Уругвајскиот фудбалски клуб Национал соопшти дека потпиша петмесечен договор со досегашниот играч на Атлетико Мадрид, Луис Суарез.

Претседателот на Национал потврди дека поранешниот играч на Ајакс, Ливерпул, Барселона и Атлетико, ќе пристигне во Монтевидео претстојниот викенд и дека ќе биде спремен за настап на првиот натпревар со екипата.

Суарез е најдобар стрелец на репрезентацијата на Уругвај со постигнати 68 гола, а својата играчка кариера ја започна токму во Национал.

Кристијан Ериксен, засилувањето на Манчестер Јунајтед, за првпат се огласи по пристигнувањето на „Олд Трафорд“.

Данецот неодамна пристигна како слободен играч од Брентфорд и потпиша тригодишен договор со Јунајтед.

Наскоро ќе има можност да дебитира во црвениот дрес и признава дека тоа ќе му биде малку невообичаено, бидејќи е навикнат да игра за противничките екипи во Театарот на соништата.

„За мене е чудно што сум во Јунајтед, мислев дека тоа нема да се случи. Да се ​​биде играч на Манчестер Јунајтед е нешто навистина посебно. Мојата кариера, пред тој инцидент на Евро 2020, воопшто не беше поврзана со враќањето во Велика Британија, така што тоа што сум овде сега ме прави среќен. Чувството е навистина добро“, призна Ериксен.

Наполи е на прагот да потпише договор со нов централен дефанзивец кој треба да го замени Калиду Кулибали.

Станува збор за корејскиот интернационалец Ким Мин-Жае од Фенербахче, кој ќе добие договор на пет сезони. Наполи ќе ја плати неговата откупна клаузула од 19,5 милиони евра.

Утринава 25-годишниот дефанзивец замина за Рим каде ќе ги помине лекарските прегледи пред неговиот трансфер. Беше многу блиску до преселба во Рен, но на крајот Наполи ја добија битката за неговиот потпис.

Мин-Жае помина само една година во Фенербахче по неговиот трансфер од 3 милиони евра од кинескиот Пекинг Гуан. За гигантот од Истанбул одира 39 натпревари, а за репрезентацијата на Јужна Кореја има еден меч повеќе.

Фудбалскиот клуб Јувентус спогодбено ја прекина соработката со играчот од средниот ред Арон Ремзи.

Јувентус и Ремзи се најдоа на половина пат – фудбалерот бараше клубот да му плати 4.000.000 евра, а италијанскиот гигант понуди 2.000.000 евра, па така Велшанецот ќе добие 3.000.000 евра и ќе го напушти Торино.

Ремзи во 2019 година дојде во Јувентус како слободен играч од Арсенал, а бидејќи Италијанците не платија никакво обештетување за него, решија да го наградат со договор од 7.000.000 евра по сезона.

Повредите го спречија велшкиот играч за врска да покаже што може во Торино, а како замена за него се споменува Леандро Паредес од ПСЖ.

Медиумите во Англија го објавија клупскиот правилник и кодексот на однесување во екипата на Астон Вила кој е потпишан од тренерот Стивен Џерард.

Според информациите и фотографијата од правилникот кој го објави весникот Дејли Мејл, секој фудбалер на Астон Вила кој ќе задоцни на тренинг ќе мора да плати казна од 500 фунти.

Секое задоцнување на клупски состанок, прошетка или влегување во автобусот на денот на натпреварот, ќе се плаќа со казна од 1000 фунти.

Едно од правилата се однесува и на добиените црвени картони. Секој играч на Астон Вила кој ќе биде исклучен на натпревар е должен да плати ручек на целиот тим после добивањето на црвениот картон.

Екипата на Астон Вила минатата сезона го зазеде 14. место во Премиер лигата со 40 бода.

Фудбалерот, Пауло Дибала, вчера на специјална прес-конференција беше претставен како летно засилување за екипата на Рома.

Напаѓачот пред новинарите проговори како го напушти Јувентус и зошто се определ да го облече дресот на „волчицата“.

„Повикот на Мурињо беше вистинско уживање. Првиот пат го направивме тоа заедно со Пинто а потоа еден ден одеднаш ми пиша и повторно разговаравме и мислам дека така се случи“, вели Аргентинецот.

Најплатениот играч во шпанската Примера, Еден Азар, е еден од најинтересните фудбалери за медиумите на американската турнеја со неговиот Реал Мадрид.

Во интервју за медиумот ЕСПН, Азар открива што би променил во актуелните правила на игра, па на прашањето што прво би сменил тој ја споменува ВАР технологијата.

„Би го укинал користењето на ВАР-от, бидејќи судиските грешки според мене се составен дел од фудбалот. Но поради тоа што навивачите постојано се жалеа беше воведен ВАР. После постигнувањето на гол ние фудбалерите чекаме и губиме дел од таа радост бидејќи ја очекуваме одлуката од ВАР технологијата. Зато се залагам за укинување на ВАР.

Доскорешниот фудбалер на Ајакс, Лисандро Мартинез, и официјално го потпиша својот петгодишен договор со Манчестер Јунајтед.

Екипата од Олд Трафорд за 24-годишниот аргентински дефанзивец плати 57,37 милиони евра плус 10 милиони евра низ дополнителни бонуси.  Договорот е потпишан на пет години, со можност за продолжување на соработката на уште една година.

Мартинез во Јунајтед повторно ќе соработува со тренерот Тен Хаг со кого имаше успешна соработка во Ајакс.