Италијанскиот калчолигаш Салернитана сака по секоја цена да го ангажира уругвајскиот голгетер Едисон Кавани. 

За таа цел клубот подготви понуда за договор од два милиони евра по сезона, во која е вклучена и клаузула по која Кавани може да го напушти клубот кога и да посака. Во понудата до Уругваецот Салернитана нуди и 200 илјади евра бонус за секој постигнат гол на напаѓачот.

Останува да се види дали Кавани ќе ја прифати оваа интересна понуда и ќе се врати повторно да заигра во Серија А, каде претходно ги носеше дресовите на Палермо и Наполи.

Минатата сезона Кавани ја помина во Манчестер Јунајтед но сега е слободен играч без актуелен договор.

Германскиот стратег на клупата на Челзи, Томас Тухел, сака да го ангажира фудбалерот од средниот ред на Јувентус, Адриен Рабио.

Двајцата соработува одлично во Пари Сен Жермен и тренерот добро ги познава квалитетите на Французинот. Згора на тоа, Јуве е подготвен да го пушти за скромни 20 милиони евра.

Рабио за екипата од Торино одигра 129 натпревари со ефект од 6 голови и исто толку асистенции.

29-годишниот репрезентативец на Австрија, Мартин Хинтерегер, изненадувачки се определи да ја заврши фудбалската кариера.

„Се радував на успехот во Лига Европа, тоа беше мојот прв голем резултат со Ајнтрахт. Мислев да ја завршам кариерата уште изминатата година“ – вели  Хинтерегер.

Тој има настапувано и за Аугсбург, Борусија Менхенгладбах и Салцбург.

Англискиот „Скај Спортс“ објавува дека Челзи е заинтересиран за доведување на дефанзивецот од Јувентус, Матијс де Лихт.

Холандскиот фудбалер има клаузула според која може да го напушти клубот од Торино за 120 милиони евра.

Челзи и тренерот Тухел, се во потрага на централни одбранбени играчи после заминувањето на Антонио Рудигер и Андреас Кристенсен, а Де Лихт би бил одлично решение за таа позиција.

22-годишниот фудбалер е поранешен капитен на Ајакс, кој направи трансфер во Јуве во 2019 година за 75 милиони евра.

За една недела договорот на Нејмар со ПСЖ автоматски ќе биде продолжен на уште една година, тврди „Л‘Екип“.

Ова се должи на вклучувањето на посебна клаузула во договорот со него. Во мај 2021 година, Бразилецот потпиша договор со парижаните до 2025 година. На 1 јули 2021 година договорот автоматски беше продолжен за една година, а на 1 јули 2022 година ќе биде продолжен за уште една година – до 2027 година. Оваа информација доаѓа во време на гласините дека Бразилецот може да се пресели во Јувентус на позајмица за време на летниот преоден рок, откако раководството на ПСЖ не беше задоволно од раното испаѓање во Лигата на шампионите.

30-годишниот Бразилец се пресели во ПСЖ од шпанскиот гигант Барселона во 2017 година за рекордни 222 милиони евра во светскиот фудбал. Како дел од парискиот клуб, фудбалерот одигра 144 натпревари, постигнувајќи 100 гола и 60 асистенции. Напаѓачот стана четири пати шампион на Франција, три пати победник на Купот на Франција, двапати Суперкуп и еднаш Француски Лига Куп.

Македонскиот фудбалски репрезентативец, Езгијан Алиоски, е пред заминување од неговиот сегашен клуб Ал Ахли.

Тимот во кој Алиоски се приклучи минатото лето наместо да се бори за титула во првенството на Саудијска Арабија, во моментот е на чекор до испаѓање од лигата и се наоѓа на претпоследното место на табелата.

Доколку тимот испадне од лигата, најверојатно Алиоски ќе го напушти клубот и ќе побара ангажман во Европа. Според информациите најсериозен кандидат за ангажман на македонскиот интернационалец е турскиот првак Трабзон кој веќе започнал разговори со претставниците на Алиоски. Конечната одлука околу иднината на Езгијан ќе биде позната за десеттина дена по завршувањето на сезоната во Саудијска Арабија.

Светската фудбалска федерација им одобри на учесниците на претстојното Светско фудбалско првенство во Катар да имаат на располагање по 26 играчи, што е за три повеќе во однос на претходното Светско првенство во Русија 2018 година.

 Исто така селекторите за време на натпреварите ќе можат да користат до пет измени, две повеќе од претходно.

Зголемувањето на бројот на измените стана пракса за време на ковид протоколите, додека главна причина за зголемениот број на играчи е фактот што Мундијалот за прв пат ќе се одржува во ноември и декември, кога ќе мора да се прават паузи во националните првенства и играчите да ги напуштат своите клубови, да учествуваат на СП во Катар и потоа повторно да се вратат на клубските обврски.

Светското првенство во Катар ќе се игра од 21.ноември до 18. декември

Атлетико Мадрид е заинтересиран да го позајми играчот од средниот ред на ПСЖ, Пабло Сарабија.

Двете страни преговараат за едногодишен договор со опција за откуп на шпанскиот клуб. Според информациите, парижаните ќе исплатат дел од платата на играчот од средниот ред за време на позајмицата.

Сарабија (30) му се приклучи на ПСЖ во 2019 година. За францускиот тим Пабло Сарабија постигна 22 гола на 79 натпревари и даде 12 асистенции. Договорот меѓу играчот и клубот истекува во 2024 година. Сарабија ја одигра сезоната 2021/2022 како позајмен во Спортинг.