Шампионот на Премиер лигата, Манчестер Сити е заинтересиран ова лето да го доведе во своите редови 22-годишниот Деклан Рајс, во кого гледа долгорочна замена за бразилецот Фернандињо.

Според информациите од Англија, Сити бил многу блиску со испраќање на понуда до Вест Хем минатата сезона, но паднала одлука да му се понуди нов едногодишен договор на ветеранот Фернандињо.

Челзи и Манчестер Јунајтед се другите две екипи кои ќе водат битка со Сити за потписот на англискиот репрезентативец кој од Вест Хем е проценет на 100 милиони фунти.

Членот на Реал Мадрид и репрезентативец на Франција, Карим Бензема, го чека судски процес поради обвинението за изнуда на својот соиграч од репрезентацијата, Матие Валбуена.

Бензема, заедно со уште други четири лица наводно го уценувале Валбуена од кого барале 100 илјади евра ако не сака да објават видео со експлицитна содржина која има врска со него.

Судењето на Бензема започнува утре, и ако биде прогласен за виновен му се заканува казна затвор до 5 години.

Првите луѓе на Реал Мадрид не се задоволни од минутажата што ја добива Раниер Жезус во Борусија Дортмунд кој игра како позајмен фудбалер и затоа планираат да го испратат во друг клуб.

Според најавите од Шпанија, составот од Бундеслигата не  го почитува договорот меѓу двата клуба и му дава мала минутажа на Бразилецот.

Затоа „белите“ сакаат во јануари да го испрати напаѓачот во екипата на Бенфика. Наводно, направени се и првите контакти со луѓето од португалскиот состав.

Фудбалерот на Севиља, Кунде, добил понуда да замине во Челзи, но, челниците на шпанскиот состав ја одбиле со проценка дека понудената сума е премала за квалитетите што ги поседува нивниот играч.

„Понудата за Кунде беше одлична, најголема што сме ја добиле во нашата историја, меѓутоа, не се совпаѓаше со нашата поставена цена“, изјави спортскиот директор на Севилја, Мончи.

Кунде кој игра на позицијата стопер, според проценката на –„Трасфермаркт“ вреди околу 60 милиони евра.

Новите богати сопственици на Њукасл имаат за цел да го развијат клубот по моделот на Атлетико Мадрид и поради тоа нивна најголема желба е тренерот Диего Симеоне.

Токму поради тоа шеиците нема да жалат пари за да го донесат Симеоне на кормилото и тоа во „пакет“ со спортскиот директор на „јорганџиите“ Андреа Берта, открива „АС“.

Планот е прво да биде донесен Берта, кој веќе 9 години работи во Атлетико Мадрид, а Њукасл ќе му даде одврзани раце околу трансферите и огромен буџет.

Сопствениците на Њукасл се надеваат дека токму тој ќе биде човекот кој ќе го убеди Диего Симеоне да се пресели на „Сент Џејмс Парк“. Тоа воопшто нема да биде лесно бидејќи Аргентинецот во моментов е најплатен тренер во светот со околу 30 милиони евра по сезона.

Оле Гунар Солскјер сеуште ја има целосната поддршка од раководството на Манчесер Јунајтед и во моментов не се планира негова смена од клупата на “црвените ѓаволи“. Оваа информација ја сподели познатиот фудбалски новинар од Италија, Фабрицио Романо.

Сите во клубот се надеваат дека работите во тимот ќе се сменат на подобро и дека ќе следуваат подобри резултати во претстојните натпревари, но доколку продолжи негативниот тренд на слаби резултати позицијата на Солскјер во тимот ќе биде ставена на разгледување.

Според неколку различни медиуми од Англија, се издвојуваат две тренерски имиња кои евентуално би пристигнале на “Олд Трафорд“ како замена за Норвежанецот , а тоа се Антонио Конте и Зинедин Зидан. Двете прославени фудбалски и тренерски имиња сигурно нема лесно да ја одбијат понудата која би пристигнала од Манчестер Јунајтед и сигурно би започнале преговори за добивање на позицијата која во моментов ја извршува Солскјер.

Жоао Феликс побарал од раководството на клубот да биде продаден во следниот преоден рок. Португалецот падна во втор план кај Диего Симеоне откако пристигна Гризман, па неговата минутажа значително ќе се намали оваа сезона.

Феликс побарал од раководството да биде продаден, а веќе го известил агентот да му бара нов клуб.

Најсилен интерес за него покажуваат ПСЖ и Ливерпул. „Светците“ во него гледаат идеален наследник на Мбапе, кој е на излезна врата. „Јорганџиите“ за неговиот трансфер бараат 80 милиони евра, а двата клуба наводно се спремни да ја платат таа сума.

Актуелниот шампион во англиската Премиер лига, Манчестер Сити, е многу блиску до постигнување договор за продолжување на соработката со младата звезда на тимот, Фил Фоден.

Со новиот договор репрезентативецот на Англија би добил сериозно зголемување на платата, а истиот би бил со важност до 2027 година.

Се очекува Фил Фоден да ја прифати понудата и да стане еден од главните носители на играта кај Пеп Гвардиола.

Фудбалерот на римски Лацио, Сергеј Милинковиќ-Савиќ е најновото име кое се најде на радарот на Јирген Клоп и Ливерпул.

26-годишниот Србин, игра во одлична форма од стартот на сезоната со постигнати три гола и две асистенции на осум натпревари. Ливерпул во него гледа идеална замена за Џиџи Вајналдум кој летово како слободен играч ги напушти “црвените“ и потпиша за екипата на Париз Сен Жермен.

Меѓутоа за фудбалерот на Лацио се интересираат и голем број на други клубови, како Интер, Јувентус и Реал Мадрид, со што Ливерпул ќе наиде на голема конкуренција доколку се одлучи да тргне по негово доведување на “Енфилд“.

Постоечкиот договор на српскиот репрезентативец со Лацио истекува во 2024 година и клубот за евентуална продажба за него ќе бара околу 60 милиони фунти.