По вчерашните расистички навреди упатени кон играчите во Италија и Англија, првиот човек на ФИФА, Џани Инфатино, излезе со револуционерен предлог за санкционирање.

„Покрај процесот во три чекори кој вклучува опомена, времен прекин и  напуштање на теренот, треба да воведеме и автоматска дисквалификација и одземање на бодови на тимот чии навивачи покажаа расизам. Треба да има и глобални забрани и кривични пријави против сите расисти. Настаните што се случија во Удине и Шефилд во саботата се одвратни и целосно неприфатливи. Играчите погодени од саботните настани ја имаат мојата безрезервна поддршка“, напиша Инфантино на профилот на социјалната мрежа „Икс“.

Тренерот на Баерн Минхен, Томас Тухел, зборуваше за состојбата на централниот бек Матијс де Лихт, кој се повреди за време на тренинг кампот на Баерн Минхен во јануари, а исто така ги сподели своите размислувања за иднината на 24-годишниот играч во клубот.

„Тој го напушти тренинг кампот повреден. Матијас беше повреден неколку пати претходно. Во истиот момент проблеми имаа Упамекано и Ким Мин Џеј. Но, секако дека сметаме на него, Де Лихт е наш играч и тој е еден од најдобрите играчи во тимот, како и прекрасна личност.Матијас е подготвен да игра без никакви ограничувања, тој вчера имаше целосен тренинг. Нема причина за грижа. Тој ќе може да игра утре од самиот почеток“, изјави Тухел.

Да потсетиме, Баерн утре, 21 јануари, ќе игра против Вердер Бремен во натпреварот од 18. коло во Бундес лигата. Натпреварот ќе започне во 15:30 часот. Претходно во медиумите се појави информација дека тимот од Минхен е подготвен да се раздели со Де Лихт, бидејќи тој имал напнати односи со Тухел.

Арсенал ја одби првичната понуда на Вест Хем Јунајтед за позајмица за играчот од средниот ред Емил Смит-Роу. Ова го објави новинарот Фабрицио Романо на социјалната мрежа Икс.

Забележано е дека клубот нема намера да го пушти Емил Смит-Роу да оди на позајмица, бидејќи тој се уште се смета за клучен за тимот на Микел Артета. Покрај тоа, играчот е среќен што останува во Арсенал.

Во тековната сезона од англиската Премиер лига, 23-годишниот Емил Смит-Роу одигра шест натпревари на кои имаше една асистенција. Покрај тоа, играчот од средниот ред има три натпревари во Лигата на шампионите и по еден во ФА Купот и англискиот Лига куп. Фудбалерот не покажа ефективни акции во овие натпревари.

Екипата на Шкендија продолжи со засилувањата во пролетниот дел од сезоната и го доведе десниот бек Стефан Коцев.

Коцев е 29-годишен фудбалер за кого ова е враќање во Македонија откако помина една полусезона во дресот на Каспиј.

Претходно во Македонија тој го носеше дресот на Брегалница и Силекс. На интернационална сцена покрај Каспиј беше дел од Аспропиргос и Лирија од Косово.

Ново засилување на Гостивар Петар Слишковиќ, хрватски интернационалец кој има 15 настапи во Бундес-лигата, и многу повеќе во втората Бундеслига.

32-годишниот напаѓач има големо искуство во Германија и беше член на Мајнц, Динамо Дрезден, Сент Паули, Дуизбург, Ален…

Последните два ангажмани му се во Индија од каде доаѓа во Македонија и се очекува да биде големо засилување за Гостивар.

Киран Трипие е најновото име што се поврзува со преселба во Баерн Минхен, откако баварскиот гигант никако не успева да му ја исполни желбата на тренерот Тухел е да донесе нов десен бек во екипата.

Германскиот шампион десетина дена преговара со ПСЖ за Мукеле, но ставот на Французите е јасен – позајмица е можна само со клаузула за задолжителен откуп за летово, што пак од друга страна е неприфатливо за Баерн.

Од иста причина пропаднаа и преговорите со Галатасарај за Бои, па челниците на Баерн сега вниманието го насочија кон Трипие.

Кристијано Роналдо е легенда на Манчестер Јунајтед, но со последната изјава ги налути фановите на „црвените ѓаволи“.

Португалецот испрати гопеми пофалби за градскиот ривал Манчестер Сити и истакна дека ужива да го гледа.

„Манчестер Сити е неверојатен. Им честитам на минатата сезона. Фудбалери, тренер, сите беа супер. Конечно ја освоија Лигата на шампионите, веројатно тоа го засилужија уште пред две години. Уживам да ги гледам како играат“, истакна Роналдо.

Тој моментално настапува во Ал Наср и смета дека наскоро Саудиската лига ќе биде една од најдобрите во светот.

„Лигата напредува, ќе треба време, но чекор по чекор и тие ќе бидат на врвно ниво. Мислам дека лигата ќе биде во Топ 3 во светот. Луѓето можат да бидат горди. Лигата не е полоша од француската Лига 1. Нашата лига е поконкурентна и тоа можам да го кажам по една година помината овде. Веќе сме подобри од француската лига“, заклучи. Португалецот.

Луис Сурез ги одигра првите минути за тимот на Интер Мајами. Клубот од МЛС одигра пријателски натпревар против селекцијата на Салвадор, 70-та на ранг-листата на ФИФА и ремизираше во меч без голови (0-0).

Впечатокот на новинарот е дека Суарез не блескаше со поранешните соиграчи.

Уругвајскиот напаѓач повторно играше со Лионел Меси, Жорди Алба и Серхио Бускетс, играчи со кои ја делеше соблекувалната на Барселона.

Сите беа заменети на полувремето од мечот, откако упатија само два удари кон противничкиот гол во воведните 45 минути.

Една од акциите на Суарез и друштво погледнете ја во продолжение.

Џордан Хендерсон и официјално се врати од Саудиска Арабија, а потпиша договор со холандскиот гигант Ајакс.

Хендерсон беше еден од фудбалерите кои Европа ја заменија со Саудиска Арабија, меѓутоа по само шест месеци поминати во тимот на Ал Етифак се враќа назад.

Екс-капитенот на Ливерпул го засилува холандскиот гигант кој имаше катастрофален почеток на сезоната, меѓутоа подоцна се консолисираше и сега се напѓа на петтата позиција. Сепак, борбата за титулата е далеку затоа што ПСВ на врвот веќе има 23 бода повеќе.

Јувентус постигна договор со португалскиот дефанзивец и член на Лил, Тиаго Џало, пренесоа италијанските медиуми. Според информациите „старата дама“ ќе плати три милиони евра за услугите на Џало, а трансферот ќе се комплетира во следните денови.

Португалецот влезе во последните месеци од договорот со Лил, па францускиот клуб се согласи да го продаде за да не го загуби без обештетување.

Јувентус успеа да ја победи конкуренцијата, пред се од Интер, кој беше многу блиску до договор со Џало, но сакаше да го доведе на лето како слободен агент.