Бразилската легенда Роналдо стана сопственик на фудбалскиот клуб Крузеиро откако се стекна со 90 отсто од акциите на клубот. Оваа информација беше објавена на нивниот официјален сајт.

Зделката го чини „Феноменот“ околу 70 милиони долари. Крузеиро стана вториот клуб во сопственост на Роналдо. Тој од поодамна е сопственик и на шпанскиот Ваљадолид.

Крузеиро е првиот професионален клуб за кој настапувал Роналдо. Тој пристигна во клубот 1993 година за 50 илјади долари. По нешто помалку од една година, Бразилецот се пресели во ПСВ, каде што ја почна неговата богата европска кариера.

Пропаднале плановите на италијанските фудбалски клубови да организираат мечеви во САД за време на Светското првенство во Катар кон крајот на годинава, пренесоа денес светските агенции.

Италија сакаше да ја искористи долгата пауза поради Мундијалот и да биде домаќин на посебен турнир во Орландо на кој ќе учествуваат сите 20 клубови  користејќи само фудбалери кои немаат репрезентативни обврски.

Сега последните информации велат дека таа идеја најверојатно нема да се реализира.

Барселона вчера загуби од Ајнтрахт Франкфурт на домашен терен со 3-2 и го заврши настапот во фудбалската Лига на Европа.

Откако првата средба во Германија беше 1-1, многумина очекуваа Каталонците на домашен терен на „Камп Ноу“ да забележат сигурна победа и да продолжат кон финалето, но, тоа не се случи. Разочарувањето од елиминацијата не ја крие и домашниот играч, Роналд Аарухо.

„Европа не простува грешки. Моравме да бидеме многу подобри во одбраната“, вели играчот на шпанскиот тим.

Во англиските медиуми се пишува дека потенцијално новиот тренер на Манчестер Јунајтед, Ерик Тен Хаг, ќе му даде зелено светло на Кристијано Роналдо за напуштање на клубот ова лето.

Актуелниот тренер на Ајакс ги објавил своите идеи пред раководството на Јунајтед, а според информациите, Тен Хаг не ја гледа португалската ѕвезда како дел од своите долгорочни планови на „Олд Трафорд“. Роналдо се врати во својот поранешен клуб минатото лето, со опција да го продолжи договорот на уште една година.

Сепак, големи се шансите двете страни да се разделат по разочарувачката кампања во која Манчестер Јунајтед најверојатно нема да избори пласман во Лигата на шампионите за наредната сезона.

Голот кој го постигна Тами Абрахам во четвртфиналниот натпревар од Конференциската лига против Бодо-Глимт го смести играчот на престижно место во Рома. Натпреварот се одигра на Олимпико во Рим, а заврши со победа на домаќинот со 4:0.

Имено, 24-годишниот напаѓач стана само третиот играч на Рома во овој век кој постигнал најмалку 24 гола во една сезона. Ова досега го имаат направено само Франческо Тоти и Един Џеко, и тоа во два наврати.

Младата ѕвезда на Барселона,Педри најверојатно нема да игра до крајот на сезоната. 19-годишниот фудбалер се повреди во натпреварот од Лига Европа со Ајнтрахт Франкфурт кој заврши со пораз на Барса од 2:3. Според информациите, Педри има скинат мускул и ќе му треба подолг период за закрепнување. Првичните прегледи направени врз шпанскиот репрезентативец не влеваат преголем оптимизам.

„Ме загрижува ситуацијата со Педри, но треба да почекаме поконкретни информации. Во секој случај, ова е многу лоша вест“, изјави тренерот Чави по натпреварот.

Двајца играчи од Бундеслигата се на радарот на Барселона за позицијата лев бек, пренесуваат германските медиуми.

„Билд“ пренесува дека Барселона е заинтересирана за Борна Соса од Штутгарт и Рами Бенсебаини од Борусија Мехенгладбах.

Бараселона е во потрага по квалитетна алтернатива за Жорди Алба, кој веќе има 33 години е во фудбалска зрелост.

Капитенот на Борусија Дортмунд, Марко Ројс за Скај Спорт изјави дека не планира да го напушти клубот.

„Се чувствувам исклучително добро овде и не гледам причина да ја променам средината. Би сакал да ја завршам кариерата во Дортмунд“, изјави 32-годишниот Германец.

Ројс потврдува и дека не размислува да ја заврши кариерата во 2023 година. Фудбалерот настапува за првиот тим на Борусија од 2012 година.

Клубот од Дортмунд е на второто место во поредокот во Бундеслигата со 60 бодови, девет помалку од лидерот Баерн Минхен.

„Кориере дело Спорт“ објавува дека играчот од средниот ред на Челзи, Рубен Лофтус Чик би можел да ја продолжи кариерата во Лацио.

Според изворот, тренерот на Лацио, Маурицио Сари е заинтересиран за трансфер на играчот. Лацио бара можни замени за Сергеј Милинкович-Савиќ, кој најверојатно летово го напушта клубот.

Лацио за комплетирање на трансферот е подготвен да плати 20 милиони евра.

Договорот на Лука Модриќ со Реал Мадрид истекува на крајот на сезоната, а иако се најавуваше, Хрватот се уште ја нема продолжено соработката со „кралевите“.

Модриќ иако има 36 години игра уште една фантастична сезона, па има понуди на маса, но негова желба е да ја заврши кариерата во Реал Мадрид.

Новинарот на шпански „АС“ Серхио Сантос неодамна објави дека Модриќ наскоро ќе седне на маса со раководството на Реал, па после тоа ќе  биде јасна неговата иднина.

Хрватскиот плејмејкер има на маса две понуди, а едната е од италијанскиот гигант Јувентус кој сака да го донесе на лето без обештетување.