Според информациите од Франција, екипата на Париз Сен Жермен има намера да го доведе Карим Бензема. Играчот на Реал Мадрид има договор со клубот до 2023 година и потоа како слободен играч би можел да пристигне во тимот од Париз.

Карим Бензема нема дадено коментар за оваа можност, но извор близок до него изјави дека тој нема ништо против да ја заврши кариерата во Франција. ПСЖ има намера во своите редови да ги доведе најдобрите француски играчи па затоа освен Бензема се обидува да го доведе и Пол Погба.

Поранешниот столб на одбраната на Манчестер Јунајтед, Рио Фердинард, изјави дека е време Оле Гунар Солскјер да го напушти кормилото на тимот.

„Мислам дека ако Солскјер замине сега, тоа ќе го направи со крената глава. Оле го направи она за што беше доведен во Манчестер. Тој дојде и ги врати надежите на луѓето, ги натера да се вратат на стадионот и повторно да ги гледаат натпреварите на тимот“, се вели во изјавата на Фердинанд.

Рио Фердинанд важеше за голем поддржувач на неговиот поранешен соиграч Солскјер, меѓутоа по последните лоши резултати и изданија на тимот, го промени своето мислење и сега јавно побара од него да си замине.

Џек Грилиш кој претходно играше за Астон Вила, ја коментираше оставката на Дин Смит како главен тренер на клубот од Бирмингем.

„Никој никогаш нема да се спореди со него. Најголемиот на сите времиња“ – напиша Грилиш на „Твитер“. Смит беше на чело на Астон Вила од 2018 година. Договорот на специјалист со клубот беше активен до јуни 2023 година.

Клубот од Бирмингем има 10 бода од 11 натпревари и се наоѓа на 16-тото место во англиската Премиер лига. Во 11. коло од Премиер лигата, Астон Вила загуби од Саутемптон со резултат 1-0.

Бившиот селектор на македонската фудбалска репрезентација, Игор Ангеловски, би можел да седне на клупата на бугарскиот шампион Лудогорец, пренесуваат медиумите во Бугарија.

По напуштањето на селекторското место во македонската репрезентација, популарниот „Мрме“ сеуште е без ангажман, но неговото име често се поврзуваше со голем број на клубови кои сакаат да го ангажираат за нивни тренер.

 Покрај Фенербахче и Хајдук кои изгледаја како најреална опција, Ангеловски сега се споменува како можен тренер на Лудогорец. Раководството на клубот не било задоволно од работењето на нивниот стратег Станислав Генчев и е со размислување тој да биде заменет со Игор Ангеловски.

Македонската фудбалска репрезентација до 21 година вчера ги стартуваше мини подготовките за новите натпревари во евро-квалификациите, кои избраниците на Драган Канатларовски ги очекуваат овој месец.

На 11 ноември, на тренинг центарот „Петар Милошевски“ гостува селекцијата на Украина, а пет денови подоцна, на Националната арена „Тодор Проески“, „црвено-жолтите“ го пречекуваат топ фаворитот во групата, селекцијата на Франција.

Фудбалерот од средниот ред на Жилина, Енис Фазлагиќ во изјава за ФФМ истакна дека, верува дека, со добра игра и пожртвуваност пред домашната публика може да се остварат позитивни резултати.

Нè очекуваат два многу тешки меча против Украина и Франција. Фокусот е максимално насочен кон првиот дуел со Украина, тежок противник кој се наоѓа во одлична форма и игра многу квалитетно во овие квалификации. Имаа одлични индивидуалци, но и колективно се многу добри. Ќе се подготвиме максимално, ќе дадеме сè од себе и се надевам дека ќе успееме да освоиме три бода од овој дуел. Одиме чекор по чекор, играме два натпревари на домашен терен, верувам дека со поддршката од нашите навивачи ќе можеме да освоиме бодови и на мечот со Франција, рече Фазлагиќ.

Потсети дека на претходниот квалификациски циклус во октомври и мечевите со Фарски Острови и Ерменија не беше во тимот поради повреда на зглобот, но, тоа, како што кажа, е зад него и е подготвен да даде сè од себе за Македонија на натпреварите со Украина и Франција.

Во досегашниот тек од квалификациите, Украина е второпласирана во групата со девет бодови, четири повеќе од македонската репрезентација на третата позиција.

Фудбалерот на ПСЖ, Нејмар беше двоен стрелец на натпреварот од француското првенство против Бордо (3-2).

29-годишниот фудбалер ги постигна 400-от и 401-от гол во кариерата. Нејмар има постигнато 90 гола за ПСЖ во сите натпреварувања, 136 за Сантос, 105 за Барселона и 70 за Бразил.

Бразилецот се искачи на 8. место меѓу најдобрите стрелци во историјата на парискиот клуб. Нејмар го помина Анхел Ди Марија, кој стигна до 89 гола во дресот на ПСЖ.

Рекордер на ПСЖ е Единсон Кавани (200). Во топ 7 се и Златан Ибрахимовиќ (156), Килијан Мбапе (139), Паулета (109), Доминик Рохто (100), Мустафа Далеб (98) и Франсоа Мпеле (95).

Марк Овермарс ја одби понудата на Њукасл да стане спортски директор во клубот. 48-годишниот Холанѓанец ја извршува функцијата во Ајакс од 2012 година и за тоа време стекна репутација како специјалист за откривање и развивање таленти од светска класа. Затоа новите сопственици на Њукасл сакаа да го привлечат во својот проект. Сепак, според одредени медиуми на Островот, Овермарс одлучил да остане во Холандија и да ја продолжи својата работа во Ајакс.

Во меѓувреме, Њукасл се очекува денеска да го објави назначувањето на Еди Хау, кој ќе го замени Стив Брус на менаџерската позиција. Поранешниот тренер на Бурнемаут во живо го следеше гостувањето кај Брајтон во саботата, а Њукасл е на претпоследното место на табелата во Премиер лигата само благодарение на подобрата гол-разлика од Норич.

Легендата на Ливерпул и актуелен тренер на Глазгов Ренџерс, Стивен Џерард е голем фаворит за преземање на клупата на Астон Вила, по отказот кој му беше доделен на довчерашниот тренер Дин Смит.

Според англиските медиуми, Џерард е на врвот на листата кај управата на Астон Вила, но како можни кандидати се споменуваат и имињата на Ралф Хазенхотл кој е актуелен тренер на Саутхемтон, и селекторот на данската фудбалска репрезентација,Каспер Хулманд.