Тренерот на Наполи, Лучијано Спалети ја потврди веста дека го напушта клубот по крајот на сезоната. На наполи му остана уште еден натпревар во сезоната, веќе го подигнаа Скудетото во Серија А, откако одиграа навистина импресивна сезона и во однос на играта и на резултатите.

Сепак, шпекулациите за иднината на Спалети се актуелни со недели и покрај одличните перформанси на тимот, а конечното заминување на тренерот вчера го потврди и претседателот Аурелио Де Лаурентис.

„Понекогаш се разделувате поради премногу љубов. Нема да останам, си одам. Нема шанси да се предомислам. Веќе пред неколку недели им кажав на луѓето во клубот дека ми треба една година одмор. Нема да преземам друг тим. Сега ќе одморам една година“, изјави Спалети.

Според последните шпекулации во печатот, Џанпјеро Гасперини и Луис Енрике се главни фаворити за да седнат на клупата во Наполи.

Челзи размислува да го ангажира напаѓачот на Реал Мадрид, Винисиус Жуниор. За трансферот на 22-годишниот Бразилец, „сините“ се подготвени да издвојат 150 милиони евра, пренесува „Ел Национал“.

Доколку се случи овој трансфер, тоа ќе биде рекордна продажба во историјата на Реал Мадрид. 100 милиони евра беа собрани од заминувањето на Кристијано Роналдо во Јувентус во 2018 година. Околу 70 милиони евра Реал Мадрид доби за трансферот на Рафаел Варан во Манчестер Јунајтед во летото 2021 година.

Винисиус е соочен со расизам во шампионатот на Шпанија, па можеби размислува да замине во друга лига, каде ситуацијата со ова прашање е воспоставена на најдобро ниво. Познато е дека работата во англиската Премиер лига за искоренување на расизмот беше забележана од многу фудбалски фигури, вклучувајќи го и тренерот на Манчестер Сити, Пеп Гвардиола.

Жоао Феликс игра на позајмица во Челзи до крајот на сезоната, а потоа ќе се врати во Атлетико Мадрид.

Феликс сакаше да ја промени средината, па Атлетико се согласи да го пушти на позајмица, но без дефинирана опција за откуп на крајот на сезоната. Челзи сака да го откупи и ќе има предност во преговорите, но самиот фудбалер се предомислува да остане на „Стенфорд Бриџ“ бидејќи сака да игра во Лигата на шампиони.

Сега во трката за неговиот потпис се вклучи и Манчестер Јунајтед, кој сака да го „украде“ пред носот на „сините“ и е спремен да плати 80 милиони фунти за неговиот потпис.

Напаѓачот на Манчестер Сити, Хулијан Алварез, кој потпиша долгорочен договор (до 2028 година) со англискиот тим, размислува за преселба во друг клуб поради конкуренцијата со Ерлинг Халанд. Ова го објави новинарот Флоријан Платенберг на „Твитер“. Баерн Минхен е подготвен да го ангажира 23-годишниот Аргентинец.

Алварез знае дека ќе му биде тешко да го исфрли Норвежанецот од стартниот состав на Манчестер Сити, според изворот, па може да размисли за преселба во друг тим. 

Баерн е во потрага по нов напаѓач и е подготвен да го повика овој играч во својот тим. Алварез оваа сезона на 48 натпревари постигна 17 голови и имаше пет асистенции.

Манчестер Сити ќе добие рекордна парична награда за освојувањето на шампионската титула во Премиер лигата. „Граѓаните“ оваа сезона ќе ја завршат со премија од 165,7 милиони фунти.

Во сумата се вклучени пари од договорите за тв-преноси во Англија и странство, паричната награда за титулата, дел од профитот и настапи на британската телевизија во живо. Вкупниот награден фонд за сезоната за 20 клубови беше 2,6 милијарди фунти.

Минатата сезона Сити за титулата заработи 153 милиони фунти.

Најголемата ѕвезда на Борусија Дортмунд, Џуд Белингем, е прогласен за „Играч на сезоната“ во германското првенство.

19-годишниот плејмејкер и Борусија ја испуштија титулата во последното коло, но играчот од средниот ред со одличната сезона покажа дека ја заслужува наградата. Тој постигна вкупно 14 гола и имаше 7 асистенции во тековната сезона во германската елита.

Англискиот интернационалец, кој е младински играч на Бирмингем, веќе го одигра последниот натпревар за Борусија и на лето ќе се пресели во Реал Мадрид.

Италијанските медиуми пренесуваат дека Милан и Интер ќе водат битка за потписот на францускиот напаѓач, Маркус Турам. 24-годишниот Французин игра одлично во дресот на Борусија Мехенгладбах и го привлече вниманието на многу европски гиганти.

Неговиот договор истекува на крајот на сезоната, а Турам потврди дека нема намера да го продолжува и сака да направи чекор напред во кариерата.

Миланските клубови имале средба со неговиот агент и ќе се обидат да ја победат конкуренцијата бидејќи сакаат да го доведат напаѓачот без обештетување.

Турам е отворен за преселба во Италија, па останува да видиме каков ќе биде неговиот избор.