Париз Сен Жермен во првиот натпревар од осминафиналето на Лигата на шампионите ја „прегази“ Барселона со 1:4. Јунак на натпреварот е Килијан Мбапе, францускиот напаѓач кој беше незапирлив за одбраната на домашната екипа. Мбапе постигна три од четирите погодоци за францускиот шампион. Со тоа, Мбапе стана само третиот играч кој против Барселона постигнал хет-трик на Камп Ноу, по Фаустин Асприља и Андреј Шевченко. И двајцата тоа го направија во 1997. година, Асприља во дресот на Њукасл, а Шевченко за киевски Динамо. Мбапе стана и првиот фудбалер кој на стадионот на Барселона во нокаут фаза на Лигата на шампионите постигнал два или повеќе погодоци, а неговиот ПСЖ е првата екипа која славеше во на Камп Ноу во елиминационен натпревар по Баерн во 2013. година.

Ашраф Хакими би можел на лето да го напушти клубот и да се врати во Реал Мадрид. Како што пренесуваат шпанските медиуми Интер се уште не почнал да му ги плаќа ратите на Реал Мадрид за трансферот на Хакими вреден 45 милиони евра. Последниот рок кој го поставија „кралевите“ истекува на 31 март, па постои шанса доколку Интер не ја уплати првата рата да биде во голем проблем. Не само што Хакими ќе биде вратен во Мадрид по завршувањето на сезоната, туку и Интер да биде казнет од УЕФА за не завршување на своите обврски кон други клубови.

Суперталентираниот фудбалер на Работнички, Лука Станковски, од јуни кариерата ќе ја продолжи во Италија. Негов следен клуб ќе биде Монца. Раководствата на двата клуба ги договорија сите детали за трансферот што треба да се случи во летниот преоден рок. „Горди сме што може да објавиме дека еден од најталентираните македонски фудбалери Лука Станковски од јуни кариерата ќе ја продолжи во италијанскиот клуб Монца. Двата клуба ги договорија деталите за трансферот што треба да се реализира во летниот преоден рок. Можам да кажам дека имаше многу понуди за Лука Станковски, но донесовме заедничка одлука со фудбалерот и со неговите родители, Монца да биде идниот клуб, каде ќе продолжи да се развива и да се надградува. Среќни сме што Работнички успешно ја продолжува стратегијата за реализација на трансфери на млади и талентирани фудбалери во странство и горди што во еден исклучително тежок период на глобална пандемија на коронавирусот, Работнички оствари два трансфери, Давид Тошевски во Ростов и Лука Станковски во Монца“, изјави претседателот Драган Поповски. Лука Станковски до крајот на сезоната ќе го носи дресот на Работнички, а потоа ќе биде промовиран во редовите на Монца. Тој во првиот дел од сезоната постигна седум гола и беше четврти стрелец во првенството на Македонија.

Милан е силно заинтересиран за ѕвездата на Порто, Отавио. Бразилецот на крајот на сезоната ќе биде слободен агент, а веќе одби да го продолжи договорот со Порто. „Скај Италија“ пренесува дека Милан веќе стапил во конаткт со неговиот агент и испратил понуда за четиригодишен договор тежок 1,5 милиони евра по сезона. Весникот „А Бола“ тврди дека големи се шансите Отавио на лето да се пресели во Серија А, каде покрај Милан интерес за играчот покажуваат уште Рома и Јувентус.

Македонската фудбалска репрезентација на домашен терен во Скопје, против селекцијата на Словенија ќе ја одигра последната тест средба, пред почетокот на Европското првенство. „Црвено жолтите“ генералката ќе ја одиграат на 29 мај, а според сите очекувања до тогаш ќе треба да биде дозволен ограничен број на публика на стадионите за испраќање како што и доликува на репрезентацијата на ЕП. Македонија во Романија ќе се пресели на 8 јуни, а пет дена подоцна ќе го одигра дебитанскиот натпревар на континенталните собири. Прв ривал на Македонија е селекцијата на Австрија. Покрај австриската селекција противници на Македонија во групата и се репрезентациите на Украина и Холандија.

Динамо Загреб го доведе талентираниот играч на ПСВ, Џастин Де Хас. Станува збор за играч кој е капитен за тимот до 21 година на ПСВ, игра како стопер, но по потреба може да покрива и на левата бековска позиција. Договорот на Де Гас истекува ова лето и ако левоногиот стопер се докаже на „Максимир“ би можел да дојде бесплатно. Според „Трансфермарк“ неговата вредност во овој момент е 350.000 евра. Наводно Динамо се договорил во последните моменти од зимскиот преоден рок кој во Хрватска заврши вчера.

Вирџил ван Дајк се врати во базата на тимот за да го продолжи закрепнувањето.
Познато е дека тој страдаше од сериозна повреда на коленото која ја заработи на дербито со Евертон на 17 октомври 2020 година. Холанѓанецот ги помина последните два месеци во Дубаи, каде што беше подложен на разни процедури за рехабилитација. Сега, сепак, тој ќе го продолжи закрепнувањето во Англија.
Ван Дајк веќе е во Ливерпул и дури го одржа првиот лесен тренинг во новиот Центар за тренинг. Тој направи џогирање, а потоа вежбаше во теретана.
Во наредните недели Ван Дајк ќе продолжи со тренинзи со тренерите на Ливерпул. За него е направен посебен режим за обновување, на кој ќе продолжи да работи се додека не се опорави целосно и не биде подготвен за игра.

Претседателот на Управниот одбор на Баерн Минхен, Карл-Хајнц Румениге зборуваше за можна промена во форматот на Лигата на шампионите.
„Новата Лига на шампиони ќе биде многу позабавна и пожива од тековната групна фаза, која често е здодевна во последните кола. Moже да биде потешко да се стигне до плејофот. Кога станува збор за националните шампионати, тие секогаш ќе бидат многу ценети. Новата Лига на шампиони е само глазура на тортата, но вредноста на шампионатите нема да се промени. За италијанскиот навивач секогаш е важно како ќе заврши дербито на Милано или натпреварот со Јувентус“, вели Румениге.
Планирано е со новиот формат на Лигата на шампионите, екипите да не бидат поделени во групи, а турнирот да се одржи според швајцарскиот систем. Клубовите ќе одиграат најмалку 10 натпревари со различни противници (5 дома и 5 на гости). Можно е бројот на учесници во главната рунда да се зголеми од 32 на 36. Беше објавено дека сите асоцијации на УЕФА се согласуваат со новиот формат.

Конечно дочекавме. По цели два месеци продолжуваат возбудувањата во Лигата на шампионите, а по скоро четири години повторно играат Барселона и ПСЖ. Сите добро се сеќаваме на тој 8. март и најголемиот пресврт во овој век, тие 6:1 на Барса, по 0:4 во Париз. Вечерва ПСЖ повторно е на Камп Ноу, без Нејмар и Ди Марија, а каталонците мечот ќе го дочекаат во најдобра форма сезонава, запишувајќи победа во последните седум натпревари. Сепак, најважна вест за навивачите на Барса е дека Жерар Пиќе вечерва ќе ризикува и ќе настапи најверојатно од првата минута. Остатокот од екипата се знае, Дест наверојатно ќе биде на десен бек, лево Алба, Бускетс, Де Јонг и Педри во средината, а во нападот е триото Дембеле, Меси и Гризман. ПСЖ веќе знаеме дека е без Нејмар и Ди Марија, Верати само што се опорави, па многумина веруваат дека Барса вечерва е голем фаворит. Вистина е тоа дека никој не можеше да издвои фаворит кога беше направена ждрепката пред два месеци, но Барса почна да игра многу подобро, а ПСЖ во меѓувреме го отпушти Тухел, Покетино е со екипата месец и половина и се уште ги „сложува“ коцките.