feature

Комо пред потпис со Алберто Морено

Новиот италијански прволигаш, Комо и натаму е активен на трансфер пазарот во обид да го засили тимот за тешката сезона која му претстои во италијанската елита. Најновата вест е дека првите луѓа на Комо сега работат на трансфер на Шпанецот Алберто Морено.

Според Фабрицио Романо, италијанскиот клуб преговара со 32-годишниот поранешен дефанзивец на Ливерпул за потпис како слободен играч. Морено минатата сезона ја мина во Виљареал, по што го заврши договорот со „жолтата подморница“.

Покрај тоа, Комо напредува во преговорите со поранешниот дефанзивец на Реал Мадрид и Манчестер Јунајтед, Рафаел Варан.

Коман размислува за пензија од националниот тим

Француски „Л’Екип“ објави дека крилниот напаѓач на Баерн Минхен, Кингсли Коман размислува да ја заврши својата репрезентативна кариера иако има само 28 години. Откако се избори по повредата на тетивата за да го заземе неговото место во тимот на Франција на ова ЕП, Коман веројатно разочаран од резултатот размислува за повлекување.

Коман размислува за својата иднина во дресот на Франција, каде досега има 57 настапи. Еден фактор што би можел да влијае на неговата одлука е потврдата дека Дешам ќе ја води селекцијата до Светското првенство во 2026 година.

Зверев ќе го скокне олимпискиот турнир во Париз?

Германскиот тенисер Александар Зверев поради повреда на левото колено би можел да ги пропушти претстојните Олимписки игри во Париз, каде треба да ја брани титулата освоена пред три години во Токио.

Зверев се лизна на тревата за време на дуелот од 3. коло против Британецот Камерон Нори во Вимблдон, но успеа да го добие тој меч за да се појави на теренот во мечот од 4. коло против Американецот Тејлор Фриц со завој околу левото колено.

Пикси останува српски селектор по Европското првенство

Драган Стојковиќ Пикси ќе остане селектор на Србија и по неуспешниот настап на оваа селекција на Европското првенство каде испадна уште во групната фаза.

Во репрезентацијата на Србија се појавија многу скандали, се шпекулираше и дека многу ѕвезди повеќе нема да играат додека Пикси беше на клупата, но на крајот дојде до голем пресврт.

Пикси ќе ја предводи Србија во новата сезона на Лигата на нации, која започнува во септември.

Оваа одлука ќе биде потврдена на состанокот на Извршниот одбор на Фудбалскиот сојуз на Србија, кој треба да се одржи во петок.

Летексие ќе го суди финалето на Европското првенство

Французинот Франсоа Летексие ќе го суди финалето на Европското првенство меѓу Шпанија и Англија. Големата пресметка е во недела во 21 часот на „Олимпија стадион“ во Берлин.

38-годишниот судија досега на Европското првенство судеше три натпревари, Шпанија – Грузија, Данска – Србија и Хрватска – Албанија. Тој беше и четврти судија на воведниот меч меѓу Германија и Шкотска.

Помошници на Летексие ќе бидат Сирил Меуниер и Мехди Рахмуни. Четврт судија е Полјакот Шимон Марчиљњак.

Жером Брисар од Франција ќе биде на ВАР. Ќе му помагаат Вили Делаџо и Масимилијано Ирати од Италија. За резервен помошен судија е назначен Томаш Листкиевич од Полска.

Болдвин го напушти Макаби за Фенербахче

Американскиот кошаркар Вејд Болдвин официјално е нов кошаркар на турскиот евролигаш Фенербахче со кој потпиша двегодишен договор со можност за продолжување на соработката.

Дваесетиосумгодишникот последните две сезони ги помина во редовите на Макаби каде се наметна како еден од најдобрите поентери во Евролигата.

Претходната сезона бележеше просек од 17.4 поени, 2.5 скокови и 4.9 асистенции на 30 одиграни средби во елитното кошаркарско првенство со што е јасно дека турскиот тим доби ново големо засилување за атак на евролигашката титула.

Веспрем доби „вајлд карта“ за учество на Светското клупско првенство

ИХФ објави дека за светското клубско ракометно првенство „вајлд карта“ добива унгарскиот ракометен гигант Веспрем.

Покрај Веспрем, во Каиро ќе играат уште две европски екипи – шампионот Барселона и бранителот на титула на Светското клупско првенство, Магдебург.

На турнирот ќе настапт Ал Ахли од Египет, африканскиот првак Замалек, азискиот шампион Ал Калеј, претставникот на Средна и Јужна Америка – бразилскиот Таубате, како и уште по еден тим од Северна Америка и Кариби, односно Австралија и Океанија.

Светското клупско првенство, кое претходно го имаше називот Супер Глоуб, ќе се одржи од 27 септември до 3 октомври.

Руските спортисти и федерации сами ќе одлучат дали ќе настапат во Париз

Руските спортисти кои имаат покана за настап на Олимписките игри во Париз сами ќе одлучат дали ќе одат таму или не, изјави денеска портпаролот на шефот на руската држава Дмитриј Песков, цитиран од агенцијата ТАСС.

Воедно тој повика на почитување на одлуките и договорите што ги имаат одредени спортски федерации.

„Ова е одлука на секој спортист. Секој самостојно донесува такви одлуки“, одговори претставникот на Кремљ на новинарско прашање за учеството на спортисти од Русија на претстојните Олимписки игри. Што се однесува до оние кои имаа можност и не отидоа, секоја федерација има свои околности, свое колективно мислење, свои колективни одлуки и тоа мора да го третираме со почит“, додаде Песков.

Олимписките игри во Париз се на програмата од 26 јули до 11 август.

Миротиќ договори враќање во Барселона

Никола Миротиќ се договори со Барселона за исплата на парите што му се должат по раскинувањето на соработката, што се случи еднострано од шпанскиот гигант.

Барселона е должна да му плати на Миротиќ долг од 20 милиони евра! А според анексот на договорот тоа ќе го прави во наредните пет години.

Никола минатата сезона ја напушти екипата на Барселона, иако имаше важечки договор со Каталонците до 2025 година и затоа ги побара парите кои му припаѓаат, по раскинувањето на соработката.

Ди Марија заминува до репрезентативна пензија по финалето на Копа Америка

Ѕвездата на Аргентина, Анхел Ди Марија, објави дека финалето на Копа Америка ќе биде неговиот последен натпревар во националниот дрес.

Синоќа, Меси и друштвото стигнаа до финалниот дуел, откако во полуфиналето победија со 2-0 против Канада. Ова е второ последовно финале за Аргентина на Копа Америка.

„Не сум подготвен за мојот последен натпревар за Аргентина, но време е… Што и да се случи во финалето, мислам дека можам да излезам со високо крената глава. Дадов сè од себе“, изјави Ди Марија.

Во финалето, Аргентина ќе се соочи со победникот од второто полуфинале меѓу Колумбија и Уругвај.

«< 112 113 114 115 116 >»