Лука Модриќ ќе се согласи да го продолжи договорот со Реал Мадрид за уште една сезона, објавија медиумите во Шпанија.

Познато е дека „кралевите“ не практикуваат долгогодишни договори со фудбалерите на негова возраст и затоа ќе ја искористат единствената опција. Според Марка, 36-годишниот хрватскиот играч за врска ја прифаќа политиката на клубот и ќе потпише до летото 2023 година.

Модриќ во сезонава одигра 24 натпревари и постигна 2 гола.

Поранешниот напаѓач на Арсенал, Пјер-Емерик Обамејанг, преку специјална објава на социјалните мрежи се прости од навивачите на „топчиите“. Фудбалерот се раздели од клубот и потпиша договор со екипата на Барселона.

„Ви благодарам што го направивте Лондон мој дом и дом на моето семејство во изминативе четири години. Заедно поминавме низ подеми и падови, но вашата поддршка беше огромна. Отсекогаш сум бил 100 % фокусиран и посветен да дадам се за клубот, и боли да си одам без збогум, но фудбалот е таков. Тажен сум што во последните неколку недели немав можност да им помогнам на моите соиграчи, но имам огромна почит кон клубот и навистина им посакувам многу успех на моите пријатели и навивачи во наредните години“, изјави Обамејанг.

Барселона го извести обвинителството бидејќи пронајде „криминал“ при работењето на претходното раководството. Спорни се два трансфери, тие на Антоан Гризман и Малком, пренесуваат каталонските медиуми.

Според собраните информции и документација, сегашното раководство има основано сомнение за криминал и корупција при овие два трансфери.

Гризман беше купен во 2019 година од Атлетико Мадрид за 120 милиони евра, а потоа Каталонците им платија уште 15 милиони евра на „јорганџиите“.Атлетико Мадрид ја обвини Барселона за нерегуларности, дури достави и жалба до федерацијата, па за случајот да не заврши на суд, двата клуба  се договорија да бидат платени додатни 15 милиони евра.

Исто така спорни се и четири провизии кои Барса ги платија при реализација на трансферот на Гризнан и тоа на неговата сестра, тратко, агент и на семејниот адвокат на Французинот.

Новиот голгетер  на Јувентус, Душан Влаховиќ ќе живее во куќата во која престојуваа Кристијано Роналдо и неговата вереница Џорџина Родригез, додека Португалецот го носеше црно-белиот дрес на „старата дама“.

Српскиот напаѓач го избрал суперлуксузниот имот поради безбедносни причини. До куќата, која се наоѓа на периферијата на Торино, се стигнува по приватен пат, кој деноноќно се обезбедува.

Во периодот пред трансферот од Фиорентина во Јувентус, Влаховиќ доби голем број закани, поради што ангажираше обезбедување додека се уште настапуваше во Фиренца.

Легендарниот бразилски фудбалер Роналдо откри кој играч според него е најдобар актуелен напаѓач во светот.

„Најдобар напаѓач на светот денес? Според мене тоа е Карим Бензема. Левандовски е блиску до него, а Халанд ќе биде на врвот во наредните години. Разликата е во тоа што Норвежанецот ја нема техниката на останатите двајца“.

Роналдо меѓу другото проговори и за кариерите на Лионел Меси и Кристијано Роналдо : „Да имав мозок во главата колку тие двајца, ќе постигнев двојно повеќе голови во мојата кариера,“ порача Роналдо.

Франк Лампард кој од вчера го презеде кормилото на фудбалскиот состав Евертон има намера да го ангажира во стручниот штаб неговиот поранешен соиграч од Челзи, Ешли Кол, најавија медиумите во Англија.

Легендарниот лев бек моментално работи во Академијата на „сините“ и  паралелно како тренер на младата селекција на Англија.

Кол доколку ја прифати понудата ќе им се придружи на: Џо Едвардс,  Пол Клемент,  Крис Џонс,  Данкан Фергусон и тренерот на голманите Алан Кели.

Клубовите во англиската Премиер лига потрошија четири пати повеќе во изминатиот месец споредено со јануари во 2021 година.

Тука во преден план се наметна тимот на Њукасл кој има нови богати сопственици. Според проценките, екипите од Островот  потрошиле вкупно 295 милиони фунти за трансфери што е многу повеќе од минатогодишнте 70 милиони, но, далеку од 430-те милиони од зимата во 2018 година.

Интересно е дека Манчестер Јунајтед, не потроши ниту денар за нови играчи, но, профитираше од трансферите на Ентони Марсијал и Дони ван де Бек.

Новото засилување во тимот на Тотенхем, Дејан Кулушевски вели дека научил многу во Италија, играјќи за Аталанта, Парма и Јувентус. 

Тој призна дека се преселил во тимот од Лондон поради Антонио Конте. „Со нетрпение очекувам да играм под водство на тренерот. Го познавам од неговиот престој во Интер. Тој е победник и тоа е нешто кон што и самиот се стремам да бидам “, изјави поранешниот играч на Јувентус.

Шведскиот репрезентативец кој е со македонски корени ќе остане на позајмица во Тотенхем до јуни 2023 година, за што клубот издвои 10 милиони евра.

„Среќен сум што сум овде. Важно е да се забавувате кога играте. Се преселив во Аталанта од Бергамо на 15 години, беше забавно но и тешко. Имав две интензивни години во Јувентус со двајца различни тренери. Таму научив многу, играјќи со некои од најдобрите светски фудбалери. Беше големо искуство, но Премиер лигата е најдобра во светот“, изјави Кулушевски во своето прво интервју по потпишувањето за Тотенхем.