Ливерпул размислува да направи понуда за италијанскиот репрезентативец, Доменико Берарди.
26-годишното крило на Сасуоло се гледа како потенцијална замена за Мохамед Салах доколку Египќанецот биде продаден во текот на летово, наведува – „Газета дело Спорт“.
Берарди направи уште една силна сезона во Серија А, запиша 30 натпревари, во кои постигна 17 голови и имаше 8 асистенции. Тој е стандарден стартер во изборот на Роберто Манчини од почетокот на Европското првенство.
Милан го сака Јаремчук од Гент
Милан е во напредни преговори за трансфер на украинскиот напаѓач, Роман Јаремчук.
Напаѓачот на Гент блеска на ЕУРО и во првите два натпревари постигна два гола, меѓу кој и оној против Македонија.
Јаремчук оваа сезона во дресот на Гент постигна 23 гола и 8 асистенции, па е на мета на многу европски гиганти.
Украинецот го избрал Милан и веќе се договорил со клубот од „Сан Сиро“, а „росонерите“ за неговиот потпис ќе платат 15 милиони евра.
„Тоа е ужасна и грозна екипа која нема ништо!“
Славниот холандски играч за врска, Рафаел ван дер варт смета дека Шпанија е противник кој сите треба да го посакуваат на Европското првенство.
„Шпанија е ужасна и грозна. Се надевам дека ќе играме против неа. Оваа екипа нема ништо. Тие само одат од една страна на друга, немаат ниту играч кој може со еден потег да направи разлика.“ – вели 38-годишниот ван дер Варт.
Шпанија по две кола има два бода со гол разлика 1:1. Се наоѓа на третото место во групата во која се и Шведска, Словачка и Полска. И двата натпревари досега, Шпанија ги одигра во Севиља, а во среда играат против Словачка за пласман понатаму.
Ван дер Варт во кариерата играше за Ајакс, Хамбургер, Реал Мадрид, Тотенхем, Бетис, Мидтјиланд и Есбјерг. За репрезентацијата на Холандија, во 109 натпревари постигна 25 погодоци.
Бурак Јилмаз: Тотално потфрливме, им се извинуваме на фановите
Репрезентацијата на Турција се вбројува меѓу најголемите разочарувања на европското првенство откако во групата А ги загуби дуелите со Италија, Велс и Швајцарија и мораше да си ги спакува кyферите.
Капитенот, Бурак Јилмаз, вели дека неговата селекција го немала потребниот квалитет на мечевите одиграни во Рим и во Баку. За лошите изданија се свесни и во таборот на Турција.
„Не успеавме да се носиме со предизвикот на голем турнир. Играме добро во квалификациите за Светското, но,очигледно не сме подготвени за големи натпреварувања. Мора да учиме многу“ , истакна капитенот Бурак Јилмаз.
Норвешка одлучи да не го бојкотира СП во Катар
Норвешкиот фудбалски сојуз одржа седница на која членовите на сите фудбалски клубови во земјата ја изгласаа и потврдија одлуката да не се бојкотира Светското првенство во Катар 2022. година.
Право на глас имаа претставници од сите фудбалски клубови во државата, од првата до десеттата лига, а гласаа виртуелно. Отприлика една четвртина (121) од претставниците гласаа за бојкот, додека 368 гласаа против бојкотот.
Причина за покренување на ова прашање беше односот на Катар кон работниците кои работат на проектот и кон човековите права воопшто.
Многу од граѓаните на оваа нордиска земја веќе се изјаснија дека нема да го гледаат Светското првенство, а некои од клубовите ја повикаа репрезентацијата на бојкот.
Властите во Катар се бранат од обвинувањата за нехумани услови во кои работат градежниците, поголемиот број мигранти, со тврдења дека им се обезбедени „значајни бенефити“ во сместувањето, дека имаат едни од најдобрите услови за работници помеѓу земјите во регионот и дека секогаш се транспарентни во известувањето за нивната здравствена состојба.
УЕФА ја запре истрагата за траката на Нојер
УЕФА ја запре истрагата против Германскиот фудбалски сојуз, потврди самата куќа на германскиот фудбал.
За потсетување, германските медиуми дознаа дека УЕФА започна истрага против фудбалскиот сојуз на Германија поради потегот на Мануел Нојер, кој на натпреварот против Португалија носеше капитенска трака во боите на виножитото. о оглед на тоа што УЕФА забранува емитување на политички пораки, започната беше постапка како би се утврдило дали Нојер го прекршил правилото.
„Траката е симбол на разноликоста и претставува повисока цел.“ – стои, помеѓу останатото, во решението кое УЕФА го достави до Германскиот фудбалски сојуз.
УЕФА исто така започна постапка и против Унгарија, откако нејзините навивачи свиркаа кон францускиот напаѓач, Килијан Мбапе.
Двајца Англичани мораат во изолација
Двајца репрезентативци на Англија, Мејсон Маунт и Бен Чилвел, ќе мораат во самоизолација бидејќи беа во контакт со Били Гилмор, шкотскиот фудбалер кој е заразен со коронавирусот.
Маунт и Чилвел се соиграчи на Гилмор од Челзи и по натпреварот во саботата помеѓу Англија и Шкотска беа во близок контакт. Иако сите репрезентативци на Англија се негативни на коронавирусот, Маунт и Чилвел како мерка за претпазливост ќе одат во изолација, објави Англискиот фудбалски сојуз.
Тоа значи дека тие ќе го пропуштат натпреварот против Чешка.
За потсетување, ниту еден репрезентативец на Шкотска не оди во изолација и покрај позитивниот тест на Гилмор.
Кејн останува незаменлив
Селекторот на фудбалската репрезентација на Англија, Герет Саутгејлт изјави дека капитенот Хари Кејн ќе го задржи местото во тимот против Чешка, во последното коло од групата „Д“ на Европското првенство.
„Кејн не е само од суштинска важност поради головите кои ги постигнува, туку и за играта и се друго што донесува.“ – наведе Саутгејт.
Тој за Кејн вели дека е „најважниот играч на неговата екипа“.
„Само треба да се погледне колку погодоци постигна до сега и да се сфати колку е важен за екипата.“ – додава селекторот.
Англија утревечер игра против Чешка на Вембли, а во исто време во Глазгов играат Хрватска и Шкотска.
На табелата во оваа група Чешка и Англија се водечки со по четири бода, а Хрватска и Шкотска имаат по бод.
Пандев: Нема да се премислам, ова е крај и најдобро е вака
Натпреварот со Холандија беше посебен за нашата репрезентација, но пред се за нашиот најдобар фудбалер Горан Пандев кој гоодигра последниот натпревар во дресот на нашата селекција.
„Возбуден сум и благодарен за цела Македонија. 20 години носење на овој дрес беше посебна чест и гордост. Одигравме добро ЕП, но ни фалеше тоа искуство. Ни фалеше многу малку, за да направиме добар резултат. Вечно ќе се сеќаваме на овие денови. Што се однесува до оној старт на Блинд, добив удар, но Холандија е фаворит и домаќин и нормално судиите да се наклонети кон неа. Ние и на овој меч го дадовме максимумот, имавме два поништени гола, статива и уште неколку шанси. Но во вториот дел паднавме физички, а Холандија го искористи тоа затоа што играат во ист ритам 90 минути. Нема простор за враќање. На 38 години да играм на два фронта е претешко. Ќе навивам за овие момци и убеден сум дека ќе обезбедат пласман на СП“, рече Пандев по натпреварот со Холандија.
Ангеловски: Заминувам на крајот од месецот, благодарност до сите
Селекторот на нашата репрезентација Игор Ангеловски по натпреварот со Холандија на прес-конфернцијата даде своја кратка анализа за настапот на нашата репрезентација на ЕП.
„Кога ќе се намалат емоциите ќе дадеме генерална оценка. Можам само да кажам дека беше задоволство да се води Македонија на Европско првенство и заедно со навивачите да се преставиме на Европа. Не треба да бидеме разочарани, ние го пробибавме „мразот“ и одигравме добро иако не освоивме бодови. Сакам да искажам благодарност до мојот стручен штаб и медицинскиот персонал, на фудбалерите, предводени од Горан Пандев, вам новинарите и на крај на моето семејство. Ова се моменти кои ќе ги паметам цел живот. Неблагодарно е сега да ги делам фудбалерите, кој задоволил, а кој не. Ова се моменти кои цел живот ќе ги паметаме сите ние кои бевме дел од сето ова. Мојот договор завршува, ова е моја последна прес-конференција и моја последна активност со федерацијата, со оглед на тоа што договорот ми истекува на 31 јуни“, изјави Игор Ангеловски.
