Напаѓачот на Баерн Минхен, Роберт Левандовски ја доби „Златната копачка“, откако минатата сезона постигна 41 гол во Бундеслигата и така го урна рекордот на легендарниот Герд Милер од сезоната 1971/72.

Полјакот кажа дека е пресреќен затоа што постигнал уште еден голем успех во неговата кариера, а притоа им се заблагодари на сите кои му помогнале во тоа.

„Многу сум среќен поради оваа награда. Сакам да му се заблагодарам на моето семејство, моите соиграчи, тренерите и сите останати. Без нивна поддршка никогаш немаше да ги освојам овие титули“, вели Левандовски.

Полскиот напаѓач доби и прашање за тоа дали бил блиску до потпис со Реал Мадрид.

„Вистина е дека имав состанок со Перез и не можам да ви кажам што се случи, но не гледам причина зошто би го напуштил Баерн Минхен.“ – вели Левандовски.

Жоан Лапорта веќе има свој фаворит за наследник на Куман, доколку соработката биде прекината во скоро време. Според шпекулациите во шпанскиот печат, Лапорта сака да го назначи Андреа Пирло за нов главен тренер на тимот.

Сепак, поранешниот тренер на Јувентус не е единствениот кандидат. Шпанските медиуми пишуваат дека списокот со потенцијални наследници на Куман вклучува најмалку 5-6 имиња. Меѓу нив и оние на Антонио Конте, Филип Коку и Чави.

ПСЖ се обиде да го добие играчот за врска на Челзи, Н’Голо Канте ова лето , објавија медиумите во Англија. ПСЖ дури започнал прелиминарни преговори со францускиот репрезентативец, но лондончани категорично одбиле да го продадат Канте.

Челзи веќе неколку месеци се обидува да го продолжи договорот со францускиот играч од средниот ред. Минатата сезона, Канте одигра 48 натпревари за Челзи во сите натпреварувања, со три асистенции. Неговиот сегашен договор со лондонскиот клуб истекува на 30 јуни 2023 година, а вредноста на трансферот се проценува на 55 милиони евра.

Н’Голо Канте е избран за играч за врска на Лигата на шампионите на УЕФА за сезоната 2020/2021. Соодветната награда му беше доделена на ждрепката на групната фаза од новата сезона на Лигата на шампиони.

Севиља е решена да се ослободи од Јорис Њањон кој од Рен дојде во клубот во 2018. година, а причината за тоа е што тој има прекумерна тежина и не е на нивото да биде играч од Ла Лига.

Њањон има 24 години, не се наметна во тимот, а според медиумите од Шпанија тој е пред отказ, не е физички подготвен, има вишок на килограми, и дефинитивно ќе замине од Севиља.

Французинот не е на списокот за настап во првенството на Шпанија, па сите очекуваат дека негов трансфер надвор од шпанскиот клуб ќе се реализира наскоро.

Агентот на дефанзивецот на Јувентус и холандската репрезентација Матијас де Лихт, Мино Рајола, вчера изјави дека фудбалерот може да го промени клубот во текот на летото.

Според новинарот и инсајдер Фабрицио Романо, договорот на Де Лихт со Јувентус предвидува сума за откуп, која изнесува 150 милиони евра.

Клаузулата во моментов е неважечка и ќе стапи на сила летото 2022 година. Сепак, според неговите информации, Јувентус нема намера да го пушти Де Лихт.

26-годишниот Аргентинец Максимилијано Форнари во моментов е во грчкиот град Лариса. Нема пари и спие на улица. Тој дошол во Грција за да го комплетира трансферот во Аполон од Лариса, но на крајот се пропаднало, па сега е сам во Грција.

„Се се закомплицира. Не знам што се случи. Менаџерите кои ме доведоа ме оставија без ништо. Го напуштив тимот во кој играв зошто добив официјална понуда, но никогаш не потпишав договор.“– изјавил Форнари.

Форнари сега живее на улиците во Лариса и тврди дека нема пари ниту за кафе и дека спие на клупите во паркот во градот.

Пред да дојде во Грција тој играл за Атлетико Гуемеш, а потоа еден менаџер го наговорил да дојде во Лариса и му ветил трансфер во Аполон, од што на крајот не испадна ништо.

Антонио Конте ги демантираше шпекулациите дека води преговори со Арсенал и Барселона.

Конте минатата сезона го предводеше Интер до Скудетото, но во текот на летото го напушти кормилото на „нероаѕурите“. Моментално е слободен агент, а медиумите го поврзуваат со Арсенал и Барселона.

Споменатите клубови имаат лош старт на сезоната и се погласно се шпекулира дека Артета и Куман може да добијат отказ, а Конте е прва желба на Каталонците и „топџиите“.

Меѓутоа, Конте демантира дека постојат било какви преговори и уште еднаш потврди дека оваа сезона сака да земе одмор.

Македонската женска А репрезентација загуби со 6:0 од селекцијата на Австрија во рамките на натпреварот од второто коло од квалификациите за пласман на СП 2023.

На националната арена „Тодор Проески”, гостинот ја оправда фаворитската улога и забележа сигурна победа. Во 12. минута Хобингер го отвори резултатот, на 2:0 зголеми Билла од пенал во 20. минута. Во 30. минута прекрасен погодок постигна Ашауер. 

Во продолжението од натпреварот, противникот постигна уште три гола во период од шест минути. Ашауер во 65. минута постигна уште еден погодок. Со два погодоци во 67 и 71. минута, Била го комплетираше хет трикот за конечен резултат од 6:0.

За македонската репрезентација настапија: Суарта Дервиши, Синдис Положани, Павлинка Николовска, Сара Коларовска, Илза Максути, Хава Мустафа, Наташа Андонова, Афродита Салихи, Јулија Живиќ, Рабија Дервиши, Кристина Петрушевска.

Младиот фудбалер на Арсенал, Букајо Сака, може да ја промени клупската средина најавуваат денеска медиумите во Англија.

Наводно, шпанскиот Атлетико Мадрид и италијанскиот Јувентус покажуваат дека се заинтересирани за 20-годишниот англиски репрезентативец. Според наведеното,  англискиот тим е подготвен да се раздели со играчот за најмалку  50 милиони евра.

Сака кој потекнува од школата на „ топчиите“, во сезонава има реализирано 6 натпревари во сите конкуренции  и постигнато еден гол.