Како што пренесуваат шпанските медиуми, екипата на Реал Мадрид е блиску до ангажман на фудбалерот на Милан, Френк Кеси, со кого веќе започна преговори за негово доаѓање на „Сантијаго Бернабеу“.

Планот на Реал е да го доведе Кеси како слободен играч ова лето, бидејќи неговиот договор со Милан завршува во јуни и играчот веќе има право да преговара со останати клубови.

Репрезентативецот на Брегот на Слоновата коска во дресот на Милан е од 2017 година, за кој забележа 205 настапи со постигнати 35 гола и 16 асистенции.

Колумбиецот Радамел Фалкао ќе остане во тимот на Рајо Ваљекано уште една сезона. Тој досега настапува во одлична форма за екипата каде соиграч му е македонскиот репрезентативен голман, Столе Димитриевски.

35-годишниот Фалкао досега постигна 5 гола на 11 натпревари во дресот на Рајо и неговата постојана игра ќе му ги задржи шансите за негов настап за Колумбија на престојното Светско првенство во Катар.

Екипата на Интер сака по секоја цена да се реши од услугите на Алексис Санчез за да ги намали високите трошоци кои ги издвојува за неговата плата.

За таа цел 33-годишниот Чилеанец е понуден бесплатно на премиерлигашот Евертон и тренерот Бенитез.

Ова ќе биде враќање за Санчез во Англија, каде претходно настапуваше за Арсенал Манчестер Јунајтед.

Пари Сен Жермен официјално соопшти дека Лионел Меси нема да игра вечер на гостувањето кај Лион, во натпреварот од 20. коло на француската Лига 1.

Да потсетиме, Меси имаше позитивен тест на коронавирус за време на божиќните и новогодишните празници, додека беше во родната Аргентина. Меѓутоа, во вторник, на 5 јануари, Меси доби два негативни теста на ковид-19, што му донесе право да се врати во Париз.

Но, водечкиот француски тим во Лига 1 откри дека Меси „ќе го продолжи својот индивидуален протокол за опоравување во следните неколку дена“.

Во ПСЖ моментално се позитивни на КОВИД-19 Анхел Ди Марија, Јулијан Дракслер, Данило Переира, Лајвин Курзава и Џанлуиџи Донарума.

ПСЖ моментално води на табелата и има десет бода повеќе од Марсеј кој е втор. Лион е само на 13. место.

Извршниот директор на Борусија Дортмунд, Ханс-Јоаким Вацке во изјава за германските медиуми објави дека клубот нема да го продаде напаѓачот Ерлинг Халанд овој месец.

„Халанд нема да замине во јануари. Нема шанси тоа да се случи. Кој би се согласил да го продаде најдобриот напаѓач во Европа за време на зимската пауза кога нема потреба да го стори тоа?“, изјави Вацке.

Сепак, тој признава дека на клубот ќе му биде тешко да ја задржи својата ѕвезда следната сезона. „Секако дека сакаме да остане, но ќе биде многу тешко,но тоа не значи дека нема да се трудиме да го задржиме“,појасни Вацке.

Тренерот на Тотенхем, Антонио Конте објави дека тимот до крајот на месецов ќе настапува без еден од најдобрите играчи, Хеунг-Мин Сон.

Напаѓачот од Јужна Кореја има проблеми со повреда која се очекува да биде санирана до крајот на јануари, па така Сон нема да може да игра на неколку наредни средби на клубот од Лондон.

Тој најверојатно го пропушта гостувањето против Морекомб во ФА Купот, реванш дуелот со Челзи во Лига купот како и градското дерби против Арсенал.

Антоан Гризман беше стрелец во победата на Атлетико од 5:0 над Рајо Мајадахонда во Купот на кралот, но заработи повреда на крајот од натпреварот.

Засега нема подетални информации од клубот, меѓутоа според весникот „АС“, Гризман поради повреда на бутниот мускул ќе биде надвор од терените помеѓу 4 и 5 недели.

Во овој период, Атлетико Мадрид има многу згуснат распоред,и го очекува меч со Атлетик Билбао во полуфиналето на шпанскиот Суперкуп, потоа гостување кај Реал Сосиедад за Купот на кралот и натпревар во Ла Лига со Валенсија.

Германскиот фудбалер Пол Ванер стана најмладиот играч на клубот на натпревар од Бундеслигата. Тој со 16 години и 15 дена дебитира за баварскиот гигант на средбата со Борусија Менхенгладбах во натпреварот од 18. коло на шампионатот во Германија.

Ванер во игра влезе во 75. минута но не успеа да му помогне на својот тим да го избегне поразот (1-2).

Претходно, најмлад фудбалер на Баерн на меч од Бундеслигата беше Џамал Мусиала со 17 години и 115 дена.

Ванер оваа сезона одигра 17 натпревари за младинскиот тим на Баерн Минхен, постигна три гола и три асистенции.