Селекторот на аргентинската фудбалска репрезентација, Лионел Скалони, после пласманот во осминафиналето на Светското првенство, изјави дека неговата екипа сеуште не е кандидат за титулата и истакнува дека е погрешно да се верува дека дуелот со Австралија ќе биде лесен.

„Среќни сме со пласманот во нокаут фазата. Секој натпревар на Светското првенство е тешка. Изгубивме од Саудиска Арабија, кога никој не го очекуваше тоа, можете за загубите и кога играте добро. Грешка е да се верува дека натпреварот против Австралија ќе биде лесен. Ние уште не сме кандидати за титулата, но ќе се бориме до крај на секој натпревар“, потенцира Скалони.

Аргентина натпреварите од групната фаза ги заврши како првопласирана во групата Ц, и во осминафиналето ќе игра против Австралија која беше второ пласирана во групата Д.

Капитенот на фудбалската репрезентација на Полска, Роберт Левандовски, изјави дека никој нема да се сеќава како неговата селекција го одигра натпреварот во кој беше поразена од Аргентина, и дека сега е најважно да бидат спремни за осминафиналето и дуелот со Франција.

„Ова не беше натпревар за напаѓач како мене, но јас знаев дека ќе биде така. За мене и за репрезентацијата на Полска овај пласман е успех. Никој нема да го памети начинот на кој го одигравме мечот со Аргентина. Важно е само да бидеме спремни за натпреварот против Франција“, изјави Левандовски.

Репрезентацијата на Полска се пласира во осминафиналето од СП во Катар и покрај поразот од Аргентина со 2:0, бидејќи на крајот имаа подобра гол разлика во однос на Мексико кој имаше ист број на бодови со Полска.

33-годишниот фудбалер на Лос Анџелес, Герет Бејл кој со неговиот Велс е елиминиран од Мундијалот во Катар, ги негира најавите дека ќе се повлече од селекцијата.

„Ќе продолжам додека можам и добивам повик. Тежок момент но, не се откажувам. Квалификациите за ЕП почнуваат во март и се надевам дека ќе бидам таму” – изјави Бејл и се насочи на настапот на СП.

„Не ги оправдавме очекувањата но, мораме да бидеме горди и задоволни. Бевме на голем фудбалски настан“, потенцираше првата ѕвезда на Велс.

Французинката Стефани Фрапар ќе биде прва жена која ќе суди натпревар на Светско фудбалско првенство за мажи. Таа ќе биде судија во четврток од 20.00 часот на дуелот помеѓу селекциите на Германија и Костарика.

Стефани Фрапар е една од трите жени од вкупно 36 судии кои се избрани за Светското првенство во Катар. Освен Фрапар, нејзини колешки се и Салима Мукансанга од Руанда и Јапонката Јошими Јамашита.

Конзулот на Италија во Катар, Енрико Маса, изјави дека неговиот сонародник, кој истрча на теренот со знаме од виножито за време на натпреварот на Светското првенство меѓу Португалија и Уругвај, е ослободен. Самиот навивач на една од социјалните мрежи потврди дека неговото дело не повлекувало никакви правни последици.

„Младиот навивач кој го предизвика инцидентот беше ослободен веднаш по натпреварот, без обвинение. Други информации нема да бидат откриени поради лична доверливост“, изјави Енрико Маса.

Инцидентот се случи во второто полувреме од средбата. Навивачот истрча на теренот со знаме со виножито на кое пишуваше PACE (Знаме на мирот), а на маицата на мажот стоеше зборовите „Save Ukraine“ и на задната страна: „Respect for Iranian Woman“. Навивачот кој влезе на теренот веднаш беше изнесен од теренот, а екипите ја продолжија играта.