Тренерот на Мајк Тајсон, Рафаел Кордеиро зборуваше за времето на можно враќање на боксерот во рингот.
„Продолжуваме со тренинзи. Тој е спортист и секогаш вежба, работи на нозе во фитнес центар. Мислам дека ќе имаме нешто во септември. Не знам кои ќе бидат ривали, бидејќи неговата компанија „Legends Only League“ работи на тоа. Таа преговара за договор со ТВ – само тие можат да го објават распоредот, а ние тренираме. Ќе се бориме во септември“, рече Кордеиро.
Во ноември 2020 година, Тајсон имаше дуел со Рој Џонс јуниор.
„Лудакот“ кој промени 31 клуб се опрости од фудбалот
Фудбалерот кој во својата кариера играше за рекорден 31 клуб, уругвајскиот напаѓач Себастијан „Локо“ Абреу, стави крај на својата кариера во 44. година.
„Стигна и денот кога, за промена, јас давам отказ.“ – коментираше Абреу, кој по бројот на клубови за кои играл доби место и во Гинисовата книга на рекорди.
Последниот натпревар го одигра во петокот за екипата на Суд Америка во уругвајското првенство, а веќе планира да продолжи со тренерска кариера, која ја започна во Ел Салвадор, со Санта Текла, и во Уругвај со Бостон Ривер.
Абреу играше во десет земји низ светот, но неговите клубови воглавно беа јужноамерички, започнувајќи од Дефенсор, каде ја започна кариерата, па уругвајските Насионал, Централ Еспањола, Бостон Ривер и Америка.
Тука се и три аргентински клубови – Сан Лоренцо, Ривер Плата и Росарио Централ, како и шест бразилски клубови – Гремио, Ботафого, Фигуеренсе, Бангу, Рио Бранко и Атлетик Клуб, додека во Европа играше за два шпански клубови – Депортиво Ла Коруња и Реал Сосиедад.
Патувањата го одведоа „глоубтротерот“ Абреу и во Мексико, каде играше за Текос де Гвадалахара, Круз Азул, Америка, Дорадос де Синаола, Сан Луис и Тигрес.
Да ја заокружи својата фудбалска култура, Абреу ги бранеше и боите на Беитар Ерусалим, Арис, еквадорски Аукас, парагвајски Сол де Америка, Санта Текла од Ел Салвадор, како и чилеанските клубови Депорте Пуерто Монт, Аудакс Италијано и Депортес Магаланеш.
Како Франција ги прекрши правилата поради Ѓоковиќ и Надал (видео)
Видовме бизарни сцени во четвртифиналето на Роланд Гарос во текот на мечот помеѓу Ѓоковиќ и Беретини. Ѓоковиќ славеше со 3:1 и така избори полуфинале со Надал, но необична ситуација се случи во четвртиот сет, кога судијата го прекина мечот откако навивачите на трибините одбија да го напуштат стадионот.
Причина поради која организаторите бараа празнење на трибините е полицискиот час, кој во Париз поради пандемијата на коронавирусот стапува на сила од 23 часот.
Половина час пред стапувањето на полицискиот час, службениот спикер побара од гледачите да ги напуштат трибините, на што тие одговорија со песна. Ни по десетина минути не сакаа да заминат, па мечот беше прекинат во 22.47 часот, додека трибините не се испразнат.
Полицискиот час во Париз стапи на сила, но синоќа во текот на полуфиналето помеѓу Ѓоковиќ и Надал организаторите сепак се одлучија да „замижат“ и да ги прекршат правилата и законите. Одлучија да ги задржат гледачите на трибините, како до крај би можеле да уживаат во еден од најголемите тениски натпревари на земја одигран било кога.
Во моментот кога еден од главните лица на Роланд Гарос прогласи дека нема да мораат да заминат навивачите, низ целиот стадион се слушна громогласно воодушевување.
Копа Америка доби „зелено светло“, турнирот започнува в недела
Врховниот суд на Бразил донесе едногласна одлука дека оваа латиноамериканска држава, и покрај пандемијата на коронавирус, може да биде домаќин на јужноамериканското фудбалско првенство, Копа Америка, што започнува в недела.
Сите 11 членови на Врховниот суд се согласија дека локалните власти на четирите бразилски сојузни држави во кои треба да се играат натпреварите самите можат да одлучат дали ќе бидат домаќини на турнирот. Со оглед дека гувернерите на тие четири држави се сојузници на шефот на државата Жаир Балсонаро, кој се заложи за преселување на Копа Америка од Аргентина и Колумбија во Бразил, одржувањето на турнирот на бразилска почва е повеќе од извесно. Со оваа одлука, Врховниот суд го отфрли предлогот на Бразилската социјалистичка партија и синдикатот на металците, кои бараа забрана за одржување на Копа Америка поради страв од ширење на коронавирусот.
Бразил во средата регистрираше 2.693 смртни случаи поврзани со заразниот вирус што е највисока дневна бројка од 5 мај.
Првиот натпревар на ЕП сруши три рекорди!
Италија ја победи Турција со 3:0 во првиот натпревар, што е прв пат во историјата на оваа земја да постигне три гола на еден натпревар на Европското првенство од првото учество во 1968 година.
Освен италијанскиот рекорд, победата од 3:0 на отворањето на Европското првенство е најубедливата победа досега забележана на првите натпревари на овој турнир.
Вториот и третиот погодок за Италија ги постигнаа Имобиле и Инсиње, додека првиот погодок беше дело на стоперот на турската репрезентација Мерих Демирал, кој на тој начин влезе во историјата, но на негативен начин.
Имено, ова е исто така прв пат во историјата првиот гол на Европско првенство да биде автогол.
Сејдини: Самоуверена, моќна, храбра, оптимистична. Ваква Македонија сакаме. Момци, со среќа.
Претседателот на фудбалската федерација на Македонија испрати порака до фудбалерите пред првиот натпревар на Европското првенство, кој нашите фудбалери го играат утре против Австрија.
„А, таква беше годината. Некои ќе кажат неправедна, за македонскиот фудбал историска.
Некои ќе кажат тажна, за македонскиот фудбал величествена. За некои ужасна и трагична, за македонскиот фудбал неповторлива. За повеќето од нас, година на борба. За македонскиот фудбал година на гордост и слава. На заедништво.
Некои приказни едноставно подобро се раскажуваат ако започнеме од крајот! Победивме бидејќи си рековме себеси дека сме победници.Македонската фудбалска репрезентација се пласираше на Европското првенство. Бидете горди. Затоа што ова е време кога македонските фудбалски великани одат по земја.
Никогаш досега македонскиот фудбал не доживеал таква експлозија. Тие емоции од Грузија со ништо дотогаш не можат да се споредат. Беа искрени и едноставно доаѓаа од целата наша држава како реакција на сѐ она што во годините наназад ни се случуваше во фудбалот.
Таа колективна екстаза и во време на здравствена епидемија доведе до тоа на скопските улици за прв пат да се скандираат имињата на македонските фудбалери.
Во ова наше општество на невозможни институции и Македонци и Албанци и Турци и Роми се обединети кога е во прашање фудбалската репрезентација. Тоа треба да ни биде пример за начинот на кои сите треба да се однесуваме. Во победа или пораз – таква Македонија сакаме. И не само фудбалска.
Никогаш не сме биле Европски прваци. Но, никогаш во своите глави не сме биле поблизу до тоа чувство од овие денови пред Европското првенство. И што и да се случи, ова чувство и оваа наша моќ никој не може да ни ја одземе. Ниту оваа фудбалска Македонија. Самоуверена. Моќна. Храбра. Оптимистична. Ова е победа за сите кои барем еднаш во животот го облекле дресот на Македонија. И сите имаат заслуга за овој историски момент. Од првиот до последниот.
Како Фудбалска федерација на Македонија сме сигурни дека фудбалерите и на натпреварите од Европското првенство ќе дадат се од себе за да го вивнат македонскиот фудбал во нови височини и одново да покажат дека припаѓаме меѓу најдобрите во Европа.
А, ние ќе бидеме заедно со нив и заедно со многубројните фанови и целокупната јавност и од срце ќе ги бодриме. Истовремено веруваме, се надеваме и посакуваме дека нашите фудбалери со својата игра и залагање ќе не исполнат со радост и гордост. Ние сме мала држава, но имаме големи соништа. Столе, Ристе, Дамјан, Висар, Егзон, Кире, Стефан, Дарко, Ѓоко, Езџан, Енис, Аријан, Бобан, Стефан, Елиф, Тихо, Даниел, Марјан, Ферхан, Дарко, Горан, Иван, Милан, Аце, Крсте, Влатко…уживајте, давајте се од себе, па што биде. Напред Македонија!“ – стои во пораката.
Делегирани шведски судии за натпреварот Австрија – Македонија
Шведскиот арбитар Андреас Екберг ќе ја дели правдата на дуелот Македонија – Австрија, кое ќе претставува деби за нашата селекција на Европските првенства. Швеѓанецот со знакот на ФИФА е од 2013 година и еден од поискусните арбитри на Европско првенство. Асистенти на Екберг ќе му бидат сонародниците Мехмет Кулум и Штефан Халберг, а четврти судија ќе биде Русинот Сергеј Карашев. За сомнителните одлуки во ВАР собрата ќе биде Германецот Бастијан Данкерт.
На вториот меч од нашата група, дуелот меѓу Холандија и Украина, главен судија ќе биде Феликс Брих од Германија.
Македонија со Австрија игра в недела, со почеток во 18:00 часот.
Бонучи откри зошто Италија беше толку доминантна
Италија одлично го отвори Европското првенство, откако ја совлада Турција во Рим и ја оправда улогата на прв фаворит во групата. Натпреварот беше во еден правец од самиот почеток, а одличен беше Леонардо Бонучи, 34-годишниот дефанзивец на Јувентус.
„Кога започнувате ваква авантура, требате некаква тензија, треба да ви поминат морници низ телото, желба да изгорите. Точно замислив дека ќе бидеме вакви поради патот по кој поминавме за да дојдеме до овде.“ – рече Бонучи за Скај Спортс, па објасни:
„Ова е само првиот чекор на долгото патување. Сега ќе биде се потешко, бидејќи противниците ќе не запознаат и добро ќе се подготват за нас. Цврсто стоиме на земја. Рековме во соблекувалната дека ќе бидеме со ладни глави и жешки срца.“
На крајот, откри и што беше главниот мотив.
„Кога навивачите се на трибините, тогаш е нешто сосема поразлично. Тоа е различен фудбал, тие не носат во текот на сите 90 минути и сме многу подобри.“ – заклучи Бонучи.
Италија во наредното коло ќе игра со Швајцарија, додека Турција шансата за поправен испит ќе ја бара против Велс.
Бразилецот Емерсон е сонот на Интер ако Хакими си замине
Интер започнал преговори со десниот бек на Барселона, Емерсон Ројал. Барселона минатото лето го купи Емерсон од Атлетико Минеиро за 12 милиони евра и го испрати на позајмица во Бетис.
21-годишниот Бразилец со своите настапи во Примера го привлече вниманието на многу европски гиганти, а најсериозен интерес покажува Интер. Барселона пред неколку дена доплати 9 милиони евра на Бетис за останатите 50% од правата на играчот и го претстави Емерсон како ново засилување.
Интер бара замена за Хакими кој сигурно ќе биде продаден и прва желба е токму Емерсон Ројал, а неговите агенти денес беа на преговори во Милано.
Погба пред дилема и ултиматум во Јунајтед
Првите луѓе на фудбалскиот состав, Манчестер Јунајтед, започна преговори со претставниците на Пол Погба за продолжување на соработката, пренесува денеска – „Скај Спорт“.
Французинот допрва треба да ја одработи последната сезона откако „црвените ѓаволи“ пред неколку месеци ја активираа клаузулата од договорот, но, тоа е условно.
Имено, доколку неговиот агент, Мино Раиола, не даде зелено светло за продолжување на соработката, тогаш англичаните веднаш ќе го стават Погба на трансфер листата во текот на летово.
