Шпанскиот гигант Реал Мадрид го доведе првото засилување за следната сезона. Тригодишен договор со Реал потпиша поранешниот плејмејкер на Асвел, Тео Маледон.

Убедливо најдобриот првотимец на тимот од Вилвербан во неодамна завршената сезона во Евролигата, со тоа го официјализираше принципиелниот договор што го имаше со „кралскиот клуб“ веќе некое време.

Преминувањето во редовите на најтрофејниот европски клуб несомнено ќе биде чекор напред во кариерата на Маледон по статистички најдобрата сезона во Евролигата.

Според извештаите, вредноста на договорот на Маледон во Реал ќе биде шест милиони евра, што значи дека Французинот ќе инкасира два милиони по сезона.

Договорот меѓу двете страни вклучува и НБА клаузула на крајот од дебитантската сезона, па Реал ќе мора да го пушти Французинот, доколку тој добие понуда од најсилната лига во светот, каде што веќе играше за Филаделфија, Оклахома, Шарлот и Хјустон.

Кошаркарот на репрезентацијат на Шпанија и Реал Мадрид Серхио Љуљ нема да биде дел од Евробаскетот 2025.

37-годишниот шпански кошаркар го објави своето повлекување од националниот тим.

Љуљ има освоено сребро (2012) и бронза (2016) на Олимписките игри, злато на Светското првенство (2019), три титули на Евробаскет (2009, 2011, 2015) и една бронза (2013).

Во својата репрезентативна кариера овој кошаркар го носеше дресот на Шпанија на 173 натпревари и освои 7 медали.

НБА лигата ги избра најдобрите петорки за сезоната 2024/25. Четворица играчи добија максимален број на гласови од стручното жири за вклучување во идеалната петорка, меѓу нив и Никола Јокиќ, српскиот центар на Денвер Нагетс и кандидат за својата четврта титула за најкорисен играч.

Максималниот број гласови од жирито го доби и Шај Гилџис-Александер (Оклахома Сити Тандер), најдобриот стрелец на НБА лигата во тековната сезона (32.7 поени во просек) .

По 100 поени во гласањето добија и Јанис Антетокунмпо (Милвоки Бакс) и Џејсон Тејтум (Бостон Селтикс).

Сите четворица повеќепати биле избрани во најдобрите петорки на НБА лигата. За првпат е вклучен во неа и Донован Мичел (Кливленд Кавалирс).

Монако ќе му биде противник на Фенербахче во борбата за титулата во кошаркарската Евролига. Монако, во второто полуфинале на завшрниот турнир во Абу Даби, го победи Олимпијакос 78-68.

Олимпијакос тимот со најдобар резултат во регуларниот дел од сезоната, не успеа да стигне до финалето. Ниту еднаш во историјата на Евролигата, откако се игра во овој формат со завршен турнир, од 2016/2017 година, најдобриот тим од регуларниот дел не успеал да дојде до титулата.

Монако го надигра Олимпијакос и се пласира во првото финале во клупската историја. Во второто полувреме Монако одигра брилијантно, особено во вториот дел од третата четвртина, кога дојде до разлика од 13 поени.

Алфа Диало го предводеше Монако со 22 поени и шест скока, Мајк Џејмс имаше 17 поени и по седум скока и асистенции. Двоцифрени беа и Мамаду Жите со 11 поени и шест скока, односно Џером Блосингејм со 12 поени.

Кај Олимпијакос потфрлија сите, со исклучок на Еван Фурние. Францускиот репрезентативец постигна 31 поен. Двоцифренен беше уште само Најџел Вилијамс-Гос со 12 поени. Најдобриот играч на Олимпијакос Саша Везенков постигна скромни седум поени.

Финалниот натпревар ќе се одигра в недела од 19:00 часот.

Во пресрет на завршниот турнир во Евролигата, новинарот на „Спортандо“, Алесандро Маџи, објави дека следната сезона во елитното натпреваруање ќе учествуваат дваесет екипи.

Клучениот состанок на челниците на Евролигата се одржа во Абу Даби пред почетокот на Фајналфорот во кој учествуваат Панатинаикос, Фенербахче, Олимпијакос и Монако, а неговите заклучоци најавуваат значајни промени за следната сезона на најсилното клупско кошаркарско натпреварување во Европа.

Најголемата вест е дека сезоната 2025/26 ќе има дури 38 кола, во тој распоред се планирани 10 двојни рунди.

Уште поважна одлука се однесува на календарот на меѓународните натпреварувања, играчите од Евролигата нема да можат да настапуваат за националните тимови во квалификациите за Светското првенство во текот на сезоната.

Шпанија, Грција, Словенија и Естонија ќе бидат домаќини на 43-то Европско првенство во кошарка во 2029 година, објави Меѓународната кошаркарска федерација (ФИБА).

Групната фаза ќе се игра во Мадрид, Атина, Љубљана и Талин, додека финалето на Европското првенство ќе биде во главниот град на Шпанија.

Според шпанските медиуми, првиот натпревар од првенството ќе се игра на стадионот „Сантијаго Бернабеу“ пред 80.000 гледачи.

„Возбудени сме што Европското првенство во 2029 година ќе се одржи на некои од најдобрите европски кошаркарски дестинации, од кои секоја има силна кошаркарска култура и јасна посветеност на обезбедување извонреден настан. Со нетрпение очекуваме да соработуваме со земјите домаќини за да обезбедиме успешен и незаборавен турнир за тимовите, навивачите и партнерите“, рече претседателот на ФИБА Европа, Хорхе Гарбахоса.

Европското првенство оваа година ќе се одржи во Латвија, Полска, Финска и Кипар од 27 август до 14 септември.

Привремениот тренер на Денвер Нагетс, Дејвид Аделман, ќе ја продолжи соработката со франшизата од Колорадо.

Според добро информираниот Шемс Чаранија, во Денвер сакаат да го задржат Аделман, кој го презеде тимот непосредно пред плејофот.

Синот на легендарниот Рик Аделман ја доби довербата на раководството по отпуштањето на Мајкл Малоун.

Неговата работа очигледно им се допаднала на челниците на клубот, кои решиле да го ангажираат како постојан тренер.

Тој успеа да оствари серија од три победи во НБА откако го презеде тимот, а потоа го водеше тимот во плејофот, во седум натпревари Денвер ги елиминира ЛА Клиперс, но потоа во полуфиналето во седум натпревар Нагетс загубија од Оклахома.

Постоеше сомнеж дали Аделман ќе остане прв тренер поради конкретни одлуки на крајот од натпреварите, но се чини дека сите во клубот се доста задоволни од неговиот придонес.

Недолго по објавата од „ESPN“, и Денвер потврди дека Аделман ќе биде новиот тренер.

Кошаркарот на Оклахома, Џејлен Вилијамс, ќе мора да плати казна од 25.000 долари поради „носење облека со непристоен текст“ на неговата прес-конференција по победата против Денвер во седмиот натпревар од плејофот во НБА лигата.

Вилијамс не употреби вулгарности додека разговараше со новинарите, но, беше критикуван за натписот на неговата маица.

Играчот кој има 24 години, во елиминацискиот дел има просек од 19,6 поени. Вилијамс на мечот со Денвер забележа 24 поени, 5 скока и 7 асистенции.

Ливерпул и Борнмаут влегле во напредни преговoри за трансфер на левиот бек Милош Керкез, велат последните информации од Англија.

„Црвените“ ги договориле личните услови со 21-годишниот унгарски репрезентативец. Се претпоставува дека Борнмаут бара околу 45 милиони фунти за Керкез.

Ливерпул потврди дека Џереми Фримпонг денеска треба да ги помине лекарските прегледи и да потпише петгодишен договор со клубот.

„Следните неколку дена веројатно ќе испијам многу пиво“, изјави Никола Јокич со полунасмевка по убедливиот пораз на Денвер Нагетс од Оклахома Сити Тандер со 125-93, резултат што ги испрати Тандерите во финалето на конференцијата. 

 
Српската ѕвезда, која ја водеше неговата екипа со 22 поени и 7 асистенции, не можеше сам да ги неутрализира силите на Оклахома. 
„Не бевме на потребното ниво. Повредите нè погодија во клучни моменти, а недостигаше и интензитетот кој нè красеше минатата сезона,“ додаде Јокич. 

 
Особено се почувствува отсуството на континуирана поддршка од клупата, а неколку стартери не успеаја да влезат во ритам. Јокич истакна дека, и покрај елиминацијата, е горд на тимот и верува дека искуството ќе им помогне да се вратат посилни.