Иако се најавуваше негово враќање во Џенова, Криштоф Пјонтек се реши да се врати во Италија, но во дресот на Фиорентина.

Пјонтек во редовите на Фиорентина пристигна на позајмица, а клубот од Фиренца ќе има опција да го откупи неговиот договор за 15 милиони евра на крајот од сезоната. Доаѓањето на Пјонтек можеби е најава за заминување на Душан Влаховиќ кој е мета на голем број европски гиганти.

Пред неколку дена се најавуваше дека Пјонтек ќе се врати во Италија, но во „неговата“ Џенова каде што го играше најдобриот фудбал во кариерата сепак тоа не се случи. Пјонтек во  Џенова на 21 натпревар постигна 19 гола по што следуваше трансфер ов Милан за 35 милиони евра.

Од фудбалскиот клуб Рома официјално ја потврдија веста за ангажманот на Ејнсли Мејтланд-Најлс од Арсенал. 

24-годишниот Англичанец ќе настапува за тимот на Жозе Мурињо како позајмен играч до крајот на сезоната.

„Среќен сум што ќе играм за Рома. Сакам да му помогнам на тимот и да покажам за што сум способен. Голема благодарност до навивачите за поддршката. Се надевам дека ќе бидат задоволни од моите игри до крајот на сезоната“, изјави Мејтланд-Најлс за официјалниот сајт на екипата од Рим.

Бенжаман Менди денес бил ослободен од судот во Честер, откако судијата го прифатил неговото барање за кауција и бранење од домашен притвор.

Фубалерот кој е суспендиран од Манчестер Сити е обвинет за напад на пет жени во периодот од октомври 2020-та до август 2021-ва година, но по денешното последно сослушување, бил за момент помилуван од судијата и дозволено му е да се врати во својот дом во Англија пред да се појави на новото рочиште.

Поранешниот француски репрезентативец беше во притвор 134 дена откако за првпат беше уапсен и приведен на 26-ти август минатата година, а барањето за кауција е одобрено откако неговото конечно судење е одложено од јануари за крајот на месец јуни.

Како што пренесуваат англиските медиуми на кои денеска им бил дозволен влез во судот во Честер, судијата Томпсон ја одобрил кауцијата и Менди ќе биде во домашен притвор до 24-ти јануари, за кога е закажано ново судско рочиште за неговиот предмет. Во овој период, Менди мора да биде постојано на својата домашна адреса во Англија, а до вечерва на полноќ треба да го предаде и пасошот на надлежниот суд.

Тренерот на Милан, Стефано Пиоли откри дека негово единствено трансфер барање во јануари е да биде донесе дефанзивец.

Симон Кјаер ја заврши сезоната поради повреда, па Пиоли сака да биде донесена достојна замена за данскиот дефанзивец.

„Идејата на трансфер пазарот е јасна. Повредата на Кјаер не принуди да бараме дефанзивец, немам други барања од раководството. Мислам дека тимот е компетентен, но потребен ни е дефанзивец. Тој треба да биде добар во дуелите еден на еден, но и да биде добар со топка и да носи правилни решенија кога ја има топката. Нема да биде лесно, но сум убеден дека ќе биде доведен вистинскиот“, изјави Пиоли.

Прва желба на Милан е дефанзивецот на Лил, Свен Ботман но преговорите ќе бидат тешки бидејќи францускиот клуб не прифаќа понуди помали од 30 милиони евра.

Поранешниот голгетер на Атлетико Мадрид и Челзи, Диего Коста го напушти бразилскиот клуб Атлетико Минеиро за кој одигра 19 натпревари и успеа да стане шампион на Бразил.

Поранешниот шпански репрезентативец договорил спогодбено прекинување на соработката со клубот во кој пристигна од Атлетико Мадрид во 2021 година.

Неколку медиуми во Шпанија пренесуваат дека за 33-годишниот напаѓач интерес покажува екипата на Селта Виго, па можно е негово повторно враќање во Ла Лига.

Киран Трипие пред шест месеци се радуваше на титулата во Примера, но сега одлучи да прифати еден сосема поинаков предизвик, односно да се бори за опстанок во Премиер лигата до крајот на сезоната.

Десниот бек на Атлетико Мадрид и официјално се претвори во прво големо засилување во новата ера на Њукасл, клуб кој неодамна беше купен од страна на конзорциум од Саудиска Арабија кој е во сопственост на милијардери.

Трипие се поврзуваше со враќање во Премиер лигата и во летниот преоден рок, но желбата му се оствари шест месеци подоцна и вели дека со нетрпение чека повторно да се докажува пред домашната јавност.

„Ми беше многу тешко кога си заминав од Англија и кога дојдов во Атлетико. На крајот, минав речиси три години во Мадрид и тоа беше неверојатно искуство. Пресреќен сум што остварив многу работи во Атлетико, со Симеоне станав подобар играч. Ја освоив Примера, имам безброј убави спомени од Шпанија и оставам големи пријатели кои ќе ми останат пријатели и во иднина.

Уште на почетокот на оваа сезона во месец август се зборуваше за мое заминување и на крајот тоа не се случи. Ја наведнав главата, продолжив да работам напорно и побарав од клубот да ги разгледа опциите во јануари. Њукасл се појави и поради лични причини се враќам во Англија. За мене и моите деца беше многу важно да се вратам во Англија, а Њукасл се покажа како клуб кој верува во мене. Многу сум среќен, го познавам менаџерот на тимот и привилегија е да се биде дел од оваа нова ера на клубот“, вели Трипие.

Светската Фудбалска Федерација ги објави имињата на тројцата фудбалери кои влегуваат во финалното гласање за наградата „The Best“, која се доделува за најдобар фудбалер за 2021 година. Во овогодинешниот финален избор ќе учествуваат Меси, Левандовски и Салах.

За добивање на оваа награда гласови даваат тренерите и капитените на фудбалските репрезентации членки на ФИФА.

Церемонијата на доделувањето на наградата ќе се одржи на 17.јануари, а минатогодишен победник беше Роберт Левандовски.

Енди Кол смета дека играта на Бруно Фернандеш многу се променила после доаѓањето на Кристиано Роналдо на „Олд Трафорд“.

Фернандеш запиша 28 гола и 17 асистенции на 58 меча минатата сезона, но оваа сезона има само два гола на 24 меча.

„Изгледа смешно, но Роналдо се врати целата игра на Бруно се промени. Порано постигнуваше голови, а сега излегува во одлична позиција и гледа како да го најде Роналдо, па веќе не е истиот играч“.

„Го гледам и се прашувам зошто? Тој има голем квалитет и не треба да се грижи дали Роналдо е во тимот. Едноставно неговата форма падна бидејќи се промени играта“, изјави Енди Кол.

Како пренесува англискиот весник „Сан“, екипата на Манчестер Јунајтед му нуди нов договор на Пол Погба, со што Французинот би станал најплатен играч во Премиер лигата. 

Според најновата понуда, Погба би заработувал неверојатни 500 илјади фунти неделно. 400 илјади како основна плата, плус 100 илјади во форма на бонуси.

На овој начин челниците на „црвените ѓаволи“ ќе пробаат да го одвратат Погба од идејата овој месец да потпише пред договор со друг клуб, но сеуште нема одговор како од играчот така и од неговиот менаџер Мино Рајола.

Од Манчестер Јунајтед ја отфрлија можноста да го продадат францускиот репрезентативец оваа зима, што значи дека тој би можел да замине како слободен играч на лето доколку не го потпише новиот договор.

Интерес за доведување на Погба во своите редови имаат Пари Сен Жермен, Реал Мадрид и Јувентус.

Екипата на Лестер и тренерот Брендон Роџерс се соочуваат со големи проблеми од почетокот на новата 2022 година.

Најдобриот напаѓач во тимот, Џејми Варди нема да настапува за „лисиците“ до крајот на март, бидејќи на натпреварот против Ливерпул тој ја обнови повредата на мускулот. 

Дополнителен проблем за екипата е и отсуството на неговиот соиграч од нападот, Ихеаначо кој со неговата Нигерија отпатува на Купот на Афрчки нации, како и повредата на третиот напаѓач Патсон Дака.