Женската фудбалска репрезентација на Англија оствари ретко висока победа на еден фудбалски натпревар. Англичанките ја совладаа репрезентацијата на Латвија со 20:0 во натпревар од квалификациите за учество на Светското фудбалско првенство во женска конкуренција.

Репрезентацијата на Англија на полувремето од натпреварот водеше со 8:0, а до крајот на мечот постигна уште 12 погодоци. Според статистиката, тие упатиле вкупно 120 удари кон голот на противникот, додека репрезентативките на Латвија не успеале да упатат ниту еден.

Англичанките имаат 6 победи од 6 натпревари во својата група, и гола разлика 53:0.

Алан Ширер, кој е легенда на Њукасл Јунајтед, изјави дека веќе не е сигурен во опстанокот на неговиот поранешен клуб во Премиер лигата.

Популарните „Чавки“ се единствена екипа која сеуште не забележала победа во оваа сезона од најсилната англиска лига и се наоѓаат на последното место од табелата со освоени седум бодови.

„Не сум уверен дека можат да опстанат во лигата. Нареден натпревар кој ги очекува е против Барнли и сега ќе се изнаслушаме дека тоа е меч кој мора да го добијат. Поминаа 14 натпревари без победа и што подолго тоа трае, ситуацијата станува многу потешка“, вели Ширер.

Њукасл веќе во сабота ја пречекува екипата на Барнли во рамките на 15. првенствено коло.

Карло Анчелоти откри како би гласал за „Златната топка“, доколку имеш можност тој да избира.

Вчера „Златната топка“ ја доби Лионел Меси, а Анчелоти нема дилема, за него најдобриот е Карим Бензема, кој во официјалниот избор заврши на четвртото место.

„Дали Меси е најдобриот? Јас сум во Реал Мадрид и би гласал само за моите играчи. За мене прв избор е Бензема, Винисисус на второ место, Куртоа на трето, па Каземиро, Крос, Камавинга итн. Секој има свое мислење кој е најдобар, јас го кажав моето: Карим. Меѓутоа Меси ја освои наградата и тој несомнено е голем фудбалер. За играчите индивидуалните награди за важни, тие се мотивација.  Но штом Бензема не ја освои, не ме интересира кој друг ќе ја добие“, додаде Италијанецот.

Серхио Рамос нема да настапи на денешниот натпревар на ПСЖ против Ница и покрај тоа што пред неколку дена дебитираше за клубот и е во добра форма, пренесуваат медиумите во Франција.

Нема информации за нова повреда на дефанзивецот, туку тој ќе паузира за да не се оптовари одеднаш. Шпанецот немаше играно од неговиот трансфер во летото, бидејќи имаше повреда. За денешниот натпревар во прашање е настапот и на Хуан Бернат и Лионел Меси. Вчера Аргентинецот се пожали на стомачни проблеми.

Леандро Паредес ја имаше истата болка како и освојувачот на Златната топка, но веќе е добро и треба да биде во составот на тимот.

Тренерот на Лацио, Маурисио Сари наскоро ќе стави потпис на нов договор со римскиот клуб до 2025 година, пренесува „Газета дело Спорт“.

Весникот тврди дека двете страни веќе постигнале договор и се очекува официјализација во следните денови.

Сари пред почетокот на сезоната пристигна во Лацио, но раководството е задоволно од неговата работа и сака долгорочно да го задржи 62-годишниот стратег.

Пред десет години Енди Керол го сруши рекордот за најскап англиски играч кога потпиша за Ливерпул за сума од 41 милион евра.

Очекувањата во Ливерпул од него беа да го наследи Фернандо Торес, меѓутоа кариерата на Керол од тогаш тргна во надолна линија и никогаш не ја врати старата форма.

Потпиша за Вест Хем каде што настапуваше до 2019 година, а потоа бесплатно се врати во Њукасл. Денес Керол е член на Рединг во Чемпионшип.

Медиумите во Англија открија дека Керол во Рединг сега заработува 1.000 фунти неделно. За споредба во Ливерпул имаше плата од 4.9 милиони евра годишно, додека во Вест Хем околу 5.5 милиони евра. Во последните две години во Њукасл заработи 9.2 милиони евра.

Фудбалскиот клуб Ливерпул официјално објави дека легендарниот поранешен голман,Клаудио Тафарел, се приклучува во тренерскиот тим на голманите во екипата.

55-годишниот поранешен светски шампион со Бразил, пристигна во клубот по препорака на првиот голман на тимот и негов сонародник, Алисон Бекер.  Тафарел освен во Ливерпул, ќе продолжи и со својата работа како голмански тренер во бразилската репрезентација.

Со своја изјава за ангажирањето на Клаудио Тафарел се јави и тренерот Клоп кој даде објаснување за направениот избор.

„Како голмани во нашиот тим ги имаме Алисон Бекер, кој за нас е најдобар во светот. Го имаме Келехер, кој е неверојатен, а исто така и Адријан, кој многупати ги покажал своите квалитети откако е со нас. Тука се и помладите Марсело Питалуга и Харви Дејвис, така што имаме пет голмани во различни возрасни групи, што е одлично. Сакаме да изградиме сопствена идеологија за голманите. Разговаравме со Алисон бидејќи двајца од најдобрите голмани во светот се Бразилци, па решивме да стапиме во контакт со Тафарел. Може да ни донесе поинаков поглед на голманската игра“, истакна Клоп.

Екипата на Барселона пројавува интерес за капитенот на Челзи, Цезар Аспиликуета.

Шпанскиот интернационалец е едно од имињата во списокот на Барса кој може да пристигне на Ноу Камп како слободен играч.

Аспиликуета кој игра на позицијата десен бек ја игра последната сезона од договорот со Челзи и во моментот нема намера да го продолжи истиот. Од Барселона се со мислење дека тој би бил одлично засилување за екипата со оглед на неговото огромно играчко искуство и можноста да игра на неколку различни позиции во тимот.

Кепа и понатаму е прва опција на Маурицио Сари за засилување на голманската позиција во екипата на Лацио оваа зима. Италијанскиот тренер сака повторно да работи со Баскиецот, но овој пат во Рим. Шпанскиот репрезентативец не навлегува во плановите на Тухел и неговото заминување се чини дека е најдоброто решение за сите страни.

Од Лондон знаат дека тешко ќе ги повратат вложените 80 милиони евра за голманот, па би го испратиле на позајмица во Лацио, но само доколку римјаните ја плаќаат 100% неговата плата.  Тоа сега е главен проблем за Лацио, како и вишокот на играчи на голманските места. Ако Кепа пристигне во Лацио, „орлите“ мора да се ослободат од еден од двајцата голмани (Пепе Реина и Томас Стракоша).

Кепа има плата од седум милиони евра во Челзи, која Лацио во моментов не е подготвен да ја плаќа. Затоа треба да се направат некакви отстапки од страна на лондончани за трансферот да стане реалност уште оваа зима.

Ралф Рангник сака во тимот да го види играчот од средниот ред на РБ Лајпциг, Амаду Хајдара, пишуваат медиумите во Манчестер.

Претставници на Манчестер Јунајтед ќе го следат 23-годишниот фудбалер на следните натпревари на Лајпциг со Унион Берлин во германското првенство и со Манчестер Сити во Лигата на шампионите. Англискиот клуб може да му предложи на Хајдара доовор уште оваа зима. Се знае дека износот на обештетувањето во неговиот договор е 40 милиони евра.

Ралф Рангник го иницираше трансферот на фудбалерот од Мали од РБ Салцбург во Лајпциг во 2018 година. Самиот Хајдара претходно призна дека сонува да игра за Манчестер Јунајтед. Оваа сезона Хајдара одигра 12 натпревари во германската Бундеслига и постигна 2 гола.