Арон Рамзи ги одби понудите на Кристал Палас, Њукасл и Барнли. Велшкиот репрезентативец има договор со Јувентус до летото во 2023 година и нема намера да си замине од тимот.

Тоа ги налути шефовите на „старата дама“ кои најверојатно ќе го префрлат во младинската екипа.

Поранешниот играч на Арсенал во 2019 година се пресели во Торино и стана еден од најплатените. Тој има одиграно 70 мечеви и постигнато шест голови.

Напаѓачот Лука Јовиќ нема да може да го напушти Реал Мадрид оваа зима.

Мадриѓаните се во тешка ситуација поради тоа што се повредени напаѓачите Карим Бензема и Маријано Дијаз. Иако закрепнувањето на двајцата играчи нема да одземе многу време, натпреварите кои ќе се играат во овој сегмент можеби ќе бидат клучни за Реал, па во клубот стравуваат од дополнително слабеење на напаѓачката линија.

Интерес за Јовиќ покажа Арсенал, но официјална понуда за трансфер на Србинот не беше дадена, а Реал Мадрид сега не е заинтересиран за договор. Јовиќ оваа сезона одигра 11 натпревари во Ла Лига и постигна еден гол.

Според пишувањата на познатиот спортски новинар од Италија, Танкреди Палмери, раководството на Ливерпул стапило во контакт со играчот на Јувентус, Пауло Дибала.

Новинарот известува дека англискиот клуб одржал прелиминарни разговори со 28-годишниот Аргентинец, со цел да се запознаат со неговиот статус во Јувентус и плановите за неговата натамошна кариера.

Од Јувентус претходно му понудија нов договор на Дибала, но двете страни не постигнаа согласност околу висината на финансиските примања. Аргентинскиот напаѓач за шест месеци ќе биде слободен играч и може да се пресели во друг клуб без обештетување.

Дибала оваа сезона одигра 23 натпревари за Јувентус во сите натпреварувања, постигнувајќи 11 голови и 4 асистенции.

Екипата на Саутемптон планира да достави понуда од 25 милиони фунти за позајмениот играч од Челзи, Армандо Броја.

Албанскиот интернационалец кој моментално игра за популарните „светци“ е еден од најдобрите поединци во екипата. Тој успеа да биде стрелец на 7 гола во 21 натпревар од неговото пристигнување како позајмен играч од Челзи.

Позајмицата на Броја е до крајот на сезоната но без право на откуп, меѓутоа од Саутемптон се надеваат дека Челзи ќе одреди цена за продажба на напаѓачот и тој ќе може да трајно да премине во клубот од „Сент Мери“.

Според информациите од Англија, менаџерот на Усман Дембеле веќе неколку дена води клучни разговори со претставници на Челзи за евентуален трансфер на во тековниот месец.

После неговото враќање во Барселона ќе бидат познати повеќе детали за текот на разговорите и за тоа дали неговиот клиент ќе го прифати „ултиматумот“ на Каталонците за напуштање на клубот.

Доколку тимот од Лондон не успее во намерите да го доведат Дембеле на Стемфорд Бриџ во јануари, тогаш клубот најверојатно ќе потпише договор со него како слободен играч во текот на летото. Обложувалниците на Островот веќе го одредија европскиот шампион како фаворит број 1 за следнa дестинација на Французинот.

Изгледа дека Томас Тухел и Усман Дембеле ги очекува нова заедничка соработка после онаа во тимот на Борусија Дортмунд.

Најдобриот стрелец во првата македонска лига Мартин Мирчевски преговара со Фенербахче, пренесуваат медиумите во Турција.

Новинарот Арда Бирбен како ексклузивна информација пренесува дека преговорите помеѓу Мирчевски и Фенебахче се започнати, а неговиот агент утре ќе пристигне во Истанбул.

Од почетокот на преодниот рок Мирчевски се поврзува со повеќе клубови, но дефинитивно Фенербахче до овој момент е најголемото име. Секако дека трансфер во турскиот гигант би бил голем чекор за напаѓачот на Академија Пандев.

Медиумите во Шпанија пренесуваат дека Барселона води интензивни преговори за привлекување на играчот од средниот ред на Милан, Франк Кеси.

Репрезентативецот на Брегот на Слоновата Коска одбива да го продолжи договорот со Милан и веќе од на лето е слободен играч.

25-годишниот Кеси би донел голема стабилност и цврстина во тимот на Чави кој претежно е составен од помлади играчи.

Оваа сезона тој за Милан има одиграно 16 натпревари во серија А и постигнати 5 гола.

Тотенхем упатил понуда до Порто за напаѓачот Луис Дијаз, пренесуваат медиумите во Португалија. Лондонскиот тим нуди 45 милиони евра плус бонуси, давајќи рок од 48 часа да одговорат од Порто.

Сепак, Луис Дијаз е и трансферна цел на Ливерпул и некои други екипи од Англија, а на почетокот на овој месец Ливерпул излезе со понуда вредна 70 милиони евра. Сепак, тоа беше одбиено бидејќи раководството на Порто сака да добие 80 милиони, што е еднакво на откупната клаузула. Ако се следи логиката, тоа речиси сигурно значи дека Тотенхем нема да може да го купи колумбискиот фудбалер. Луис Дијаз делува како крилен напаѓач. Тој има 25 години и ја поминува третата сезона во Порто. Во тековната сезона тој има 16 гола и 6 асистенции во 28 натпревари во сите натпреварувања.

Манчестер Јунајтед и Њукасл се исто така меѓу клубовите за кои се вели дека имаат интерес за Јужноамериканецот.

Интер и Аталанта се договорија за трансфер на левиот бек Робин Госенс, пренесуваат италијанските медиуми.

Госенс игра фантастично во дресот на Аталанта, а блесна и на ЕУРО во дресот на германската репрезентација. 26-годишниот Германец има договор со клубот од Бергамо до јуни 2023 година. Поради тоа Аталанта се согласи да го продаде во јануари.

Германецот е еден од најдобрите фул-бекови во Серија А и го привлече вниманието на многу европски гиганти, па сигурно ќе биде големо засилување за Инзаги.

Ливерпул и Манчестер Сити, ги направиле првите контакти со младиот напаѓач на ПСВ Ајндховен, Коди Гакпо,.

ПСВ се обидува да му го продолжи договорот кој е валиден до летото во 2025 година. Веб-страницата „Transfermarkt“ , проценува дека младиот играч вреди околу 22 милиони евра што нема да биде проблем ниту за „црвените“ ниту за „граѓаните“.

Гакпо во сезонава одигра 15 мечеви. Тој даде 6 голови и направи 10 асистенции.