Андре Силва игра фантастично во дресот на Ајнтрахт Франкфурт и го привлече вниманието на многу европски гиганти. Како што пренесуваат италијанските медиуми, Португалецот ќе биде примарна цел на Јувентус следното лето. Андре Силва блеска оваа сезона во дресот на Ајнтрахт и веќе има постигнато 19 гола на 22 меча. Португалецот минатото лето пристигна во Ајнтрахт од Милан во трампа со Анте Ребиќ, па би можел да се врати во Серија А.

Барселона на Камп Ноу ремизираше со Кадиз со резуптат 1:1 во рамки на 24. коло од Примера, а за новиот кикс многу навивачи на Барселона го обвинија дефанзивеот Клемен Ленгле. Французинот во 89. минута направи пенал од кој Фернандез постигна погодок за конечни 1:1, но по натпреварот доби и низа навреди на социјалните мрежи. Тоа не му беше прва грешка сезонава, па се погласно се зборува за тоа дека ќе го загуби местото во стартните 11 на Барселона. Последниот кикс го дочека тешко, па на излезот од стадионот не можеше да ги сокрие солзите. Навивачите на Барселона кои се наоѓаа пред стадионот снимија видео на кое може да се забележи Ленгле како во солзи го напушта Камп Ноу.

Aндре Виљаш Боаш одлучи да поднесе оставка на клупата на Марсеј откако доведе играч кој тој не го сакаше. Португалскиот стратег на почетокот на овој месец соопшти дека си поднесувао ставка затоа што во последниот ден од преодниот рок го довел Оливер Начман од Селтик, играч за кој тој сметал дека не му е потребен. Откако Начман бил претставен за нов фудбалер Виљаш Боаш одлучи да си замине. Челниците на Марсеј сакаа да го доведат Маруцио Сари за нов тренер, но тој ја одби нудата на овој клуб. Сега е објавено дека Марсеј веќе ја завршил работата и нов тренер на францускиот клуб ќе биде Хорхе Сампаоли. Сампаоли ќе потпише договор до летото 2023 година.

Мексичкиот судија Оскар Масиас стана вирален хит откако на натпревар од првата фудбалска лига спаси чист гол. Круз Азул во 36. минута водеше со 2:0 против Толука и домаќините имаа прилика да го решат натпреварот. Напаѓачот на Круз Азул го заобиколи голманот и шутираше кон празниот гол, но ја погоди стативата. На одбиената топка натрча негов соиграч и ја упати кон празната мрежа, но гостите ги спасуваше – судијата! Тој следејќи ја акцијата се најде точно на патот на топката, таа го погоди и од него се одби во гол- аут. Играчите на Круз Азул со неверување гледаа што се случи и му објаснуваа на Масиас дека спаси чист гол. Судијата „мртов ладен“ се правеше како ништо да не се случи и, согласно правилата, им ја врати топката на домаќините. Да биде уште полошо, гостите намалија во 44. минута на 2:1, а во втората минута од судиското продолжение на првото полувреме израмнија на 2:2. Сепак, Масиас го „спаси“ Гиљермо Фернандез, кој во 63. минута постигна гол за победа на Круз Азул.

Капитенот на Ливерпул, Џордан Хендерсон по направените детални прегледи ќе дознае колку долго ќе отсуствува од терените поради повреда која ја заработи на градското дерби против Евертон. Капитенот на актуелниот шампион на Англија го напушти теренот по само 30 минути игра со болна гримаса на лицето. Јасно е дека се работи за отсуство од терените од неколку недели, а клучно прашање е дали Клоп ќе може да смета на Хендерсон за реванш натпреварот од осминафиналето во Лигата на шампионите против Лајпциг. Поволно е тоа што „црвените“ ќе го дочекаат овој дуел со предност од 2:0 од првиот натпревар, па и во случај на евентуално отсуство на репрезентативецот на Англија, имаат на што да се надеваат. По првиот пораз од Евертон уште од 1999. година, Клоп призна дека медицинскиот тим не е оптимист по повредата на Хендерсон, а веќе сега може да се потврди дека нема да настапи на натпреварите против Шефилд, Челзи, Фулам и Вулверхемптон.

Играчот за врска на Реал Мадрид, Касемиро, кој го постигна единствениот гол на натпреварот од 24-то коло во шпанската Примера против Ваљадолид кој го доби Реал со 1:0, изјави дека е убеден во тоа дека тимот ќе бори за титулата во Примера. „Веруваме дека ќе се бориме за титулата до крај и знаеме дека секој натпревар е важен. Треба да се бориме за 42 поени, што е многу. Екипата знае дека е тешко, но ние веруваме дека сме во трка за шампионската титула“, изјави Касемиро по вчерашниот натпревар. Реал Мадрид има освоено 52 поени по 24 кола од Ла Лига и го зазема второто место на табелата зад лидерот Атлетико Мадрид кој има 55, но имаат натпревар помалку.

Овогодинешниот фудбалски Европски шампионат е се поблиску. Требаше да биде одигран минатата година, но поради пандемијата беше одложен за годинава. Требаше да се игра во дванаесет држави ширум стариот континент, но се чини дека и таа идеја ќе биде отфрлена. Натпреварувањето е планирано за периодот од 11. јуни до 11. јули, а како што се чини сите натпревари ќе бидат одиграни во Велика Британија. Владата на Британија наводно веќе испратила предлог за организација на натпреварувањето, меѓу плановите се наоѓа и точка дека ќе има и навивачи на стадионите, а бројката на посетители ќе се движи околу четири илјади. Останува да видиме како ќе одговори УЕФА, а „Вембли“ секако беше планиран за едно полуфинале и големото финале.

После повеќе од една година, Интер конечно го доби своето засилување. Ериксен успеа да се избори за место во тимот, а лидерот на Серија А сега го има „вистинскиот“ дански репрезентативец. Тоа го сигнализираше и Конте кога го замени во финишот на натпреварот против Милан, после кој Интер му побегна на ривалот на табелата на четири бодови разлика.
Медиумите го пренесуваат сјајниот гест на тренерот на Интер, кој во текот на замената му рече на Ериксен: „Ти си мој човек, знаев дека нема да ме изневериш“, по што го прегрна данецот кој година дена го чуваше на клупата. Ериксен успеа да се избори за место во екипата, сега е незаменлив, а од играч кој беше на продажба летото и оваа зима, стана главен архитект во нападот на Интер.
Сигурно е дека Интер сега е голем фаворит за титулата, подобра шанса не веруваме дека би имале, иако не е готово, Јувентус никогаш не смее да биде отпишан. Доколку шампионот вечерва го добие Кротоне, ќе биде на -8, но со натпревар помалку. Сепак, иако Интер оди во Торино, делуваат како да се подобар тим оваа сезона, а плус на тоа немаат никакви обврски освен првенството.

Менаџерот на Манчестер Јунајтед, Соскјер е спремен на лето да продаде еден од двајцата голмани кои се борат за стартното место во тимот, пренесуваат медиумите на Островот.
Давид де хеа и Дин Хендерсон се двајца одлични голмани, но еден од нив на лето може да биде продаден, а фаворит е Шпанецот.
Хендерсон не сака да биде резерва, а Манчестер Јунајтед не сака да го загуби Англичанецот бидејќи смета дека може да биде иднина на тимот од „Олд Трафорд“.
Де хеа во последните две сезони не е на своето најдобро ниво, тој е еден од најплатените играчи во тимот, па поради тоа најверојатно ќе биде продаден.