feature

Кристијано Роналдо тренира во тренинг базата на Реал Мадрид

Португалската фудбалска ѕвезда, Кристијано Роналдо, после завршувањето со настапите на Светското Првенство во Катар, се врати во Реал Мадрид каде беше забележан во спортската тренинг база на клубот,Валдебебас, но на посебен терен. Кристијано тренира во Мадрид за да ја одржува натпреварувачката форма, а тоа е благодарение на неговиот одличен однос со клубот.

Роналдо се уште е во преговори за свој иден клуб, при што Португалецот е поврзан со неколку тимови, а како фаворит за негов потпис се споменува клубот Ал-Насер од Саудиска Арабија.

Павард ќе го напушти Баерн Минхен после завршувањето на сезоната

Весникот Билд пренесува дека дефанзивецот на Баерн Минхен и француски репрезентативец, Бенжамин Павард, нема намера да го продолжи договорот со баварскиот клуб. Според информациите, францускиот фудбалер ќе бара нов професионален предизвик и сака да се пресели во друг тим во летото 2023 година.

Претходно беше објавено дека за услугите на Павард е заинтересирана Барселона. Актуелниот договор на дефанзивецот со Баерн е до летото 2024 година. Според наводите, челниците на германскиот клуб се подготвени да го пуштат Павард да си замине ова лето доколку за него пристигне соодветна понуда.

Дешамп: Горд сум на оствареното од моите момци

Селекторот на француската фудбалска репрезентација Дидие Дешамп изјави дека е горд на вечерашната победа против Мароко и дека пласманот во финалето на Светското првенство е награда за неговите играчи.

„Има многу емоции, гордост. Очигледно денеска беше тежок меч. Еден месец сме заедно, никогаш не е лесно, но досега беше задоволство и моите играчи беа наградени“, изјави Дешамп.

„Триколорите“ по четвртипат стигнаа до финалето и ќе се обидат да станат првата репрезентација која ја одбранила титулата по Бразил во 1962 година. Франција е првата селекција што успеала да стигне до финалето на Светското првенство двапати по ред по Бразил во 2002 година, и првата европска селекција што го постигнала тоа по Германија во 1990 година.

Лестер нуди 40 милиони фунти за Мароканецот Унахи

Англискиот премиерлигаш Лестер, е заинтересиран за доведување на играчот на Анже и репрезентативец на Мароко, Азедин Унахи.

Според објавите во медиумите од Англија, Лестер за 22-годишниот фудбалер за врска е подготвен да понуди сума од 40 милиони фунти.

Унахи на Светското првенство во Катар ги одигра сите натпревари за репрезентацијата на Мароко и со своите настапи го привлече вниманието на големите европски клубови.

Дембеле се сели од Барселона во ПСЖ?

Пари Сент Жермен не се откажува од намерата да го доведе Осман Дембеле во своите редови. Минатото лето ПСЖ се обиде да го доведе Французинот во Париз, но Дембеле сепак се одлучи да остане на „Камп Ноу“.

Дембеле ги прифати условите на Барселона, но стави потпис на договор само до 2024 година.

Така 25-годишниот крилен напаѓач на лето ќе влезе во последната година од договорот, а ПСЖ ќе се обиде да го доведе во своите редови.

Дембеле игра одлично оваа сезона и на Мундијалот, па ПСЖ е спремен да му понуди значително повисока плата за да го убеди да се пресели во Париз.

Тите преплавен од понуди по заминувањето од бразилската клупа

Поранешниот бразилски селектор Тите наскоро може да се врати на тренерската работа.

61-годишниот фудбалски стрчњак ја напушти функцијата во бразилската репрезентација веднаш откако Бразил загуби од Хрватска во четврт-финалето на Светското првенство 2022 година (1:1 и 2:4 на пенали).

Според одредени извори во Бразил, Тите веќе добил пет понуди за работа, од кои три од репрезентации, а уште две од клубови од Европа. Во исто време се известува дека поранешниот кормилар на јужноамериканците има намера да се одмори, па нема да брза што побрзо да се врати на тренерската работа.

Тите ја предводеше бразилската репрезентација од летото 2016 година. Претходно беше тренер на многу клубови во својата земја, а работеше и со екипи од ОАЕ.

Меси најави дека финалето ќе биде негов последен натпревар во репрезентативната кариера

Аргентина се пласираше во финалето на Светското првенство откако вчера ја победи Хрватска со 3-0, а Меси уште еднаш дојде блиску до трофејот кој му недостига во спектакуларната кариера.

Меси игра фантастично Светско првенство и повторно потсетува на неговите најдобри денови од Барселона. На четири натпревари од шест колку што досега одиграа Аргентинците Меси беше играч на мечот.

Големото финале в недела од 16:00 часот ќе биде неговиот последен натпревар во дресот на Аргентина.

„Горд сум што ќе ја завршам репрезентативната кариера со настап во финале на Светско првенство. Неверојатно е ова што му се случува.

Во недела ќе играм најдобро што можам. Уживам и се чувствувам подготвен за натпреварот. За Хрватска добро се подготвивме и знаевме да ги искористиме нејзините слабости“, изјави Меси.

Во финалето Аргентина го чека подобриот од денешното второ полуфинале помеѓу Франција и Мароко.

Реграги: Најважно е дека го дадовме својот максимум

Селекторот на фудбалската репрезентација на Мароко, Валид Реграги, во изјава после поразот со 2:0 од Франција во полуфиналето од Мундијалот во Катар, истакнува дека неговите фудбалери го дадоа својот максимум.

„Најважно е дека го дадовме својот максимум. Загубивме доста играчи поради повреди, и тоа беше премногу за нас. Имавме одличен настап во второто полувреме и сум презадоволен од своите фудбалери. За да победиме на светско првенство ќе мораме уште да работиме, но мислам дека не сме далеку од тоа“, порачува Реграги.

Мароко е првата африканска репрезентација која настапила во полуфинале на светско фудбалско првенство. Во сабота од 16:00 часот Мароко ќе игра против Хрватска за третото место на Мундијалот.

Касиљас: Пеналот за Аргентина е неправедно досуден

Поранешниот голман на Реал Мадрид и шпански репрезентативец, Икер Касиљас, изјави дека пеналот за Аргентина во полуфиналниот дуел од Мундијалот против Хрватска е неправедно досуден.

Касиљас во изјава за шпанскиот јавен сервис рече дека Хулијан Алварез направил прекршок над голманот Ливаковиќ, а не обратно.

Пеналот кој во 34.минута од средбата беше досуден од судијата Даниеле Орсато, успешно го реализира Лионел Меси, за на крај репрезентацијата на Аргентина да се пласира во финалето од Светското првенство совладувајќи ја Хрватска со 3:0.

Влаховиќ размислува да го напушти Јуве

Напаѓачот на Јувентус, Душан Влаховиќ би можел да го напушти тимот на крајот на сезоната, според одредени информации кои ги објавија медиумите во Италија. Двете страни се согласни за таков потег. Главните причини се две: финансиските проблеми на клубот и честите повреди на српскиот интернационалец, кои го спречуваат да го открие целиот свој потенцијал.

Влаховиќ е посакуван од лондонските екипи Челзи и Арсенал. „Топчиите“ се надеваа дека ќе го купат во јануари оваа година, но тогаш самиот фудбалер инсистираше да потпише со Јувентус и покрај непријателството меѓу „бјанконерите“ и неговиот поранешен клуб Фиорентина.

Јувентус во Србинот вложи 81,6 милиони евра и мора да плати уште 10 милиони на „виолетовите“ во вид на бонуси. Влаховиќ многу силно го започна престојот во гигантот од Торино, но потоа почна да пропушта многу натпревари поради повреди. Во тековната сезона има 15 настапи и 7 голови во сите натпреварувања. Јувентус сигурно нема да го пушти Влаховиќ во зимскиот преоден рок и ќе ги разгледа можните понуди за него по завршувањето на сезоната.

«< 863 864 865 866 867 >»