100 голови во 34 натпревари на домашен терен за Барселона
Барселона стигна до импресивен учинок од 100 постигнати голови на домашен терен под водство на Ханси Флик, и тоа за само 34 официјални натпревари. Овој исклучителен скор сведочи за експлозивниот напад и тактичката офанзивна ефикасност што германскиот стратег ја донесе на Камп Ноу.
Под негово водство, тимот прикажа брзи транзиции и прецизна завршница, со што го надмина просекот на постигнати голови во последните неколку сезони. Играчите на Барса покажуваат совршен баланс меѓу индивидуален талент и колективна игра, што резултира со константна голгетерска серија.
Клучните имиња во нападот, како и креативните играчи од средниот ред, имаат голем удел во оваа бројка. Благодарение на нивната соработка и фудбалска интелигенција, Барселона повторно е тим што влева страв на домашен терен.
Овој брз пат до 100 голови е добар показател за амбициите на клубот сезонава, и во домашното првенство, и на европска сцена.
Ван Перси доминира во Холандија со Фејнорд
Под водство на Ван Перси, Фејнорд блеска оваа сезона во холандската Ередивизија. Со 8 победи во 9 натпревари, тимот има постигнато 25 голови и примено само 6, што го постави цврсто на врвот на табелата и го прави главен кандидат за титулата.
Ван Перси се истакнува како тренер со тактичка остроумност, комбинирајќи офанзивна игра со солидна одбрана. Тимската хармонија на теренот јасно го покажува неговото длабоко разбирање за модерниот фудбал, каде искусните играчи и младите таленти функционираат во совршена симбиоза.
Успехот на Фејнорд под негово водство го менува фудбалскиот пејзаж во Холандија. Традиционалните гиганти се предизвикани, а навивачите уживаат во возбудливи натпревари. Овој пресврт го менува и тактичкиот пристап во целата лига.
Многумина аналитичари сега го сметаат Ван Перси за еден од најнедоволно ценетите тренери во Европа.
Ла Масиа роди нова ѕвезда
На само 17 години, Дро Фернандез покажа дека не чувствува страв од големата сцена. Во своето деби во Лигата на Шампионите за Барселона, младиот талент веднаш се запиша на листата на асистенти, помагајќи при голот на Фермин Лопез во убедливата победа од 6:1 против Олимпијакос.
Фернандез, роден во Шпанија во 2008 година, со филипинско потекло по мајка, е уште еден скапоцен камен изваден од академијата Ла Масија. Во оваа легендарна фудбалска школа, каде се изградени имиња како Меси, Иниеста и Чави. Дро се покажа со комбинација од техничка извонредност и тактичка зрелост ретко видена на таа возраст.
Ханси Флик, принуден на ротации поради повреди, реши да му даде шанса токму на Дро, и не погреши.
Настапот против Олимпијакос не беше само деби, беше најава на нешто многу поголемо. Барселона, клуб со богата историја и постојана потрага по нови фудбалски бисери, можеби го пронајде својот следен талент во младиот, но одлучен Дро Фернандез.
Куртоа го брани Винисиус среде критики
Тибо Куртоа, јавно застана во одбрана на својот соиграч Винисиус Жуниор, по натпреварот против Гетафе, каде што бразилскиот фудбалер беше изложен на жестоки провокации од трибините. Куртоа истакна дека Винисиус е често мета на навреди и дека тоа трае уште од неговите први денови во Шпанија.
„Кога имаше 18 години, многумина му се потсмеваа. Денес, повторно е напаѓан без никаква причина. Не направи ништо погрешно, а беше навредуван од моментот кога зачекори на теренот“, рече Куртоа.
Влезот на Винисиус во второто полувреме донесе пресврт во играта. Неговата присутност очигледно ги вознемири противничките играчи, што резултираше со два црвени картона за Гетафе. Реал создаде повеќе шанси, а Винисиус повторно покажа колку е важен за тимот, дури и кога игра само дел од мечот.
Куртоа посочи и на менталната сила на Винисиус, велејќи дека бразилецот знае како да се справи со провокации и притисоци, и ги користи тие моменти како гориво за подобра игра.
„Не е лесно да бидеш постојана мета, но тој секогаш одговара со игра. Тоа е клучно за успехот на Реал“, додаде белгискиот голман.
Со силен почеток на сезоната 2025/26, Винисиус веќе има значајни настапи и останува клучна фигура во амбициите на клубот. Куртоа изрази целосна доверба во неговиот понатамошен напредок, со надеж дека најдоброто од Винисиус допрва доаѓа.
Ебрима Тункара, следниот Јамал од школата на Барса
Барселона сериозно работи за да го осигура долгорочното присуство на Ебрима Тункара, 15-годишно крило кое веќе се етикетира како следниот голем талент што излегува од Ла Масиа. Момчето со гамбиско потекло, родено во март 2010 година, веќе игра за У19 тимот на Барса, иако е значително помлад од соиграчите, и со тоа го потврдува потенцијалот што клубот го гледа во него.
Тункара привлече внимание откако стана еден од најмладите стрелци со 2 гола за шпанската репрезентација под 17 години. Неговата техничка зрелост, физичка подготвеност и чувство за игра го прават посебен, а според многумина, тој оди по стапките на Ламин Јамал, последниот бисер на Барса што експлодираше на големата сцена.
Претседателот на клубот, Хоан Лапорта, неодамна одржал важна средба со агентот Пини Захави, каде што клучна тема бил токму планот за развој на Тункара. Клубот ја презентирал својата визија за неговата интеграција во повисоките нивоа на натпреварување, со јасна цел, да го задржи и изгради како иден првотимец. Разговорите со Захави исто така се однесувале и на пошироки економски прашања и инвестиции, што укажува дека Барса прави чекори кон стабилна иднина не само на теренот, туку и надвор од него.
Техничкиот штаб на Барселона внимателно го следи секој чекор на Ебрима. Според извори од клубот, тој е приоритет во долгорочниот проект на Ла Масиа, и плановите се веќе во движење. На Каталонците им е јасно дека Тункара не е обичен младинец, тој е потенцијал што може да ја обликува иднината на клубот.
Запомнете го името, Ебрима Тункара би можел да биде следната голема приказна од Ла Масиа.
Капело: Никогаш не сум го видел Конте во вакво издание
ПСВ на домашен терен го совлада Наполи со 6-2 во третото коло од Лигата на шампионите. ПСВ губеше со 1-0 по голот на Скот Мектоминеј во 31-та минута, но потоа постигна четири гола по ред и го промени текот на натпреварот.
Алесандро Буонгјорно си даде автогол, Исмаел Саибари постигна еден, додека Денис Ман постигна два гола. Мектоминеј во 85-тата минута намали на 2-4, но Рикардо Пепи и Коухаиб Дриуеч забележаа голови во 86. и 89. минута за конечен резултат.
За прв пат во својата тренерска кариера, Антонио Конте (56) прими шест голови на еден натпревар. Анализа на мечот за Sky Sport даде легендарниот италијански тренер Фабио Капело (79). Нагласи дека не ја видел желбата на теренот ни кај играчите, ни кај Конте, кој инаку е познат по својата енергичност.
“На теренот не видовме решителност и желба, но ни Конте ги немаше. Никогаш не сум го видел ваков, потиштен и не лутејќи се на играчите што не трчаат. Не го разбирам тој став. Никогаш не сум го видел Конте, тренер кој е одлучен, толку потиштен на клупа. ПСВ трчаше двојно повеќе од Наполи,” изјави Капело, поранешен тренер на Милан, Реал Мадрид, Рома и Јувентус.
Пелистер подготвен за европска битка, битолското деби да заврши со победа
Се е подготвено за битолската европска кошаркарска премиера, вечерашниот меч од второто коло во ФИБА Европа купот во кое Пелистер ќе биде домаќин на Превидза од Словачка (19 часот, сала „Боро Чурлевски“.
„Пелистерци“ претрпеа пораз во првиот меч во Загреб од Цедевита јуниор, но таа лекција е научена, па се очекува избраниците на тренерот Даскаловски максимално мотивирани да го дочекаат гостинот. Промената на пристапот е она што сите во таборот на Пелистер го потенцираа во пресрет на овој меч, најавувајќи една иста работа – максимална борба во текот на сите 40 минути со единствена цел, да се стигне до победа што ќе биде прославена со битолската публика.
„Пред ас е првиот европски меч во Битола, податок што дефинитивно е мотив плус за сите нас. Знаеме дека нема да биде нималку лесно, а клучот ќе биде во нашиот пристап. Ако одиграме онака како што знаеме, ако се бориме и го спроведеме она што го договараме, верувам дека ќе успееме да се радуваме на крајот“, вели Никола Малешевиќ.
Превидза во првото коло покажа дека е исклучително квалитетен тим, рутински славејќи над Керавнос со убедливи 82-68, меч што беше анализиран од страна на стручниот штаб и кошаркарите на Пелистер.
„Ги скаутиравме и знаеме дека сакаат да играат физичка кошарка, ги увидовме нивните предности, како и слабите страни. Играат брза кошарка, незгодни се во транзиција. Ако успееме да го запреме тоа и ние бидеме во котрола над темпото, ќе си ја олесниме задачата на патот кон првата европска победа која сите ја посакуваме“, порачува Малешевиќ.
Билетите по цена од 200 денари од денеска ќе можат да се купат и на билетарницата во салата „Боро Чурлевски“.
НБА лигата подготвува нов проект, за две години почнува НБА Европа
НБА планира да ги финализира надоместоците за франшиза во наредните месеци за да лансира нова кошаркарска лига во Европа во рок од две години, објави заменик-комесарот и главен оперативен директор на лигата, Марк Тејтум.
„Нашата цел е да го започнеме проектот во следните две години. Секако, тоа зависи од одобрението од НБА и ФИБА. Преминуваме во следната фаза. И мислам дека во следните осум недели ќе добиеме многу добра претстава за тоа на кое ниво на интерес сме. Сметаме дека оваа лига ќе вклучува комбинација од постоечки клубови, потенцијални нови клубови кои денес не постојат и евентуално некои фудбалски клубови кои немаат кошаркарски тим, но сакаат да инвестираат во еден. Во првата фаза, планираме да се прошириме во 10-12 градови од Велика Британија, Шпанија, Италија, Франција, Германија, евентуално Турција и Грција“, изјави Тејтум за „talkSPORT“.
Претходно, НБА и Меѓународната кошаркарска федерација (ФИБА) официјално објавија дека размислуваат за создавање нова професионална кошаркарска лига во Европа, која би послужила како алтернатива на Евролигата и би ги следела европските или меѓународните правила, вклучувајќи натпревари од 40 минути. Би била поблиску до европскиот формат отколку Американска. Планирано е лигата да вклучува 16 тима.
Ди Лоренцо по дебаклот со ПСВ: Беше ужасна ноќ за Наполи
Капитен на Наполи, Џовани Ди Лоренцо, е разочаран од високиот пораз и играта на неговиот тим синоќа на мечот со ПСВ во 3. коло од Лигата на шампионите.
Холандскиот тим победи со 6-2, доминирајќи на теренот.
„Беше ужасна ноќ. Треба да застанеме, да размислиме и да анализираме што се случи. Сега се чувствуваме ранливи, за разлика од минатата сезона. Се чувствува како противникот да може да ни наштети во секој момент. Ова треба веднаш да се промени“, изјави Ди Лоренцо по натпреварот.
Македонскиот репрезентативец Елиф Елмас ги одигра последните десетина минута за гостинскиот тим.
Наполи е на 22. место на табелата во елитната лигата со три бода.
ЕХФ одобри проширување на Лигата на шампионите
Европската ракометна федерација (ЕХФ) потврди дека почнувајќи од следната сезона, форматот на ракометната Лига на шампиони и Европската лига ќе биде променет. Бројот на екипи во Лигата на шампиони ќе се зголеми од сегашните 16 на 24, и тие ќе играат според сосема нов систем на натпреварување, сличен на оној што го гледаме на репрезентативните настани.
Почнувајќи од следната сезона, најелитното клупско натпреварување во Европа ќе го играат 24 екипи, поделени во шест групи од по четири екипи. Откако ќе играат во „кружен систем“ (со секој ривал дома и на гости), двете првопласирани екипи од секоја група се префрлаат во две групи од по шест екипи.
Екипите што ќе завршат на позициите три и четири ќе го продолжат своето европско патување во елиминацискиот дел од Европската лига.
Дванаесетте екипи што на тој начин ќе се најдат во главниот дел од ждрепката повторно ќе играат по „кружен систем“, по што четирите најдобри екипи од секоја од тие две групи ќе се квалификуваат за четвртфиналето (првопласираниот ќе игра со четвртопласираниот, второпласираниот со третопласираниот).
Шестопласираните тимови ќе ја завршат својата европска приказна тука, додека петтопласираните тимови ќе се пласираат директно во осминафиналето во Европската лига.
Победниците од четвртфиналните натпревари на Лигата на шампионите ќе се квалификуваат за турнирот „Фајнл Фор“ во Келн, каде што, како и досега, ќе се одлучува за новиот шампион.
Од следната сезона, 32 тима ќе влезат во Европската лига, распоредени во осум групи од по четири тима (веќе нема да има прелиминарни рунди и квалификации). Во групите, тимовите ќе играат по „кружен систем“, по што првите две од секоја група ќе се пласираат во елиминацискиот дел од натпреварувањето.
На 16-те тима во нокаут фазата ќе им се приклучат и 12 екипи од Лигата на шампионите.
Овие 28 тима ќе бидат поделени во 14 парови, по што на победниците ќе им се придружат уште две тима од Лигата на шампионите. Зборуваме за петтопласираните екипи од главниот дел од ждрепката на тоа натпреварување, што ќе ни даде 16 екипи во осминафиналето на Европската лига.
Победниците од тие натпревари ќе се пласираат во четвртфиналето, победниците во оваа фаза ќе изборат место на „Фајнал Фор“ турнирот.
