниот трансфер пазар, спојувајќи го искуството на Бастони со генерацискиот талент на Кубарси.