Играчот од средниот ред на Манчестер Јунајтед, Хуан Мата сака да го напушти клубот со слободен трансфер ова лето.
33-годишниот Шпанец би можел да се врати во Ла Лига, бидејќи интерес за негово ангажирање изразуваат екипите на Реал Сосиедад и Барселона.
Мата настапува за Манчестер Јунајтед од јануари 2014 година. За тимот запиша вкупно 277 натпревари, на кои постигна 51 гол и 47 асистенции.
Организаторите на Светскиот шампионат во Формула 1 објавија дека сезоната 2022 година ќе вклучува и три спринтерски трки за време на викендите.
Првично, требаше да има шест, но, со тоа не се согласија екипите поради ограничениот буџет. Постигнато е компромисно решение кое вклучува три трки на 100 километри.
Победникот ќе земе осум поени, вториот – седум и така натаму до еден за осмиот. Патеките кои ќе бидат домаќини на трите спринта ќе бидат Имола, Ред Бул Ринг и Интерлагос.
Тренерот на Интер, Симоне Инзаги изјави дека неговиот тим ги има сите квалитети да му се спротивстави на Ливерпул. Двата тима ќе се сретнат во Милано во натпревар од осминафиналето на Лигата на шампионите.
„Ливерпул е еден од најдобрите тимови во Европа, но нашите играчи заслужуваат да играат на вакви натпревари. Не сме играле во осминафинале од ЛШ долги години и знаеме дека ќе биде тешко, но ќе се обидеме да се справиме. На хартија, Ливерпул е фаворит, но ќе им кажам на моите играчи да излезат психички растеретени и да ги покажат квалитетите кои ги поседуваат. Желбата за победа ќе ја направи разликата меѓу двата тима“, изјави Инзаги.
Поранешниот играч за врска на Барселона, Андрес Иниеста изјави дека би сакал да се врати во каталонскиот клуб. Во моментов Шпанецот настапува како дел од јапонскиот клуб Висел Кобе.
„Би сакал да се вратам во Барселона. Сè уште навистина уживам да сум во фудбалот и да размислувам за тоа. Ова е она што најмногу ме возбудува. Често сфаќам дека сакам да станам тренер или спортски директор. Сакам мојата иднина да биде поврзана со фудбалот“, изјави Иниеста.
Иниеста игра за Висел Коби од 2018 година, приклучувајќи се на тимот како слободен играч. Целиот претходен дел од својата професионална кариера, фудбалерот го мина во шпанска Барселона, освојувајќи 32 трофеи со тимот. Како дел од шпанската репрезентација Иниеста стана шампион на Европа и светот. Договорот на играчот од средниот ред со јапонскиот клуб истекува во 2024 година.
Гркот Јанис Сферопулос не е повеќе тренер на кошаркарскиот клуб Макаби од Тел Авив.
Тој доби отказ од клубот после елиминацијата во полуфиналето од домашниот Куп, каде Макаби беше поразен од екипата на Хапоел, со резултат 80:90.
После натпреварот, навивачите на Макаби го изразија своето незадоволство од поразот, при што беше избегнат и инцидент бидејќи дел од публиката сакаше физички да ги нападне тренерот и играчите.
Јанис Сферопулос беше тренер на Макаби од Тел Авив од 2018 година, а претходно ги водеше грчките екипи Олимпијакос и Паниониос.
Тренерот на Париз Сен Жермен, Маурицио Почетино, изрази задоволство од играта на тимот во победата од 1-0 против Реал Мадрид во првиот осминафинален натпревар во Лигата на шампионите.
Тој особено го пофали Килијан Мбапе, кој со гол во четвртата минута од судиското надополнување му донесе радост на парижаните.
„Можеби е мала победа, но ни дава надеж за натпреварот во Мадрид. Задоволен сум од настапот и се надевам дека ќе продолжиме да играме на овој начин и во иднина“, изјави Почетино по натпреварот.
И покрај разочарувањето од промашениот пенал на Лионел Меси, тренерот изрази задоволство од тоа што Париз Сен Жермен доминираше во поседот на топката.
Високата победа на Манчестер Сити од 5-0 над Спортинг од Лисабон во првиот натпревар од осминафиналето во Лигата на шампионите, донесе неколку рекорди за тимот предводен од Гвардиола.
Фудбалерите на Сити се први со пет последователни победи како гости во елиминациската фаза на ЛШ.
Тимот на Гвардиола може да се пофали со уште две работи. Сити веќе има 200 постигнати гола во Лигата на шампионите, во само 97 натпревари.
Огромното водство од 4-0 на полувремето во Лисабон е прв случај во историјата на елиминациите од Лигата на шампионите, еден тим да има водство од најмалку четири гола до полувремето.
Пред стартот на новата сезона во Формула 1, од Вилијамс го претставија новиот болид со име FW44.
Новиот болид е во доминантно сина боја со црвени детали, и ја претставува силата и софистицираноста на Вилијамс.
Возачите на тимот, Алекс Албон и Николас Латифи, изјавија дека се задоволни од автомобилот и дека се радуваат на тест возењата во Барселона.
Тренерот на Реал Мадрид, Карло Анчелоти потврди дека Герет Бејл ќе го напушти клубот по крајот на сезоната. Договорот на Велшанецот истекува и тој нема да биде обновен. Крилниот напаѓач имаше неколку незаборавни настапи на Сантијаго Бернабеу, но го следеа и многу повреди.
„Разговарам со него доста често. Се трудам да ги слушам неговите проблеми, нашиот однос е многу добар. Се однесува сериозно и професионално, го почитуваат во клубот. Повредите го спречуваат да игра повеќе оваа сезона, но сега се чувствува добро. Можеби не е многу мотивиран, но Бејл сака на најдобар можен начин да ја заврши кариерата во Реал Мадрид, тој му помогна на клубот да освои многу вредни трофеи, и го заслужува најдоброто“, изјави Анчелоти пред гостувањето кај ПСЖ во Лигата на шампионите.
Њукасл во наредниов период нема да може да смета на најзвучното засилување од јануарскиот преоден рок, англискиот репрезентативец Киран Трипие.
Трипие со мајсторија му донесе три бода на Њукасл на вчерашната средба против Астон Вила, но во вториот дел мораше да го напушти теренот, а деталните медицински прегледи покажаа дека има заработено фрактура на левата нога.
Имено се работи за скршеница на петтата метатарзална коска на стапалото, па од „Сент Џејмс Парк“ информираа дека дефанзивецот е биде во „аут“ престојните мечеви не посочувајќи за точно колкава пауза се работи.
Киран веднаш се наметна по трансферот од Атлетико Мадрид, даде голови против Евертон и Астон Вила и дефинитивно ќе му фали на составот кој е предводен од Еди Хау.
