Кошаркарот Николас Батум се врати во Лос Анџелес Клиперс, а тој НБА клуб потпиша договор и со Кевин Портер.
Батум минатата сезона одигра 60 натпревари за Клиперс и Филаделфија и имаше просек од 5,3 поени, 4,1 скока и 2,1 асистенции по натпревар. Тој беше дел од трејдот што го донесе Џејмс Харден во Клиперс.
Портер минатата сезона играше за ПАОК во Грција и имаше просек од 22 поени, 9,3 скока, 6,8 асистенции и 2,8 украдени топки по натпревар.
Хрватскиот ракометар Верон Начиновиќ ќе стане нов играч на Кил, објави германскиот прволигаш и еден од најдобрите европски клубови.
Хрватскиот репрезентативец ќе го заврши договорот со француски Монпелје, а потоа од сезоната 2025/2026 ќе игра за Кил со кој потпиша тригодишен договор.
Начиновиќ е роден 2000 година во Риека, а досега има настапувано за Замет, словенечки Целје и Монпелје каде што е од 2021 година. Пивотот, кој е висок 203 сантиметри и тежок 116 килограми, минатата сезона постигна 57 гола во францускиот шампионат и 30 во Лигата на шампионите.
Досега во дресот на хрватската репрезентација одигра 23 натпревари и постигна 50 голови, а моментално се подготвува за Олимписките игри.
Новиот италијански прволигаш, Комо и натаму е активен на трансфер пазарот во обид да го засили тимот за тешката сезона која му претстои во италијанската елита. Најновата вест е дека првите луѓа на Комо сега работат на трансфер на Шпанецот Алберто Морено.
Според Фабрицио Романо, италијанскиот клуб преговара со 32-годишниот поранешен дефанзивец на Ливерпул за потпис како слободен играч. Морено минатата сезона ја мина во Виљареал, по што го заврши договорот со „жолтата подморница“.
Покрај тоа, Комо напредува во преговорите со поранешниот дефанзивец на Реал Мадрид и Манчестер Јунајтед, Рафаел Варан.
Француски „Л’Екип“ објави дека крилниот напаѓач на Баерн Минхен, Кингсли Коман размислува да ја заврши својата репрезентативна кариера иако има само 28 години. Откако се избори по повредата на тетивата за да го заземе неговото место во тимот на Франција на ова ЕП, Коман веројатно разочаран од резултатот размислува за повлекување.
Коман размислува за својата иднина во дресот на Франција, каде досега има 57 настапи. Еден фактор што би можел да влијае на неговата одлука е потврдата дека Дешам ќе ја води селекцијата до Светското првенство во 2026 година.
Германскиот тенисер Александар Зверев поради повреда на левото колено би можел да ги пропушти претстојните Олимписки игри во Париз, каде треба да ја брани титулата освоена пред три години во Токио.
Зверев се лизна на тревата за време на дуелот од 3. коло против Британецот Камерон Нори во Вимблдон, но успеа да го добие тој меч за да се појави на теренот во мечот од 4. коло против Американецот Тејлор Фриц со завој околу левото колено.
Драган Стојковиќ Пикси ќе остане селектор на Србија и по неуспешниот настап на оваа селекција на Европското првенство каде испадна уште во групната фаза.
Во репрезентацијата на Србија се појавија многу скандали, се шпекулираше и дека многу ѕвезди повеќе нема да играат додека Пикси беше на клупата, но на крајот дојде до голем пресврт.
Пикси ќе ја предводи Србија во новата сезона на Лигата на нации, која започнува во септември.
Оваа одлука ќе биде потврдена на состанокот на Извршниот одбор на Фудбалскиот сојуз на Србија, кој треба да се одржи во петок.
Французинот Франсоа Летексие ќе го суди финалето на Европското првенство меѓу Шпанија и Англија. Големата пресметка е во недела во 21 часот на „Олимпија стадион“ во Берлин.
38-годишниот судија досега на Европското првенство судеше три натпревари, Шпанија – Грузија, Данска – Србија и Хрватска – Албанија. Тој беше и четврти судија на воведниот меч меѓу Германија и Шкотска.
Помошници на Летексие ќе бидат Сирил Меуниер и Мехди Рахмуни. Четврт судија е Полјакот Шимон Марчиљњак.
Жером Брисар од Франција ќе биде на ВАР. Ќе му помагаат Вили Делаџо и Масимилијано Ирати од Италија. За резервен помошен судија е назначен Томаш Листкиевич од Полска.
Американскиот кошаркар Вејд Болдвин официјално е нов кошаркар на турскиот евролигаш Фенербахче со кој потпиша двегодишен договор со можност за продолжување на соработката.
Дваесетиосумгодишникот последните две сезони ги помина во редовите на Макаби каде се наметна како еден од најдобрите поентери во Евролигата.
Претходната сезона бележеше просек од 17.4 поени, 2.5 скокови и 4.9 асистенции на 30 одиграни средби во елитното кошаркарско првенство со што е јасно дека турскиот тим доби ново големо засилување за атак на евролигашката титула.
ИХФ објави дека за светското клубско ракометно првенство „вајлд карта“ добива унгарскиот ракометен гигант Веспрем.
Покрај Веспрем, во Каиро ќе играат уште две европски екипи – шампионот Барселона и бранителот на титула на Светското клупско првенство, Магдебург.
На турнирот ќе настапт Ал Ахли од Египет, африканскиот првак Замалек, азискиот шампион Ал Калеј, претставникот на Средна и Јужна Америка – бразилскиот Таубате, како и уште по еден тим од Северна Америка и Кариби, односно Австралија и Океанија.
Светското клупско првенство, кое претходно го имаше називот Супер Глоуб, ќе се одржи од 27 септември до 3 октомври.
