Челниците на шпанската Ла Лига успеаја да ги продадат телевизиските права за пренос на натпреварите од домашниот шампионат за 4,95 милијарди евра. Новиот супер договор е потпишан со компаниите Мовистар и ДАЗН и е со важност од 5 години.

Претходниот договор со Телефоника беше на две години и чинеше 2,94 милијарди евра.

Новиот договор на екипите учесници во Ла Лига ќе им гарантира финансиска стабилност и доста поголеми приходи од досегашните.

 Освен тоа, натпреварите од фудбалското првенството на Шпанија сега ќе бидат многу подостапни за фановите во САД, Мексико и Латинска Америка.

Тренерот на Ливерпул, Јирген Клоп излезе со интерес коментар за исходот од ждрепката во Лигата на шампиони со која тимот од „Енфилд“ за противник во осминафиналето го доби Интер.

Пред неколку дена, Ливерпул во групната фаза од ЛШ играше против градскиот ривал на Интер, екипата на Милан и забележа победа од 2:1 на „Сан  Сиро“.

„Морав да чекам 54 години за прв пат да одам на Сан Сиро, а сега ќе бидам таму два пати за три месеци, така што тоа е добра вест. Дефинитивно ова е тешка ждрепка, Интер е лидер во италијанската лига и во моментот играат одличен фудбал. Ќе видиме како ќе се развиваат работите пред нашата пресметка во февруари. Секако, сите ги знаеме Санчез и Џеко, а Лаутаро Мартинез е еден од највозбудливите напаѓачи во светот. Тренерот Инзаги во првата година успеа да стане шампион на Италија, но таков е начинот на Ливерпул, никогаш не е лесно. Ова е вистински натпревар од Лигата на шампионите, така што се е во ред и со нетрпение го очекувам“, изјави Клоп.

Стивен Џерард, ја потврди информацијата за заразените со коронавирус во Астон Вила. Вчера медиумите во Англија објавија дека еден фудбалер и неколку вработени имале позитивни тестови на ковид-19.

„Сите бевме повторно тестирани утрово и има неколку позитивни тестови меѓу играчите и вработените. Тие се во карантин и им посакуваме се најдобро“, рече Џерард, без да открие имиња. Сепак, резултатите од сите тестови сè уште се нејпознати.

Денес Астон Вила гостува кај Норич и засега нема индиции дека овој натпревар може да биде одложен. Инфекции со Ковид-19 беа откриени и во Манчестер Јунајтед во неделата, а денес клубот ја затвори својата база на 24 часа.

Џамал Мусиала има фрактура на коска на раката и најверојатно ќе ги пропушти последните два натпревари на Баварците пред зимската пауза во Бундеслигата, објави германскиот шампион.

Баерн до крајот на календарската година ќе се соочи со Штутгарт и Волфсбург. Тренерот на Баерн Минхен, Јулијан Нагелсман, објасни дека учеството на Мусиала на двата меча ќе зависи пред се од тоа колку болка чувствува 18-годишниот офанзивен играч за врска и дали операцијата или третманот ќе бидат поконзервативни.

Против Штутгарт, Баерн може да остане без уште двајца играчи од средниот ред – Леон Горецка и Корентин Толисо, кои исто така се опоравуваат од повредите. Воедно, австрискиот играч за врска Марсел Забицер денеска продолжи со тренинзите и наскоро повторно ќе му биде на располагање на Нагелсман. Во следниот натпревар Баерн сигурно ќе биде без Џошуа Кимих и Ерик Максим Чупо-Мотинг кои се заразените со коронавирус, како и без Јосип Станишиќ, кој има скинат мускул на левиот бут.

Дивок Ориги влезе во последната година од договорот и нема најави за негово продолжување. 26-годишниот напаѓач не добива голема минутажа кај Јирген Клоп, па тоа е причината поради која сака да ја промени средината.

Ориги и во летниот преоден рок беше на излезна врата од „Енфилд“, но никој клуб не сакаше да плати 10 милиони фунти, колку што Ливерпул бараше за неговата слобода.

Тој во јануари ќе биде слободен да преговара со заинтересираните клубови, а се поизвесно е дека на лето како слободен играч ќе го напушти Ливерпул.

Милан сака да ја искористи таквата ситуација и наскоро ќе започне преговори со неговиот агент, а самиот Ориги е отворен за преселба на „Сан Сиро“.

Нигериската фудбалска федерација го разреши селекторот на репрезентацијата Гернот Рор само еден месец пред старот на Африканскиот куп на нации, пренесува Ројтерс.

На негово место експресно е назначен Аугустин Егуавон, актуелниот техничкиот директор на федерацијата. Рор, кој ја презеде селекторската функција во август 2016 година, ја предводеше Нигерија на Светското првенство во 2018 година и до третото место на Африканскиот куп на нации една година подоцна.

Тој се најде на мета на жестоки критики поради неодамнешниот настап на тимот, откако Нигерија ремизираше 1-1 со Зеленортските Острови во ноември и загуби од ЦАР во октомври.

Дефанзивецот на Јувентус, Матијас де Лихт, пред да го напушти Ајакс и да замине во Италија, имал можност да го облече дресот на Баерн Минхен, откри неговиот агент задолжен за трансфери, Мино Раиола.

„Бевме во разговори со Баерн и можноста да постигнеме договор беше многу реална. Штета што не успеа“ изјави Рајола. Де Лихт во 2019 година доби многу понуди а покрај Баварците во игра за неговиот потпис беше и Барселона.

Сепак, Холанѓанецот реши кариерата да ја продолжи во Италија. Таму во тековнава сезона има одиграно 13 натпревари и постигнато 1 гол.

Според англиските медиуми, Тренерот на Тотенхем, Антонио Конте, веќе му соопштил на Деле Али дека не е дел од неговите идни планови со тимот. Со оглед на тоа голема е веројатноста Англичанецот во јануари да го напушти Тотенхем и да побара нова средина.

Деле Али со заминувањето од Тотенхем ќе проба да се врати во старата форма кога беше незаменлив дел од екипата која ја водеше Маурисио Почетино.

Тимот од Лондон ќе му дозволи на играчот да замине и како позајмен играч но со опција неговиот договор да биде откупен на крајот од сезоната.

Деле Али минатото лето имаше понуди за преселба во ПСЖ но трансферот не се оствари бидејќи клубот одлучи да му даде шанса да се наметне како стартер во екипата. 

За напаѓачот на Баерн Минхен, Роберт Левандовски, најдобри дефанзивци со кои се соочил во кариерата се Џорџо Кјелини и Серхио Рамос.

„Ќе наведам само двајца играчи, Серхио Рамос и Џорџо Кјелини. Тие се доста цврсти и физички подготвени момци. Ги познаваат сите трикови при чувањето на противничките напаѓачи, но секогаш се коректни и со насмевка ги завршуваат нивните дуели. Да се игра против нив е навистина тешко но во исто време и забавно“, изјави Левандовски во коментар за „Тутоспорт“.