Полусезоната за одбојкарките на Пелистер волеј заврши со максимална победа од 0-3 во гости над екипата на Вардар од Скопје. Битолчанки одиграва одличен натпревар и, иако резултатот е 0-3, сепак домаќинот покажа дека е сосема солидна екипа.
За истакнување е перфектнот сервис на сите во екипата, (само 6 сервис грешки и 12 аса), но оние серии на Марија Димитровска беа од исклучителна важност за нашата екипа, со што Пелистер волеј покажува дека има голем број на играчи кои можат да одговорат еднакво квалитетно на задачата.
Шај Мек Ги повторно беше најефикасна со 13, Најдановска запиша 9, Стојановска 8, Димитровска 8, Ела Медвед 6, Жевлакова 2 поени.
Следува мал одмор од неколку дена, а следуваат припреми за вториот дел од сезоната.
Намалена казната на Луис Диаз
Европската фудбалска федерација (УЕФА) делумно ја усвои жалбата која минхенски Баерн ја поднесе на суспензијата за својот напаѓач Луис Диаз и му ја намали казната од три на два натпревари.
УЕФА првично на колумбискиот фудбалер му изрече суспензија од три натпревари поради црвениот картон што му беше покажан во победата од 2-1 над европскиот првак ПСЖ во Лигата на шампионите минатиот месец.
Диаз беше двоен стрелец на натпреварот пред да биде исклучен на почетокот на второто полувреме поради груб прекршок врз фудбалерот на ПСЖ, Ашраф Хакими. Ден подоцна, ПСЖ соопшти дека Хакими го повредил левиот глужд и оттогаш мароканскиот дефанзивец нема настап за клубот од Париз.
Диаз ќе го пропушти домашниот натпревар на Баерн во Лигата на шампиони против Спортинг Лисабон во вторник, но би можел да се врати во составот за дуелот против белгиски Унион Сен Жил.
Верстапен обезбеди пол позицијата на ГН на Абу Даби
Актуелниот светски шампион во Формула 1, Холанѓанецот Макс Верстапен (Ред Бул), ќе стартува од пол-позицијата на последната трка од овогодишното Светско првенство, Големата награда на Абу Даби, која ќе се вози в недела.
Верстапен на денешните квалификации постигна време кое беше за 0,201 секунди подобро од водечкиот возач во генералниот пласман, Британецот возач Ландо Норис (Мекларен), кој ќе стартува од втората позиција, додека неговиот клупски колега, Австралиецот Оскар Пјастри ќе стартува од третото место.
Пред последната трка од сезоната, лидерот Норис има 12 бодови повеќе од второпласираниот Верстапен, а 16 од третопласираниот Пјастри, и ќе ја освои шампионската титула ако заврши на подиумот в недела.
Познати номинациите за спортист на годината
Националните спортски федерации се подготвуваат за изборот за спортист на 2025 година. Веќе се најавени најсериозните кандидати за престижните признанија кои ќе се доделуваат во неколку категории. Селекторот на машката ракометна репрезентација и на освојувачот на ЕХФ Европскиот Куп со Алкалоид, Кире Лазаров е номиниран за тренер на годината. Негови протикандидати се: Магомед Ибрагимов (борење), Методија Ангелевски (пливање), Дејан Митровски (кик-бокс) и Кристијан Кајчевски (атлетика).
Во изборот за спортист на гоината се најдоа фудбалерот и капитен на македонскиот национален тим, Енис Барди, боксерот Ален Рустемовски, кик-боксерот Стефан Михајловски, атлелтичарот Андреас Трајковски, како и борачот Владимир Егоров. Кај дамите, во најтесната конкуренција влегоа Ангела Мојсовска (карате), Катерина Попева (фитнес и боди-билдинг), Александра Марковска (фудбал), Катерина Ацевска (џуи-џицу) и Сашка Колевска (спортски танци).
Во категоријата за најдобар млад спортист номиниран е ракометниот голман Иван Галевски, кој освои трофеј во ЕХФ Европскиот Куп, Никола Блажевски (спортско стрелаштво), Адријан Рустемовски (бокс), Лука Змејковски (кик бокс) и Бесир Алили (борење). Во категоријата за најдобра млада спортистка номинирани се Емилијана Ризоска (ракомет), Душица Бреслиева (карате), Марија Спирковска (борење), Марија Димовска (кик-бокс) и Даниела Алексовска (џиу-џицу).
Завршната церемонија е предвидена за 18 декември.
Реми на ракометарките на Македонија и Словенија на турнирот во Анкара
Македонската женска ракометна репрезентација одигра попладнево нерешено 22-22 против Словенија во рамки на второто коло од Меѓународниот турнир во Анкара.
Избраничките на селекторот Кристијан Грчевски одиграа уште квалитетен натпревар на турнирот во Турција што донесе неизвесна завршница во која македонските ракометарки беа поблиску до победата.
Марија Јанкуловска во последната минута од дуелот донесе предност од 22-21, а откако Словенките го израмнија резултатот, македонските ракометарки не успеаја да постигнат гол за победа во завршниот напад.
Во првото коло на турнирот во Анкара, кој е во рамки на ЕХФ неделата, македонската репрезентација го совлада домаќинот Турција со 29 – 26, а утре во завршниот натпревар ќе игра против Словачка.
Пораз на пелистерци по голема борба на дербито со ТФТ
Кошаркарите на Пелистер по голема борба загубија на дербито со ТФТ со 83-87, уште еден меч во кој „зелено-белите“ беа блиску до триумф, но падот на концентрација во финишот придонесе да не се радуваат на победа со своите верни навивачи.
Андреј Митревски погоди тројка за прво водство на Пелистер од 3-2, по што ТФТ одигра неколку квалитетни минути и поведе со 3-8. Пелистер имаше одговор, Митревски погоди уште една тројка, а откако Си-Џеј Вилсон стрелаше прецизно од далечина „зелено-белите“ поведоа со 12-11. До крајот на четвртината се играше израмнето, но Пелистер со слободното фрлање на Малешевиќ го доби овој период со 20-18.
ТФТ ја отвори втората четвртина со пет поени во низа, за момент поведе со 20-23, но следеше одговор меѓу Малешевиќ и Стајиќ и ново водство на Пелистер. Дуелот беше израмнет до 31-30, за Пелистер да го крене нивото на одбрана, примајќи само два поени до крајот на полувремето и на одмор да замине со 40-32 по реализациите на Брејси Дејвис.
Почетокот на третата четвртина донесе и проблеми во нападот за „пелистерци“, кои постигнаа само три поени во првите четири минути од четвртината, па гостите поведоа со 43-44. По негативата од 50-52 Пелистер одговори со осум поени во низа, но ТФТ се врати и израмни на 62-62, за во последните 10 минути да се влезе со минимално водство на битолчани од 64-62.
Пелистер имаше 70-66 во 33. Минута, кога се соочи со проблем по четвртата лична грешка на единствениот центар во тимот, Ленгстон Вилсон. Неколкуте чудни судиски одлуки им овозможија на гостите да поведат со 72-73, пред Даскаловски да побара тајмаут на нецели пет минути до крајот.
Стајиќ погоди важна тројка за 75-75, но потоа Пелистер влезе во серија грешки со кои му овозможи на гостинот да поведе со 75-78.ТФТ поведе со „плус шест“, битолчани не се откажаа борејќи се до крај, но сепак немаа сила за чудо во последната минута.
Малешевиќ го заврши мечот со дабл-дабл од 20 поени и 10 скокови, 20 поени имаше и Стајиќ, Брејси Дејвис постигна 16, а Миртевски 15 поени за Пелистер.
Чикаго ја отфрли можноста да го доведе Јанис
Репрезентативецот на Грција Јанис Адетокумбо, планира да го напушти сегашниот клуб Милвоки. Но, Чикаго Булс ја одби понудата за играчот на Милвоки.
Американските медиуми пренесуваат дека Чикаго бил контактиран за потенцијална размена, но управата на клубот ја одбила понудата. Во Чикаго не сакаат во тимот, кој го формираат за иднината, нов играч.
Јанис Адетокумбо ги има избришано сите постови на социјалните мрежи поврзани со Милвоки Бакс, а на дуелот против Детроит одигра само три минути и очекува трејд.
Грчкиот кошаркар е член на Милвоки од 2013 година. Во 2021 беше првак, а во 2019 и 2020 година беше избран за МВП на лигата.
Анчелоти: Добивме тешка мундијалска група
На Светското првенство во 2026 година, Бразил доби група по мерак. Во првата фаза петкратните светски шампиони ќе играат против Мароко, Шкотска и Хаити.
Бразил ќе го игра првиот натпревар на 13 јуни 2026 година против Мароко, по што ќе следат средби со Хаити на 19 јуни и Шкотска на 24 јуни.
„Мароко беше многу добар на последното Светско првенство во 2022 година во Катар, стигнаа до полуфиналето, додека Бразил беше елиминиран во четвртфиналето. Шкотска има многу силен тим, ќе биде многу тешко“, рече селекторот на Бразил, Карло Анчелоти.
„Мора да се обидеме да завршиме први во групата. Пред сè, мора добро да се подготвиме за првиот натпревар, кој ќе биде многу важен. Мора да размислуваме за победа на сите три натпревари. Прво против Мароко, што ќе биде најтешко, но и против другите два противници. Мора да имаме самодоверба“, додаде тој.
Бразил ќе одигра два пријателски натпревари во САД во март, против Франција и против Хрватска.
Астон Вила во последната секунда го сруши лидерот Арсенал
Лидерот во Премиер лигата падна на „Вила Парк“ во Бирмнигме. Емелијано Буендија, во 95-та минута постигна гол за триумф на Астон Вила над Арсенал 2-1. Аргентинецот им го нанесе на „топџиите“ вториот пораз оваа сезона.
Вила ја имаше првата голема шанса, но Раја имаше фантастична одбрана по ударот на Оли Воткинс во десеттата минута.
Играта беше интензивна на двете страни, потоа Арсенал малку ја презеде иницијативата – голот на Езе беше оправдано поништен поради офсајд, Сако исто така се обиде да упати удар со глава, но топката заврши веднаш до стативата.
Потоа домашните повторно наметнаа свој ритам, а во 36-та минута го видовме најважниот момент од првото полувреме – долг вовед во акцијата, аут од левата страна, Тимбер не реагираше доволно добро и топката заврши на втората статива, а таму Мети Кеш се протна зад Езе и го донесе својот тим во водство.
Арсенал започна уште поагресивно во второто полувреме, а наградата дојде брзо, во 53-та минута, резервистот Леандро Тросар постигна гол. Играчите на Вила загубија топка на средината од теренот, следуваше молскавична контра, Сака во шеснаесетникот дијагонално уфрли, а со малку среќа топката заврши пред Тросар, на кого не му беше тешко да изедначи.
Тросар го постигна 50-от гол во Премиер лигата.
Во 65-та минута, Раја одбрани удар на Воткинс, а четири минути подоцна, Емилијано Мартинез ја исфрли топката преку пречката со врвовите на прстите по феноменалниот удар на Едегор.
Се чинеше дека Арсенал е поблиску до водство, но по грешката на Калафиори, одлична шанса имаше Мален, кој го замени Воткинс. Сепак, шутираше покрај голот од добра позиција.
Тоа означи период на подобра игра на Вила, која заврши со голот на Бунедија.
Шпанија главен фаворит за светската титула следното лето
Откако беше извршена жрепката за групите за Светското првенство во 2026 година, водечките светски обложувалници ја гледаат Шпанија како најголем фаворит за освојување на титулата.
Според обложувалниците, Шпанија е прв фаворит за светската титула со коефициент од 4,5.
На второто место се Англија и Франција со коефициент од 6,5, по што следат Аргентина и Бразил (8,5), Германија (14), Португалија (16) и Холандија (20).
