Екипата на Ливерпул има шанса да го израмни клубскиот рекорд на гостувањето кај Бенфика во четвртфиналето од Лигата на шампионите. 

Имено, доколку „црвените“ го добијат овој натпревар, тимот ќе се израмни со постигнувањето кое Ливерпул го забележа во сезоната 1983-84 година, кога запиша пет последователни победи како гостин во европските натпревари.

Од почетокот на тековната сезона во ЛШ, тимот на Јирген Клоп има само победи во нивните гостувања. Во групната фаза победија кај Порто, Атлетико Мадрид и Милан, а во осминафиналето славеа и над Интер на Сан Сиро.

Бундеслигашот Фрајбург и официјално ќе бара поништување на дуелот со Баерн Минхен во кој претрпе пораз од 4:1. 

Причина за барањето на поништување е фактот што шампионот Баерн во еден момент од натпреварот на теренот имаше 12 играчи. Недоразбирањето се случи поради неправилната измена на играчи.

Во соопштението од клубот Фрајбург, се наведува дека поради процедурални правила, екипата ќе испрати жалба до фудбалската федерација на Германија.

Од Јувентус потврдија дека играчот за врска, Мануел Локатели ќе биде надвор од терените околу еден месец. Денес на Локатели му беа направени детални лекарски прегледи кои покажале повреда на десното колено.

Локатели предвреме го заврши синоќешното дерби со Интер, најпрво доби удар во главата, а потоа се пожали на болки во коленото.

Според прогнозите, Италијанецот ќе може да се врати во последните три меча од Серија А и ќе биде на располагање за евентуалното финале од Купот.

Медиумите во Шпанија велат дека трансферот на голгетерот на Баерн, Роберт Левандовски во Барселона изгледа се пореален. 

Неодамна излегоа шпекулации дека двете страни имаат усмен договор, а сега шпански „Спорт“ тврди дека полскиот интернационалец уште еднаш му потврдил на раководството на Каталонците дека е подготвен да се пресели на „Камп Ноу“ ова лето.

Договорот на Левандовски со Баерн е до летото 2023 година. Во моментов нема преговори за нов договор меѓу двете страни, но се зборува дека германскиот шампион ќе понуди едногодишна соработка што не е прифатлива опција за Левандовски кој и самиот најави дека е подготвен за нов предизвик на крајот од кариерата.

Тренерот на Виљареал, Унаи Емери го искоментира претстојниот четвртфинален дуел во Лигата на шампионите против Баерн Минхен. Виљареал е домаќин на Баерн во првиот натпревар кој е закажан за среда.

„Сега играме против Баерн. Способни сме и имаме шанса да победиме. Ни се допаѓа различноста на фудбалот. Баерн е многу различен од Јувентус. Тие се уште еден фаворит за освојување на Лигата на шампионите. Тактички ќе треба да се поставиме поинаку отколку против Јуве. Сè ќе биде поинаку“, коментира Емери.

Њукасл се поврзува со многу имиња откако на чело на клубот застанаа богати газди.

Во зимскиот преоден рок Њукасл доведе неколку засилувања и нов тренер и набрзо овој тим започна да игра многу подобро и го обезбеди опстанокот кој се доведуваше во прашање во првиот дел од сезоната.

Според најавите од Островот на лето Њукасл ќе се обиде да доведе нов голман, а мета е чуварот на мрежата на Брајтон Роберт Санчез. 24-годишниот голман напредуваше во претходните сезони и Њукасл за него ќе плати 30 милиони евра со што ќе го направи шести најскап голман во историјата.

Претседателот на Ферари, Џон Елкан, е уверен дека Скудерија ги има најдобрите возачи во Формула 1 – Шарл Леклер и Карлос Саинц. Ова го соопшти Елкан во обраќањето до акционерите на италијанската компанија.

По првите две кола во Формула 1 оваа сезона, Ферари е на врвот кај конструкторите, а Леклер и Саинц се први во поредокот кај возачите.

„Во 2021 година нашиот тим стигна до пет подиуми и заврши на третото место кај конструкторите, но видовме охрабрувачки знаци. Свесни сме дека Леклер и Саинц се најдобрите возачи во Формула 1 и добро ја започнаа сезоната“, изјави Елкан.

Во истиот допис, Елкан го потврди враќањето на Ферари во Светскиот шампионат во издржливост (WEC), а во 2023 година „Скудерија“ ќе дебитира во класата на Hypercar во Ле Ман.

Англискиот весник „Дејли стар“ пренесува дека Манчестер Сити планира да го награди Фил Фоден со нов договор. 

21-годишниот играч одигра уште една добра сезона за тимот, и клубот е задоволен од неговиот учинок. Челниците на Сити се спремни да му понудат долгорочна соработка со нов договор, и сериозно покачување на платата. 

Фоден има иста плата од 2018 година, кога потпиша договор до 2024 година. Во последните сезони тој е еден од клучните играчи во тимот на Пеп Гвардиола и клубот одлучи да го награди со нов договор.

Тренеротна Ливерпул, Јирген Клоп ја објасни ситуацијата со повредените играчи пред гостувањето кај Бенфика во првата четвртфинална пресметка од Лигата на шампионите.

Од коментарите на Клоп е јасно дека Ливерпул ќе настапи во полн состав, а досегашните повредени играчи веќе му се на располагање.

Наби Кеита и Трент Александер-Арнолд имаа ситни повреди и не настапија на последниот меч со Ватфорд, додека Матип и Џонс добија мали удари на тој натпревар, но сепак се целосно подготвени за Бенфика.

„Во моментов на располагање го имам целиот тим“, потенцира Клоп.

Екипата на Барселона успеа да оствари вредна победа во дерби дуелот со Севиља со резултат 1:0. Победничкиот гол на натпреварот го постигна Педри во 73.минута.

После натпреварот, тренерот на каталонците Чави, изјави дека се додека има теоретски шанси, неговиот тим ќе се бори за титулата во Ла лига. Барселона во моментот е на втората позиција од табелата и заостанува 12 бода зад лидерот Реал Мадрид, но има еден натпревар помалку.

“Многу сум среќен. Верувам во работата, напорите и пожртвованоста на тимот. Се претставивме добро, доминиравме против голем противник. Севиља е одличен тим, а Лопетеги е неверојатен тренер. овој успех вреди многу“,изјави Чави.