Ставрев ја завршува кариерата со натпреварот Работнички – Пелистер
Последното есенско коло во Првата македонска фудбалска лига се игра в недела. Сите шест меча се во ист термин, а Фудбалската федерација на Македонија веќе ги делегира официјалните лица.
Дербито на колото се игра во Тетово, каде што Шкендија го дочекува Гостивар, а за тој меч е делегиран Димитар Пилешков. Александар Ставрев веројатно последниот натпревар во кариерата ќе го суди во Скопје, меѓу Работнички и Пелистер.
Натпреварите в недела се во стандардниот термин од 13:00 часот.
МекГрегор ќе плати огромни судски трошоци за случајот со силување
Конор МекГрегор, еден од најпознатите борци во историјата на ММА, беше прогласен за виновен за силување на Никита Хенд во случај кој датира од 2021 година.
Судот пресуди дека МекГрегор мора да плати отштета од 250.000 евра на жртвата, иако тој инсистира дека нивната врска била доброволна.
Ситуацијата за МекГрегор уште повеќе се влоши кога Врховниот суд одлучи дека тој мора да покрие 1,5 милиони евра од судските трошоци на Никита Хенд.
Тој, исто така, се соочува со потенцијално непочитување на судските обвиненија, откако членовите на поротата што ја донесоа одлуката ги нарече „кенгури“.
Овој случај претставува значителен удар за угледот и финансиите на МекГрегор, со можност за дополнителни правни последици кои би можеле дополнително да ја оштетат неговата кариера.
Голем удар за Ферари пред клучната трка за титулата
Шампионските амбиции на Ферари во битката за конструкторската титула во Формула 1 во 2024 година доживеаја тежок удар по првиот тренинг пред Големата награда на Абу Даби.
По неговото завршување, беше откриено дека Шарл Леклер, кој беше најбрз во првите 60 минути од тренингот на „Јас Марина“, ќе биде поместен за 10 места назад на стартната линија за неделната трка. Причината е фактот што механичарите на Ферари беа принудени да вградат трета батерија во болидот на пилотот од Монако, негова прва дополнителна во сезоната. Според прописите на Ф1, ова предвидува автоматска казна од десет позиции, што ќе има многу сериозно влијание врз шампионските амбиции на Ферари.
Пред последното коло од сезоната, „црните коњи“ заостануваат од Мекларен со 21 поен и им треба совршен викенд за да имаат реални шанси да ја освојат првата титула во конструктори од 2008 година. Ова е добра вест за Мекларен, чија последна титула во конструктори беше во 1998 година.
Леклер нема да биде единствениот возач кој ќе одлежи казна по квалификациите во Абу Даби. Пилотите на Вилијамс, Алекс Албон и Франко Колапинто ќе бидат поместени пет места назад поради употребата на нови менувачи, кои се над дозволениот број од пет по сезона.
Двојна победа на Амар Хусеиновиќ во Бахреин
Македонскиот тенисер Амар Хусеиновиќ имаше успешен настап на јуниорскиот турнир во Бахреин. Тој во поединечна конкуренција избори пласман во четвртфиналето, додека во игра на двојки беше полуфиналист.
Амар во сингл оствари две победи. Во првото коло го совлада Иван Пономариев од Казакстан со 2-0 во сетови (6-3, 6-4), додека во следната рунда беше поуспешен од Керем Туфекчи од Турција со 2-0 во сетови (6-4, 6-2). По голема борба Амар беше поразен во четвртфиналето од вториот носител Емирхан Булут од Турција со 2-1 во сетови (7-6/5, 6-7/8) и 6-3).
Во конкуренција на двојки заедно со Турчинот Чаган Ефе Туфекчи со 2-0 во сетови (6-2, 6-1) ги совладаа Ахмед Алсајед (Бахреин) и Сантиаго Перципале (Италија) со 2-0 во сетови (6-2, 6-1). Убедливи беа и во вториот меч и со 2-0 во сетови (6-2, 6-1) ги совладаа Едвард Крупе (Канада) и Тудор Зехеру (Романија). Во полуфинале поуспешни од нив беа тенисерите од Турција, Емирхан Булут и Јагиз Јилдиз со 2-0 во сетови (6-2, 6-4).
Гатузо го одби Торино за да остане во Хајдук
Италијанските медиуми објавија информации за интерес од страна на Торино за аквизиција на Џенаро Гатузо.
Тренерот кој во моментов го води Хајдук нагласи дека е среќен во Сплит и не размислува за заминување. На прес-конференцијата пред мечот со Горица тој доби прашање за интересот од Торино и децидно одговори.
„Мојата иднина е во Хајдук. Со главата и мислите сум комплетно тука. Моментално размислувам само за натпреварот со Горица“, порача Италијанецот.
Торино размислува за тренерска смена, бидејќи тимот е во сериозна резултатска криза под водство на Паоло Ваноли. Во последните десет натпревари во сите натпреварувања Торино загуби осум пати.
Претходно се зборуваше за интерес и од страна на Глазгов Ренџерс за услугите на Гатузо.
Аталанта не запира: Совладан Милан за скок на врвот во Серија А
Аталанта ќе преноќи на првото место на табелата во Серија А откако вечерва со 2-1 го совлада Милан, Адемола Лукман им пресуди на „росонерите“ во финишот од мечот.
„Црно-сините“ од Бергамо се во страшна форма, имаат девет победи во низа, не знаат за пораз веќе 14 натпревари и вечерва ќе преноќат на врвот во Серија А откако со 2-1 го совладаа Милан.
Де Кетеларе погоди против својот поранешен клуб и донесе предност од 1-0, но само десет минути подоцна Мората одговори и изедначи на 1-1.
И кога се чинеше дека бодовите ќе бидат поделени, фудбалерите на Милан заборавија на Адемола Лукман при еден корнер, па Нигириецот осамен на подалечната статива со глава ја затресе мрежата во 87. минута за огромна радост на сите во Бергамо.
Шортс е незадржлив, Париз ја освои и Пиреја
Париз во 14. коло од Евролигата го совлада Олимпијакос со резултат 96-90 среде Пиреја. Со оваа победа актуелниот освојувач на Еврокупот докажа дека повеќе не е изненадување во Евролигата туку легитимен кандидат за место на завршниот турнир.
Избраниците на Тиаго Сплитер го задржаа првото место на табелата во Евролигата со ско 11-3, а против грчкиот тим забележаа неверојатна десетта победа во низа, додека Олимпијакос падна на 9-5 со вториот пораз во последните три натпревари.
Гостите на полувремето заминаа со +5, а потоа следуваше фуриозен трет период (24-16) кој на Париз му донесе предност од 13 поени. .
Играчите од Париз добро ја отворија последната четвртина, направија серија и стекнаа предност од 20 поени. И тука застана. Следуваа фуриозни три ипол минути на Олимпијакос и серија од 22-0 (во која Фурние постигна 11 поени).
Следуваше неверојатна завршница. Шортс погоди тројка за +4 на Париз, Олимпијакос успеа да изедначи, имаше дури и напад за водство, но Париз се одбрани, па на 20 секунди до крајот, Ло остана сам како дух и погоди тројка за +3. Тогаш тренерот на Париз реши да влезезе во пенал завршница и тоа му се испалтеше. Фурние промаши едно фрлање, а зонскиот пресинг на домаќините беше толку лош што Јантунен остана сам под обрачот за +4.
Фурние погоди тројка од едната нога на 6,5 секунди до крајот (-1), а Ло веднаш беше фаулиран. Германецот без проблем ги погоди и двете слободни, а Фурние потоа се лизна, му падна топката, а Хифи со тројка во последната секунда стави точка на натпреварот.
Ти Џеј Шортс со 21 поен и осум асистенции го предводеше Париз, Хифи постигна 20, додека Вард имаше 14 поени. Ло уфрли осум коша од кои пет во последните 20 секунди.
На другата страна трагичарот Фурние имаше 25 поени. Везенков постигна 18 поени.
Леклер најбрз на тренингот во Абу Даби
Возачот на Ферари, Шарл Леклер беше најбрз на првиот тренинг пред Големата награда на Абу Даби, последната трка во сезоната.
Сепак, Леклер беше казнет затоа што неговиот тим постави нов акумулатор на болидот, кој го надмина дозволениот број за оваа сезона. Поради ова, Шарл ќе стартува 10 места пониско од неговиот квалификациски резултат.
Во однос на тренингот, Леклер беше за 0,221 секунди побрз од Ландо Норис од Мекларен, кој беше за 0,264 секунди побрз од возачот на Мерцедес, Луис Хамилтон.
Ферари моментално се бори за шампионската титула кај конструкторите со Мекларен, кои имаат 21 бод предност пред последната трка во сезоната.
Квалификациите ќе бидат на програмата утре од 15:00 часот, додека трката за Големата награда на Абу Даби е закажана за в недела во 14:00 часот.
Бисинов парираше едно полувреме, Еурофарм Пелистер лесно до нови суперлигашки бодови
Еурофарм Пелистер го совлада Бисинов Фриут Ленд од Велес со 45-31 во првиот натпревар од 14. коло на Суперлигата. Велешкиот тим одигра одлично прво полувреме и на одмор се замина со само +2 за домаќинот (21-19). Сепак, во вториот дел до израз дојде квалитетот кој е на страната на битолскиот тим.
Клучна беше серијата од 9-0 кон средината на второто полувреме со која Пелистер поведе со 33-22. На крајот малку недостасуваше шампионот да го надмине тимскиот рекорд за оваа сезона по бројот на постигнати голови кој изнесува 46.
Најефикасни играчи на средбата во домашниот тим беа репрезентативните крила Цветан Кузманоски и Ненад Костески со по шест, додека кај гостите се истакна ветеранот Ивица Илиев со осум гола.
Следниот викенд, во рамките на 15. коло, Еурофарм Пелистер ќе го пречека Вардар 1961.
Дончиќ ќе игра за Словенија на Евробаскетот на домашен терен
Лука Дончиќ потврди дека ќе ја води Словенија на Евробаскетот во 2025 година.
„Со нетрпение очекувам да играм за мојата земја. Гордост е, радост е да играм за мојата земја секогаш кога можам. Затоа ќе го повторам тоа“, рече Дончиќ.
Дончиќ во кариерата нема пропуштено ниту еден репрезентативен турнир.
Играше за Словенија на Евробаскетот 2017, во квалификациите за Олимписки игри и на Олимписки игри во 2021, Евробаскетот 2022, Светското првенство 2023 и квалификациите за Олимписките игри во 2024 година.
Голема е веројатноста Дончиќ да игра и на Евробаскет 2029, со оглед на тоа што Словенија е еден од кандидатите за коорганизатор на турнирот.
Словенија беше домаќин на Европското првенство во 2013 година, а Дончиќ како 18-годишник ја предводеше репрезентацијата до титулата во 2017 година.
Евробаскетот во 2025 година ќе се игра од 27 август до 14 септември следната година, а домаќини ќе бидат Кипар, Финска, Полска и Летонија.
Дончиќ оваа сезона има просек од 28,7 поени со 8 скока и 7,9 асистенции за Далас Маверикс во НБА.
