Синот на легендарниот француски фудбалер Зинедин Зидан, Лука, госмени спортското државјанство и во иднина ќе игра за Алжир, објави денес Светската фудбалска федерација (ФИФА).

Како што објави ФИФА, барањето на Лука Зидан е одобрено бидејќи тој никогаш не бранел за Франција во сениорската конкуренција, туку само во помладите категории.

Лука Зидан има 27 години и го брани голот на шпанскиот второлигаш Гранада, а според најавите, селекторот на Алжир, Владимир Петковиќ, ќе го покани да дебитира во октомври, кога Алжир ќе игра против Сомалија и Уганда во квалификациите за Светското првенство.

Алжир е на чекор од директен пласман на Светското првенство, во квалификациската група Г има 19 бода, четири повеќе од Уганда и Мозамбик, а остануваат уште две кола.

Претседателот на Милан, Паоло Скарони, истакна дека Интер и Милан ќе го добијат најдобриот стадион во Европа до 2031 година, кој ќе биде гордост на сите граѓани на Милано, објавија италијанските медиуми.

„Проектот за нов стадион во градскиот округ Сан Сиро е во изработка веќе долго време, инвестирани се многу пари и сигурно ќе ја постигнеме зацртаната цел. Милан и Интер ќе го добијат најдобриот стадион во Европа, на кој сите граѓани на Милано ќе бидат горди“, рече Скарони, претприемач кој за време на својата бизнис кариера беше на чело на италијанските енергетски компании Енел и Ени.

Компанијата „Популос“ е одговорна за прелиминарниот дизајн на стадионот. Стадионот е дел од генералниот план за ревитализација на клучна урбана област на Милано во округ посветен на спорт и забава.

Општина Милано, исто така, одлучи да го трансформира квартот Сан Сиро во пешачка зона со околу 110.000 квадратни метри зелена површина (40 проценти од вкупната квадратура).

Паркингот, кој моментално зафаќа 40% од целиот простор, ќе биде преместен во целосно подземен простор. Повеќето спортски и рекреативни објекти, затворени и отворени, ќе бидат бесплатни или субвенционирани од градот.

Правоаголниот стадион со 60.000 седишта е инспириран од градските знаменитости, како што се Дуомо ди Милано и Галерија Виторио Емануеле, па и прекарото на овој предложен дизајн е „Катедрала“. Околу стадионот ќе има вертикални летвички кои ќе се издигаат и ќе го поддржуваат стаклениот ѕид што го опкружува просторот наречен дневна галерија. Внатрешната структура на стадионот е дизајнирана да биде „најинтимна во Европа“, доближувајќи ги гледачите што е можно поблиску до игралиштето.

Оваа недела, секторскиот комитет на Градскиот совет на Милано даде зелено светло за купување на земјиштето на кое се наоѓа стадионот „Џузепе Меаца“. За земјиштето, кое го вклучува и околниот простор околу стадионот, Интер и Милан ќе треба да платат 197 милиони евра. Проектот на новиот стадион има поддршка од градоначалникот на Милано, Џузепе Сала, а целата постапка во Градскиот совет треба да биде завршена до крајот на септември.

Италијанскиот Суперкуп ќе се игра во Ријад во декември оваа година, објави веб-страницата на натпреварувањето. Турнирот ќе се одржи во Саудиска Арабија, како што беше и минатата сезона, а ќе учествуваат четири екипи.

Полуфиналните натпревари се закажани за 18 и 19 декември, додека финалето ќе се игра на 22 декември.

Италијанскиот Суперкуп ќе го играат минатогодишниот шампион во Серија А, Наполи, второпласираниот Интер, освојувачот на Копа Италија, Болоња, и финалистот Милан.

Во првото полуфинале ќе се сретнат Наполи и Милан, додека Болоња и Интер ќе се сретнат еден ден подоцна.

Милан го освои Суперкупот на Италија минатата сезона, победувајќи го Интер со 3-2 во финалето.

Од четирите учесници најтрофејни се Интер и Милан со по 8 титули од 13 учества, Наполи има 2 трофеја од 5 учества, а Болоња ќе дебитира.

Менаџерот на Њукасл, Еди Хау има неколку нови проблеми со повредите по поразот од Барселона во Лигата на шампионите синоќа. Според информациите, пред дуелот со Борнмут викендов, Хау се соочува со суспензијата на Ентони Гордон, додека Џејкоб Ремзи и Јоан Виса се надвор од тимот до следната репрезентативна пауза поради повреди.

Шер претрпе удар во главата на мечот со Барселона, па денеска ќе оди на нови прегледи, додека Трипие беше повлечен од игра откако се пожалил на мала нелагодност. И за двајцата останува неизвесно дали ќе можат да му се стават на располагање на менаџерот за новиот меч од Премиерлигата.

Манчестер Јунајтед покажува сериозен интерес за 28-годишниот играч од средниот ред на Ал-Хилал, Рубен Невеш. Главниот тренер на „црвените ѓаволи“, Рубен Аморим, ги пофали квалитетите на играчот и доколку остане на клупата и по јануари, би посакал да го види како ново засилување.

Саудискиот клуб може да го продаде Невеш во Европа оваа зима за 20 милиони евра. Оваа сезона, Невеш настапи на осум натпревари во сите натпреварувања, постигнувајќи два гола и асистенции. Неговиот тековен договор со клубот е до летото 2026 година.

Играчот од средниот ред одигра 60 натпревари за португалската репрезентација.

Предложената реконструкција на Олд Трафорд во вредност од 2 милијарди фунти се смета за трансформативен потег, не само за Манчестер Јунајтед, туку и за поширокиот регион на Голем Манчестер. Поддржувачите го нарекуваат „животен проект“, со потенцијал да го промени изгледот, економијата и идентитетот на областа. 

Во срцето на планот е изградбата на нов стадион со капацитет од 87.000 до 100.000 гледачи, што би го направило еден од најголемите во Европа. Но визијата оди далеку подалеку од фудбалот. Околу стадионот се планира изградба на станбени единици, деловни и трговски простори, како и значајна јавна инфраструктура, со цел да се создаде нов, динамичен урбан кварт. 

Проектот добива силна поддршка од владини претставници и локални власти, кои го сметаат за еден од најголемите урбани развојни проекти во Европа. Се очекува да создаде десетици илјади нови работни места и да внесе милијарди во регионалната и националната економија. 

Планирано е формирање на посебна корпорација под водство на градоначалникот, која ќе го надгледува проектот и ќе обезбеди координација помеѓу Манчестер Јунајтед, Советот на Трафорд и властите на Голем Манчестер. 

Иако преферираната опција е изградба на нов стадион на соседно земјиште во сопственост на клубот, сè уште се водат разговори околу проценката на вредноста на земјиштето и финансирањето. Клубот разгледува комбинација од приватни инвестиции и потенцијални јавно-приватни партнерства за реализација на проектот. 

Освен што ќе го подобри искуството на навивачите, проектот може да биде поттик за пошироки подобрувања во транспортот и заедничката инфраструктура, претворајќи го регионот во нова атракција. Според поддржувачите, амбицијата на проектот е споредлива со наследството што го остави Олимпијадата во Лондон во 2012 година.