Македонскиот младински репрезентативец, Давид Тошевски во последниот ден од преодниот рок заврши во Полска. Тој е испратен на нова позајмица од руски Ростов и во новата сезона ќе игра во полската фудбалска елита.
Тошевски ќе го носи дресот на Горњик Забже. Интересно е што во овој клуб од пред неколку месеци настапува и славниот Лукас Подолски.
Торган Азар нема да учествува на претстојните квалификации за СП во дресот на Белгија поради повреда.
28-годишниот играч за врска беше вклучен во националниот тим за натпреварите со Естонија, Чешка и Белорусија, но е повреден. Азар не е во состојба да настапи и го напушти кампот по утринскиот тренинг. Играчот е планирано да го продолжи закрепнувањето со Борусија Дортмунд, објави денеска белгиската фудбалска федерација.
Торган Азар има 8 гола на 39 натпревари за Белгија и беше дел од тимот што летово стигна до четвртфиналето на Европското првенство.
Стефан Ристовски кој ја презеде капитенската лента по заминувањето на Горан Пандев, вели дека тоа е за него голема чест.
„Сакам уште еднаш јавно да се заблагодарам на капитенот Горан Пандев. Тој треба да биде пример како да се продолжи репрезентативниот пат. Секако, голема благодарност и до селекторот што ми дава доверба да бидам предводник. Имаме промени, нема многу време, доволно сме професионални за да продолжиме каде што застанавме. Се надевам на позитивен резултат и убав нов почеток“, изјави Ристовски.
Фудбалерот на Леванте и наш репрезентативец, Енис Барди добро ја почна сезоната за својата екипа, играше на сите контролни и официјални натпревари, а против Ерменија, Исланд и Романија треба да биде главен оргханизатор на играта во средниот ред на нашата репрезентација.
„Чест ми е што сум дел од оваа репрезентација и за другарството кое го имаме тука. Секогаш кога ќе добиеме повик, едвај чекаме да дојдеме тука. Дел од нас доста години се заедно, 90% сме истите играчи. Добро се познаваме и знаеме што направивме низ изминатите години додека сме тука. Клучните играчи сме сите, нема тука поединци. Ова е едно семејство во кое сите сме важни. Така треба да мислиме и понатаму. Се што помина мора да оставиме зад нас и да живееме во моментов. Ерменија има многу добра репрезентација, со овој селектор променија доста работи во тимот. Но, ние ќе се фокусираме на нашата работа и што треба ние да правиме како и секогаш. Секој меч е многу важен и тежок да се победи, поразлично ништо не треба да дадеме, ние го знаеме нашиот квалитет и кои сме, само тоа да го покажеме на терен и да ги исполниме задачите на селекторот“, изјави Енис Барди.
Драган Бајиќ, селекторот на нашиот сениорски национален тим присуствуваше на церемонијалот на одредување на квалификациските групи по кој Македонија за противници ги доби националните репрезентации на Шпанија, Грузија и Украина.
„Добивме група која не изгледа како атрактивна, но не е ниту лесна“- е првиот коментар на нашиот селектор по дознавањето на противниците во квалификациите за СК 2023. „Но мојата тренерска филозофија вели дека повеќе сакам противниците да размислуваат за нас, отколку ние за нив. Така е и овојпат. Во разговорите со колегите кои се тука во Женева, дознав дека се вложува многу. И во Грузија, и особено во Украина, тоа се сериозни селекции, за шпанската не сакам да дискутирам. Но во мојот речник не постои зборот предавање“.
Селекторот вели дека овие најмалку шест натпревари се всушност продолжение на планираните активности откако дојде на кормилото на нашиот сениорски национален тим.
„Јасна е визијата, сакаме низ овие натпревари да им дадеме уште поголем прилика на помладите. Верувајте во секој прозорец тоа ќе биде и видливо. Овие мечеви би биле само континутитет на реализација на плановите. Искрено се надевам дека во наредниот циклус ќе ги имаме на располагање и играчите кои не беа во можност да бидат дел од селекцијата, што не беше случај овој месец. И сите заедно да уживаме и да напредуваме низ овие квалификациски натпревари. Се надевам дека зад нас ќе останат проблемите со короната, дека ќе се врати оној стар систем на натпреварување. Дека публиката ќе се врати во салите, без тоа е сосема поинаку“- вели селекторот.
Никола Влашиќ го комплетираше трансферот во Вест Хем. Влашиќ стана четвртиот најскап хрватски фудбалер во историјата и за 27 милиони евра се пресели во Премиер лигата.
Влашиќ одигра фантастична сезона во ЦСКА Москва и беше избран за најдобар фудбалер во руската лига.
Долго се поврзуваше со трансфер во Милан, но „росонерите“ не беа спремни да ја платат сумата која ја бараше рускиот клуб.
На крајот Вест Хем се согласи да плати 27 милиони евра и Власиќ кариерата ќе ја продолжи во Премиер лигата.
Фудбалерот на Арсенал, Ејнсли Мејтланд-Најлс договори останување во клубот, иако претходно на својот Инстаграм профил јавно порача дека сака да ја промени средината.
Десниот бек беше желба на Евертон да биде доведен на позајмица, но Арсенал тоа го одби, иако Артета се помалку смета на 24-годишникот.
„Само сакам да отидам некаде каде што ме сакаат и каде ќе играм.“ – напиша Мејтланд-Најлс на Инстаграм, означувајќи го официјалниот профил на Арсенал.
Скај Спортс објави дека 24-годишниот фудбалер одржа состанок со клубот и договори дека ќе остане барем до јануари. Тој разговараше и со тренерот Микел Артета, а тема на истиот беше објавата на социјалните мрежи.
Во клубот се разочарани од ваквиот потег на играчот, но проблемот беше решен, по што се договорија заедно да се фокусираат на она што ги очекува.
Арсенал беше подготвен да го ослободи ова лето, но понудата од Евертон беше прениска.
Џек Вилшер пред нешто помалку од десет години беше еден од најперспективните играчи за врска на светот. Беше клучен играч на Венгеровиот Арсенал и иднината на англиската репрезентација, а колку беше добар фудбалер, говори и тоа што Пеп Гвардиола сакаше да го доведе во Барселона.
Сепак, Вилшер не успеа да реализира ниту половина од својот потенцијал, воглавно поради повреди, а сега од Италија пристигнуваат уште бизарни вести поврзани со него.
Имено, Вилшер во моментот тренира со второлигашот Комо, кој минатата сезона играше во трета лига. Сепак, тој нема да може да заигра за клубот поради политичката одлука на Велика Британија. Со излегувањето на неговата држава од Европската унија, тој се води како играч надвор од ЕУ, па италијанските второлигаши не можат да го регистрираат ако нема работно искуство во Италија.
Адем Мекиќ беше еден од најдобрите, најстандардни наши репрезентативни играчи на претквалификациите за Светскиот Куп.
Тој, исто како и неговите репрезентативни соиграчи ги чекаше исходот на ждрепката за онаа главна фаза – квалификациската, која за противници во групата „Г“ ни ги донесе селекциите на Шпанија, Украина и на Грузија.
„Онака, од прва, се чини дека добивме една добра група. Противници, што се вели по мерка. Од една страна, ќе играме против светскиот шампион, Шпанија, што несомнено е една голема чест. Да се бориш против најдобриот во светот, а во исто време, ги имаме Украина и Грузија. Селекции со кои можеме да бидеме компетитивни, каде имаме простор за резултат“ – вели крилото на нашиот национален состав.
Она што Мекиќ лично посакува е веќе од ноември, кога стартуваат квалификациите, екипата да биде комплетна.
„Посакувам да бидеме комплетни, во екипата да имаме и играчи кои не беа дел од претквалификциите преку кои и дојдовме до една ваква можност да одиграме најмалку шест натпревари против велесила како Шпанија, и силни, квалитетни репрезентации како Украина и Грузија. Да немаме проблеми со повредите. Да не се потценуваме, но ниту да ги преценуваме противниците без оглед што ја имаат фаворитската улога. И најважно од се, да веруваме во нашите способности, во нашите квалитети. Се надевам дека ќе бидеме конкуретни во ова друштво од квалификациите за Светското првенство“- посакува Мекиќ.
Екипата на Лајпциг официјално го промовираше засилувањето од Барселона, Илаиш Мориба кој доаѓа во германскиот тим откако штрајкуваше и одлучи да не го продолжи договорот со Барса, па каталонците беа приморани да продаваат.
Во Лајпциг тој се очекува да биде замена за Сабицер, кој претходно потпиша за Баерн Минхен.
Барселона велеше дека за Илаиш Мориба на кој му истекуваше договорот по крајот на сезоната бара меѓу 15 и 20 милиони евра.
Но, Тотненхем и Лајпциг наддаваа, па на крајот Барса доби и повеќе од што очекуваше.
Германскиот клуб ќе плати 16 милиони евра, плус 6 милиони евра во бонуси, а ќе добие и 10 проценти од евентуалниот следен трансфер на Илаиш.
