Арсенал планира да го награди својот голман Арон Рамсдејл со нов договор и поголема плата, пренесува „Атлетик“. 24-годишниот голман брзо се наметна во тимот на Арсенал и остави одличен впечаток со своите настапи откако беше донесен на „Емирати“ во 2021 година.

Оваа сезона прими само 10 гола на 10 натпревари во Премиер лигата, а на 4 натпревари имаше чиста мрежа. Тој со добрите игри им помогна на лондончани да бидат лидери во првенството.

Рамсдејл е под договор со Арсенал на уште четири години, а клубот има опција да го продолжи за уште една година. Сепак, „Топчиите“ веруваат дека голманот веќе се докажал како важен играч за клубот и заслужува повисока плата од онаа што ја добива во моментов. Во меѓувреме, лондончани ќе го обврзат на уште подолг период и ќе бидат мирни дека ќе можат да сметаат на него во иднина.

Актуелниот селектор на шпанската репрезентација Луис Енрике , кој ќе ја напушти функцијата по Светското првенство во Катар, може да се врати во Барселона.

Енрике се гледа како замена за Чави во случај овој да не ја заврши својата работа како што се очекува од него, објави „Ел Национал“.

52-годишниот Луис Енрике беше тренер на Барселона од 2014 до 2017 година. Под негово водство Барселона освои 10 трофеи, вклучувајќи ја и последната во Лига на шампиони во нејзината историја во 2015 година.

Од јули 2018 година, Енрике (на прекини) е селектор на шпанската репрезентација и веќе најави дека ќе ја напушти функцијата по Светското првенство во Катар.

Френки де Јонг тврди дека медиумите лажеле за неговата плата во Барселона.     

На прашањето дали по заминувањето на Лео Меси, Де Јонг стана најплатениот играч во Барселона, фудбалерот одговори: – Мислам дека не. Почнаа кампања против мене. Видете, не сум кажал ниту еден збор сето ова време. Но, клубот шири… Или медиумите кои се поврзани со клубот… Шират лаги, многу лаги. Во Барселона играм три години и секоја година се откажувам од дел од платата. Секако, овие пари треба да ми се вратат, Барса да ми ги исплати покрај редовната плата. Поради ова, се разбира, ќе изгледаат големи моите приходи. Мислам дека многу луѓе не го разбираат ова. Бројките кои се шират низ медиумите се лажни, изјави играчот од средниот ред на Барселона.

Во август се појави информација дека Френки од оваа сезона во Барселона ќе добива околу 22 милиони евра годишно.

Италијанските медиуми ја пренесуваат веста дека челниците на Милан имале средба со Себастиен Ледур кој е дел од менаџерскиот тим на фудбалерот на Челзи, Хаким Зијеш.

 Целта на средбата е започнување на преговори за евентуален трансфер на Зијеш во Милан.

29-годишниот репрезентативец на Мароко веќе подолг период се споменува како ново засилување на Милан, а шансите за негово доаѓање на Сан Сиро се зголемија откако тој добива многу мала минутажа во новата сезона на својот актуелен клуб Челзи.

Раководството на Реал Мадрид има за цел да го продолжи договорот со голманот на тимот Андреј Лунин, пренесува „АС“.

Според изворот, и покрај фактот што украинскиот голман успешно го заменува повредениот Тибо Куртоа , Лунин знае дека тој е резервниот голман на тимот. Лунин наводно е среќен во Реал Мадрид и не сака да си замине.

Лунин се пресели во Реал Мадрид од украинска Зорја во 2018 година. Како дел од Кралскиот клуб, голманот стана шампион на Шпанија и победник во Лигата на шампионите. Оваа сезона 23-годишниот Украинец учествуваше во пет натпревари од шпанската Ла Лига и Лигата на шампионите, на кои прими еден гол.

Водечките луѓе во Челзи се заинтересирани за доведување на напаѓот од Лил, Џонатан Дејвид. Канадскиот репрезентативец Дејвид, за Лил настапува од 2020.година кога за 27 милиони евра пристигна од екипата на Гент. Тој со францускиот клуб има договор до јуни 2025.година.

Дејвид одлично ја отвори новата сезона во Лил, каде постигна девет гола на 11 натпревари. Челзи ќе проба да го ангажира напаѓачот уште во зимскиот преоден рок.

22-годишниот Џонатан Дејвид на СП ќе ја предводи Канада, која е во група со Хрватска, Мароко и Белгија.

Напаѓачот на Рома, Тами Абрахам би можел да се врати во Англија во летниот преоден рок. Манчестер Јунајтед е заинтересиран за играчот. Тоа го пренесуваат медиумите на Островот.

Абрахам потекнува од школата на Челзи. Тој се пресели во италијанскиот тим во летото 2021 година за 40 милиони евра. Оваа сезона, на 13 натпревари од италијанското првенство и Лигата на Европа, напаѓачот постигна два гола и даде две асистенции. Договорот меѓу двете страни истекува во 2026 година.

Претходно беше објавено дека сините се заинтересирани за враќање на Абрахам, но овој трансфер ќе ги чини 80 милиони евра. Самиот фудбалер не исклучува дека ќе се врати во англиската Премиер лига во наредните сезони.

Бразилската фудбалска ѕвезда Нејмар се појави денеска во судот во Барселона по обвинение за наводна измама и корупција при неговиот трансфер од Сантос во Барселона во 2013 година.     

Покрај Нејмар, процесот се води и против неговите родители, поранешните претседатели на Барселона, Жозеп Бартомеу и Сандро Росел, како и поранешниот прв човек на Сантос, Одилио Родригез. Шпанското Обвинителство бара казна затвор од две години за Нејмар, како и парична казна од 10 милиони евра поради корупција. Случајот произлегува од тужба од бразилската компанија DIS, која поседуваше 40 отсто од правата на Нејмар додека бразилскиот репрезентативец настапуваше во Сантос. 

Компанијата тврди дека трансферот на Нејмар од Сантос во Барселона бил реализиран по значително пониска цена од реалната пазарна вредност на фудбалерот.

Напаѓачот на Њукасл Јунајтед, Александар Исак поради повреда ќе отсуствува од терените најмалку до средината на декември.

Репрезентативецот на Шведска минатата недела на тренинг со тимот на Њукасл ја влоши повредата која ја заработи минатиот месец и ќе отсуствува од фудбалските терени до крајот на Светското првенство во Катар.

Исак пристигна во Њукасл ова лето од Реал Сосиедад за сума од 60 милиони фунти, и одигра само три натпревари на кои постигна два гола.

Неговата Шведска не успеа да избори пласман на СП во Катар, па така Исак тој период ќе го искористи за опоравување од повредата.

Шпанскиот весник Ел Насионал ја пренесува информацијата дека Барселона има намера да го смени тренерот Чави Ернандез.

Причината за евентуалната смена се наведуваат слабите резултати на тимот, односно поразот во Ел Класико од Реал Мадрид со 3:1, и фактот дека Барса се наоѓа блиску до елиминација во Лигата на шампиони.

Според објавата од Весникот, претседателот на клубот Жоан Лапорта веќе има три кандидати кои би можеле да бидат замена за Чави. Прво име е Томас Тухел кој неодамна доби отказ од Челзи, потоа Марсело Гаљардо од Ривер Плата, а како трета и најмалку веројатна опција се споменува Јирген Клоп од Ливерпул кој има договор со клубот до 2026.година.