Францускиот шампион Париз Сен Жермен официјално го потврди заминувањето на Анхел Ди Марија.

Ди Марија му се приклучи на ПСЖ во 2015 година и успеа да постигне 91 гол на 294 натпревари за клубот во сите натпреварувања.

Аргентинецот во последните неколку недели силно се поврзува со трансфер во Јувентус.

Фудбалерот на премиерлигашот Тотенхем, Сон, во последното коло од Премиер лигата ќе има историска шанса да стане првиот фудбалер од Азија, кој би можел да биде најдобар стрелец во англискиот шамионат.

Имено, репрезентативецот на Јужна Кореја, во моментот има постигнато 22 гола и пред одигрувањето на последното коло заостанува само еден гол зад Мо Салах од Ливерпул.

Предноста на Сон пред одигрувањето на последниот напревар од сезоната е фактот што Салах е повреден и нема да настапи за Ливерпул против Вулверхемптон.

Тотенхем во последното коло гостува кај Норвич, и со еден бод го обезбедува местото во Лигата на шампионите.

Менаџерот на Челsи, Томас Тухел, изјави дека третото место во Премиер лигата е „чудо“, со оглед на тоа што најголемиот дел од сезоната играа без Н’Голо Канте. Французинот синоќа го забележа само 20-от натпревар во кампањата во нерешениот резултат 1-1 против Лестер – резултат кој практично и го гарантира третото место на тимот пред последниот натпревар против испаднатиот Ватфорд во недела.

„Мислам дека тој е нашиот клучен, клучен, клучен играч. Таквите играчи мора да бидат на теренот, а одигра само 40 проценти од натпреварите, па можеби е чудо што завршивме третопласирани. Тој е нашиот Мохамед Салах, тој е нашиот Вирџил ван Дајк, тој е нашиот Кевин Де Бруин, тој е нашиот Нејмар, тој е нашиот Килијан Мбапе“, додаде менаџерот.

Фудбалската легенда на Рома, Франческо Тоти, во изјава за медиумите вели дека ќе се обиде да го убеди Пауло Дибала, да го замени неговиот сега веќе бивш клуб Јувентус со Рома.

Иако повеќе европски тимови се заинтересирани за трансфер на Дибала, Тоти е на мислење дека постојат изгледни шанси Аргентинецот да го облече дресот на Рома.

„Планирам разговор со Дибала во понеделник, и после тоа ќе видиме дали ќе го донесам во Рим. Ќе пробам да го убедам кога ќе се сретнам со него на добротворнниот натпревар организиран од Самуел Ето во Милано“, вели Тоти.

Италијанскиот весник Газета дело Спорт тврди дека Пол Погба се договорил со Јувентус и се враќа во гигантот од Торино.

Според информациите, Погба со новиот договор ќе заработува годишна плата од 10 милиони евра, а ќе остане во Јувентус во наредните три години.

Погба наводно одбил продолжување на договорот со Манчестер Јунајтед, бидејќи веќе подолг период посакува враќање во Јувентус каде претходно настапуваше од 2012 до 2016 година. Французинот од јуни е слободен играч и за него нема потреба од плаќање на обештетување.

Атлетико Минеиро го победи Индепендиенте дел Вале со 3-1 и постави нов рекорд за натпревари без пораз во Копа Либертадорес. Победата ја продолжи нивната серија на 18 натпревари, најдолга во 62-годишната историја на турнирот.

Хулк постигнуваше по еден гол на почетокот на секое полувреме, а иако Вилијам Андрес Варгас Леон врати еден гол за шампионот на Еквадор на осум минути пред крајот, Савио ја врати предноста на Атлетико од два гола во додаденото време.

Головите на Хулк беа негови осми и деветти во Либертадорес и го ставија на второто место на вечната листа на Атлетико на сите времиња. Тој има два гола помалку од Џо, кој постигна многу од неговите голови во 2013 година, годината кога Атлетико прв и единствен пат го освои турнирот.

Атлетико е лидер во поредокот во групата Д и предвреме се квалификува за осминафиналето на турнирот.

Само неколку часа после изненадувачката вест дека Борусија Дортмунд му даде отказ на тренерот Марко Розе, се чини дека познатите „милионери“ ја пронајдоа неговата замена за клупата.

Клубот веќе остварил контакт со Един Терзиќ, и најверојатно тој ќе биде новиот тренер на екипата. Терзиќ веќе еднаш го водеше Дортмунд и тоа во сезоната 2020-2021, кога го замени Лусиен Фавре.

Тренерот со босанско потекло, во својот претходен мандат со Борусија Дортмунд, успеа да го освои Купот на Германија и го одведе тимот во Лигата на шампионите.

Роналд Куман најави дека нема да тренира ниту една друга екипа. 

Откако во ноември минатата година ja заврши епизодата на клупата на Барселона која траеше речиси една и пол година, Куман најави дека повеќе нема да биде клупски тренер.

„Го исполнив својот сон – да бидам тренер на Барса. Нема повеќе да водам друг клуб, сега ќе се посветам на холандската репрезентација“, изјави Куман.

Куман ја напушти клупата на репрезентацијата поради Барселона. Сепак, Фудбалскиот сојуз на оваа земја реши повторно да го ангажира, а по Мундијалот во Катар ќе го преземе тимот од легендарниот Луј Ван Гал.