Лестер Сити ризикува одземање на бодови заради финансиски малверзации
LENS, FRANCE – AUGUST 10: Leicester City starting XI during a minute applause ahead of the Pre-Season friendly match between RC Lens and Leicester City at Stade Félix Bollaert-Delélis on August 10, 2024 in Lens. (Photo by Plumb Images/Leicester City FC via Getty Images)
Aнглискиот шампион од 2016 година, Лестер Сити, се соочува со сериозен проблем. На клубот Фудбалската асоцијација ќе му одземе бодови, што дополнително ќе влијае во борбата за опстанок во лигата.
Лестер минатото лето се спаси од казна со „измама“, за прекршување на финансиските правила за сезоната 2022/23. Фудбалската асоцијација не ги казни поради тоа што финансискиот извештај го доставија откако веќе испаднаа од лигата.
Клубот сега чека одлука за можна казна за загуби од 92,5 милиони фунти и 90 милиони фунти за финансиските години 2022 и 2023 година. Клубовите од Премиер лигата може да имаат загуби од 105 милиони фунти во период од три години.
Најдоцна до 13. јануари ФА ќе го извести клубот дали е покренато обвинение за прекршување на равилата за одржливост.
Според британските медиуми, клубот се надева дека и овојпат ќе ја избегне најлошата казна (одземање на бодови). Доколку тоа се случи клубот со една нога ќе биде во Втората лига.
Бернардо Силва: Треба да се помириме дека не се бориме за титулата
Фудбалерот на Манчестер Сити, Бернардо Силва, процени дека неговиот тим нема шанси да се бори за титулата во Премиер-лигата. „Граѓаните“ сега заостануваат 14 бодови од лидерот Ливерпул.
„Во моментов треба само да се помириме со реалноста бидејќи ние сме само шести. Во фудбалот нема невозможни работи но, нема сомневање дека сме надвор од борбата за титулата“, вели Силва.
Манчестер Сити утре ќе го пречека Вест Хем во рамките на 20-то коло во Премиер Лигата.
Киеза побарал враќање во Серија А, високата плата проблем за калчолигашите
Фудбалерот на Ливерпул, Федерико Киеза, побарал да биде испратен на позајмица во некој италијански клуб.
Киеза минатото лето се пресели од Јувентус во Ливерпул за 12 милиони евра, но одигра само четири натпревари или 123 минути за клубот од „Енфилд“.
Тој сака поголема минутажа, а како што пренесуваат италијанските медиуми, за него се заинтересирани Милан, Рома и Наполи.
„Мирор“ објави дека управата на Ливерпул ќе му дозволи на 27-годишниот играч да замине на позајмица, но дека голем проблем е што ниту еден италијански клуб не е подготвен да плати ниту половина од неговата годишна плата од 7,5 милиони евра.
Затоа, Ливерпул ќе мора да преземе дел од платата на Киеза.
Киеза во кариерата играше за Фиорентина и Јувентус, за италијанската репрезентација одигра 51 натпревар и постигна седум гола.
Лазаров: Имаме добри спомени од Хрватска, јас сум умерен оптимист пред овој турнир
Македонската ракометна репрезентација ги прави последните подготовки во Скопје пред да замине за Хрватска, каде најпрво во Вараждин ќе одигра контролна средба со домаќинот на 8.јануари, а една недела подоцна ќе ги почне и натпреварите на Светското првенство.
Денес во просториите на долгогодишниот партнер на македонскиот ракомет, Македонски Телеком, селекторот Кирил Лазаров и капитенот Филип Кузмановски ги искажаa своите очекувања за претстојниот Мундијал.
„Од 2012 година па наваму имаме еден страшен континуитет кој многу значи и кој заеднички го направивме. Како една мала држава, сакаме да признаеме или не тоа е еден голем успех за македонскиот спорт. Имаме 14 големи натпреварувања по ред на што не можат да се пофалат ниту еден од нашите соседи од Балканот, тие не секогаш биле присутни на големите турнири како нас. Тоа е голем резултат, како држава и како национален тим и се надевам дека ракометот така и ќе продолжи во иднина“, рече селекторот Кирил Лазаров.
Македонија претходно имаше два настапи на големи турнири во Хрватска, каде традиционално имавме добри настапи, па нашиот предводник се надева на истото и во оваа 2025 година со голема подршка од навивачите.
„Од Хрватска имаме позитивни спомени од Светското првенство во 2009 година и од 2018 година на Европското, каде имавме квалитетен прв круг и добри натпревари против силни репрезентации. Се надевам дека така ќе биде и оваа година. Знаеме дека ќе имаме подршка од нашите навивачи, јас и претходно кажав дека тие треба да бидат нашиот осми играч, бидејќи ја познаваат ракометната игра и во важни моменти да бидат наш играч плус и да ја имаме таа дополнителна подршка што многу ќе ни значи“.
Лазаров верува во квалитетот кој го имаат македонските играчи и затоа се селектирани во националниот тим.
„Јас сум умерен оптимист, знаејќи го нашиот менталитет и квалитет. Не сакам да создавам алиби однапред, напротив ние имаме млада селекција, ја сменивме генерацијата и имаме млади играчи кои допрво ќе го докажуваат својот квалитет, а во тоа сум сигурен. Играчи селектирани кои имаат карактер кои имаат храброст, талент и кои што се многу вредни и сакаат да работат. Мислам дека македонскиот ракомет е на добар пат и на националната селекција и следуваат многу успеси, како и на македонските клубови“, заврши нашата ракометна легенда.
Противниците на Македонија се тешки, особено Унгарија и Холандија, но и Гвинеја не треба да се потцени иако влегуваме како фаворити во дуелот со африканската селекција.
Лапорта договори враќање на Томас Ертел
Berlin, Deutschland, 14.09.2022: Thomas Heurtel (France) waehrend des Spiels der FIBA EuroBasket 2022 – Round of 8 zwischen Frankreich und Italien im EuroBasket Arena Berlin am 14. September 2022 in Berlin, Deutschland. (Foto von Pedja Milosavljevic/DeFodi Images) Berlin, Germany, 14.09.2022: Thomas Heurtel (France) during the FIBA EuroBasket 2022 – Round of 8 match between France vs Italy at EuroBasket Arena Berlin on September 14, 2022 in Berlin, Germany. (Photo by Pedja Milosavljevic/DeFodi Images) – Photo by Icon sport
Барселона експресно најде замена за Раул Нето. Бразилецот по само еден месец го раскина договорот со Каталонците. Нов плејмејкер на Барселона е искусниот Тома Ертел. Францускиот плејмејкер претходно четири годии го носеше дресот на Барселона.
„Ме изненади повикот од Барселона. Разговаравме и видовме дека ова е најдобро за двете страни, среќен сум што се враќам. Подготвен сум и мотивиран. Следам сè, кошарката е мојата страст. Барса е во комплицирана ситуација, но ќе се обидеме да направиме пресврт“, изјави Ертел и додаде:
„Јас сум истиот Тома како порано, но позрел и подобар. Моите квалитети не се променети. Тренирав многу додека бев во Кина, добро ми оди“.
Ертел дресот на Барселона го носеше во периодот 2017-2021, потоа играше во реал и Зенит од Санкт Петербург.
Ѓоковиќ изненадувачки елиминиран од Опелка во Бризбејн
Новак Ѓоковиќ во четвртфиналето го заврши настапот на турнирот во Бризбејн. Американецот, Рејли Опелка, го победи Ѓоковиќ по точно 100 минути игра со 2-0 (7-6, 6-3).
Опелка, кој по речиси две години пауза поради повреда на рамото, му се врати на тенисот и на првиот турнир забележа една од најголемите победи во кариерата. Во првиот меѓусебен дуел успеа да го победи Ѓоковиќ.
Највисокиот тенисер на АТП натпреварувањата (211 сантиметри), во Бризбејн дојде како 293. играч во светот. Најдобар пласман во кариерата му е 17.место на АТП листата.
Ѓоковиќ загуби бидејќи не можеше да го скроти сервисот на Опелка. Американецот освои 78 отсто од поените на првиот сервис и точно 80 отсто од поените на вториот сервис. Сервисот на Опелка е причината пто Ѓоковиќ во текот на целиот меч имаше само една топка за брејк, во третиот гем од вториот сет.
Американецот имше пет брејк топки, а искористи една, која му го трасираше патот кон победата, во четвртиот гем од вториот сет.
Опелка во полуфиналето ќе игра со Џовани Мпечи-Перикар, кој со 2-0 го победи Јакуб Меншик. Полуфиналето е закажано за сабота не порано од 11:30 часот.
Милан го сака Рајан Черки од Лион
Раководството на Милан покажува сериозен интерес за крилниот напаѓач на Лион, Рајан Черки, пренесува „Калчомеркато“.
Черки е офанзивен фудбалер кој може да игра и како плејмејкер, но и по крилните позиции. Тој е продукт на школата на Лион и важи за најголем француски талент во моментов.
Лион има финансиски проблеми и ги стави сите фудбалери на продажба, па Милан сака да ја искористи таквата ситуација.
Меѓутоа, конкуренцијата за потписот на 21-годишниот фудбалер е голема бидејќи интерес за него покажуваат неколку европски гиганти.
Шкрињар пред потпис со Галатасарај
Галатасарај е во напредни преговори со ПСЖ за трансфер на дефанзивецот Милан Шкрињар, пренесуваат француските медиуми.
Скринар не е среќен со неговиот статус во ПСЖ бидејќи не игра многу и е спремен да ја промени средината.
Јувентус е заинтересиран за неговиот потпис, но Галатасарај сака да ја добие битката и да го „украде“ пред носот на „старата дама“.
Шкрињар му кажал ДА на турскиот гигант, кој сака да го доведе на позајмица со право на откуп следното лето.
Почнува најновото издание на Рели Дакар
Од 4 до 17 јануари, Саудиска Арабија ќе биде домаќин на најатрактивата рели трка во светот, релито Дакар за 2025 година.
Оваа година на трката ќе учествуваат повеќе од 800 учесници. Актуелниот SUV шампион, 62-годишниот Карлос Саинц постариот, ќе се бори за петтата титула со петтиот производител, овој пат Форд.
Легендите на релито Себастиен Леб и Насер Ал-Атијах ќе возат Дачија, додека шампионите кај мотоциклистите Тоби Прајс и Сем Сандерленд заедно ќе го возат Дакар во off-road класата со модел на Тојота.
Пилотите ќе минат 12 етапи (вклучувајќи една дводневна, таканаречена „48-часовна“) и речиси 8.000 километри (специјални етапи – повеќе од 5.000 километри).
Почина најстарата олимписка победничка во историјата
Унгарската гимнастичарка Агнес Келети, најстарата олимписка шампионка во светот, почина утринава на 104-годишна возраст во болница во Будимпешта, потврди Унгарскиот олимписки комитет.
Келети е родена на 9 јануари 1921 година во Будимпешта во еврејско семејство, го преживеала холокаустот, освоила пет златни олимписки медали, три сребрени и две бронзени, а подоцна се посвети на тренерската работа. Таа била хоспитализирана во саботата во критична состојба поради проблеми со срцето и тешкотии со дишењето.
Оваа легендарна гимнастичарка, која за неколку дена би наполнила 104 години, почнала да се занимава со спорт уште како дете и го освоила првото злато на националното првенство во 1940 година. Во 1944 година, кога пронацистичкиот режим во Унгарија почнала да ги депортира Евреите во логори на смртта, Келети успеала да побегне користејќи лажни документи и да се скрие во едно мало село.
По војната, таа станала дел од унгарскиот тим за гимнастика. Таа го освои своето прво олимписко злато на Игрите во Хелсинки во 1952 година, откако повредата ја спречи да учествува во Лондон во 1948 година. Таа освои уште еден сребрен и два бронзени медали во Хелсинки. Четири години подоцна, на Олимпијадата во Мелбурн во 1956 година, Келети се истакна, освојувајќи четири златни медали и еден сребрен во екипна конкуренција.
По Олимпијадата, Келети се преселила во Израел, каде што работела како универзитетски професор и тренер. Од 1990 година, по падот на Железната завеса, таа поминувала сѐ повеќе и повеќе време во Унгарија.
Келети беше примена во Куќата на славните за уметничка гимнастика во Оклахома во 2002 година. По повод нејзиниот 100-ти роденден, Меѓународниот комитет за фер-плеј (НФПБ) ѝ додели награда за животно дело, истакнувајќи го нејзиниот живот „обележан со прифаќање и толеранција, кои се основните идеи на фер-плејот“.
На 102-годишна возраст, Келети рече дека вежба секојдневно, ужива во овошје и чоколадо и гледа натпревари во гимнастика на интернет без наочари. Позната по својата духовита природа, Келети имала необичен одговор на прашањето за тајната на долговечноста: „Избегнувам да се гледам во огледало“.
