Екипата на Њукасл во наредниов период ќе настапува без Киран Трипие, бидејќи играчот заработи повреда на дуелот со Астон Вила кој заврши со 1:0 за „црно-белите“.

Единствениот гол на натпреварот го постигна токму Трипие, но англискиот репрезентативец беше приморан во 48.минута да го напушти теренот, поради болки во стапалото. Сериозноста на повредата е откриена после деталните прегледи од медицинскиот тим на екипата.

Киран Трипие е едно од најзвучните засилувања на Њукасл во јануарскиот преоден рок, кога за 15 милиони евра пристигна од Атлетико Мадрид.

Жозе Мурињо оваа сезона со Рома не ги остварува очекуваните резултати, а последниот пораз од Интер посебно го налути „Специјалниот“.

Мурињо е спремен на лето да направи целосна реконструкција на тимот, па на неколку фудбалери ќе му ја покаже излезната врата.

„Кориере дело Спорт“ пишува дека пет фудбалери би можеле да го напуштат „Олимпико“ на крајот на сезоната за да може да продолжи проектот на Мурињо.

Едно од најголемите изненадувања најверојатно ќе биде заминувањето на Николо Заниоло, талентираниот 22-годишен фудбалер, кој не сака да го продолжи договорот.

Раководството му дозволило буџет од 100 милиони евра и одврзани раце на Мурињо да состави тим по своја мерка.

Мемфис Депај може да смени тим ова лето. Наполи е заинтересиран за услугите на 27-годишниот играч, според „Calciomercato.com“.

Според изворот, клубовите веќе преговараат за трансферот на Холанѓанецот. Забележано е дека Барса е подготвена да го пушти играчот да си оди. Проблем за евентуална преселба на Депај во Наполи е платата на напаѓачот. Наполи го гледа Мемфис Депај како замена за Лоренцо Инсиње, кој ќе го напушти тимот на лето.

Претходно беше објавено дека управата на Барселона сака да го продаде Холанѓанецот во текот на летниот преоден рок, за да не го загуби играчот бесплатно, бидејќи договорот на Депај со Барселона е до јуни 2023 година. Депај е во Барселона од летото 2021 година. Депај оваа сезона настапи на 16 натпревари во Примера, постигнувајќи осум гола и две асистенции.

Тренерот на Тотенхем, Антонио Конте призна дека на неговиот тим ќе му биде многу тешко да се избори за место во Лигата на шампионите.

„Спурсите“ повторно разочараа доживувајќи нов пораз, овојпат на домашен терен од екипата на  Вулверхемптон со 0:2.

Со ова лондонскиот тим сериозно заостана во борбата за пласман во Топ 4. Тотенхем е на осмото место со 36 бодови, а на четвртата позиција е Вест Хем кој има 41 бод.

„Невозможно е да се пласирате во Лигата на шампионите кога губите толку натпревари дома.Знаеме дека треба да се бориме за да направиме нешто многу важно во конкретната ситуација, но исто така е многу важно да се знае точно каква е ситуацијата. Можеби нашите навивачи не треба да бидат разочарани од поразот. Наместо тоа, тие треба да се обидат да останат зад нас. Навивачите мора да ја создаваат вистинската атмосфера на стадионот и да не размислуваат за целта која во моментов е недостижна. Ова го кажувам од почетокот, кога пристигнав тука“, изјави Конте.

Реал Мадрид бара замена за бразилскиот дефанзивец Марсело, кој најверојатно ќе стане слободен играч во летото 2022 година.

Се најавува дека шпанскиот клуб размислува за враќање на шпанскиот фудбалер Серхио Регилон, ова го пренесува „Мундо Депортиво“. 25-годишниот Регилон е „дете“ на мадридскиот клуб. Реал Мадрид го продаде играчот на Тотенхем во септември 2020 година за 30 милиони евра. Според изворот, шпанскиот тим има опција да го купи Регилон за 40 милиони евра, но таа завршува ова лето.

Сезонава Регилон на 24 натпревари во сите натпреварувања постигна еден гол и имаше три асистенции во дресот на Тотенхем.

Поранешниот капитен на фудбалската репрезентација на Македонија, Горан Пандев, кој сега настапува во Серија Б, за екипата на Парма, поради повреда ќе ги пропушти средбите против Кремонезе и Тернана.

Пандев беше заменет од игра во второто полувреме од дуелот со Порденоне на кој беше стрелец на првиот гол во новиот тим. По завршувањето на натпреварот, од клубот информираа дека Пандев имал мал мускулен проблем но дека повредата не е сериозна.

Парма се наоѓа на 11.метсто од табелата, со освоени 28 бода.

Поранешниот светски и европски шампион со Франција, Лоран Блан, повеќе не е тренер на катарскиот клуб Ал Рајан. 

Причината за разделбата на Ал Рајан со 56-годишниот Французин се лошите резултати на екипата. Во моментов, тимот е само деветти од вкупно 12 екипи во катарскиот шампионат, иако Ал Рајан располага со одлични фудбалри како Колумбиецот Хамес Родригез и Французинот Стивен Нзонзи.

Стефан де Вриј на крајот на сезоната би можел да го напушти миланскиот гигант, пренесуваат италијанските медиуми.

Договорот на Де Вриј со Интер истекува во јуни 2023 година, нема најава за негово продолжување, па Холанѓанецот на лето ќе влезе во последната година од договорот.

Интер е спремен да го продаде, а најсилен интерес за неговиот потпис покажува Тотенхем.

Конте сака да ја засили одбраната, а одлично го познава Де Вриј и смета дека би бил идеално засилување за неговиот тим. Холанѓанецот исто така е спремен да се пресели во Премиер лигата.

„Спарси“ се спремни за неговиот потпис да понудат 30 милиони евра, а Интер како негова замена сака да го донесе Бремер од Торино.

Карим Бензема се најде на списокот со играчи на Реал Мадрид за гостувањето кај Париз Сен Жермен во првата пресметка од осминафиналето на Лигата на шампионите. 

Искусниот напаѓач три недели е надвор од терените откако се здоби со повреда. Неговото враќање во тимот беше одложено, бидејќи тренерот Карло Анчелоти беше категоричен дека нема да ризикува со неговото опоравување. Според денешните информации, Бензема одржа целосен тренинг со екипата и е спремен за настап во Париз.