фудбал

Шест француски навивачи ја направија најголемата грешка на ЕУРО!

Леон, Жоел, Дидие, Мануел, Жак и уште еден Леон. Тоа се шест француски навивачи, колеги од ИТ компанија, кои ќе останат запаметени по најголемата грешка направена на ова ЕУРО.

Откако два часа лутаа низ градот во кој допатуваа да ја гледаат својата репрезентација на ЕУРО, ја сфатија грешката. Не стигнаа во Будимпешта, туку во Букурешт!

Приказната би останала целосно непозната доколку не беше новинарот Ади Мунтеану, кој воочи шест машки лица без навивачки обележја на терасата полна со украински навивачи.

Ги запраша дали се од Киев, а тие му одговорија: „Ние сме Французи.“ Потоа, новинарот ги запраша дали ја поддржуваат Украина, но нивниот одговор не беше потврден.

„Не, не навиваме за нив, по грешка дојдовме во овој град. Требаше да одиме за Будимпешта и да го гледаме натпреварот Унгарија – Франција.“ – порачаа тие.

Најбизарниот детал од целата таа приказна е што тројца од нив имаа дури и авионски карти за Будимпешта, па не е јасно како, и покрај тоа, сите шестмина завршија во Букурешт.

Која репрезентација пропатува најмногу на ова ЕУРО?

Започнува осминафиналната фаза од Европското првенство, а по завршувањето на првиот круг јасно се издвоија големите разлики во „километражата“ која одредени репрезентација досега ја пропатуваа.

За потсетување, овогодинешното ЕУРО се игра во 11 градови ширум Европа, што значи дека репрезентациите мораат да патуваат повеќе од било кога. Најлошо помиан Швајцарија, која својот камп го смести во Рим, но таму играше само еден натпревар. Два натпревари одигра во Баку, главниот град на Азербејџан, па швајцарците вкупно пропатуваа скоро 11.700 километри.

Следна е Шведска, чиј камп беше во Гетеборг, а играше во Санкт Петербург и Севиља. Нивната репрезентација патуваше скоро 11 илјади километри.

Хрватска е на деветтото место од 16 репрезентации во осминафиналето, со пропатувани 2940 километри.

Секако, најмалку патуваа Англичаните. Тие ги одиграа сите натпревари на Вембли, па може да се каже дека не патуваа ниту еден километар. Во Лондон ќе го играат и осминафиналето против Германија.

Франција во проблеми – пет повредени пред осминафиналето!

Селекторот на актуелниот светски шампион Франција Дидие Дешамп има многу проблеми пред мечот од осминафиналето на ЕУРО 2020.

После повредата на Дембеле и неговото напуштање на Европското првенство, потоа повредата на Лукас Хернандез и Дињ, по се изгледа на таа листа се придружија уште двајца.

Во прашање се Томас Лемар и Маркус Турам. Тие се повредиле во текот на последниот тренинг и речиси сигурно нема да настапат на мечот од осминафиналето. Лемар е во полоша состојба, затоа што тренингот го напушти со помош на лекарите, откако не можеше самиот да се движи.

Турам има проблем со повреда на мускулот, па ќе мора да оди на терапии.

Франција својот осминафинален натпревар го игра против Швајцарија во понеделник од 21 часот.

Италијанските гиганти го сакаат Ренато Санчез

Милан и Јувентус се заинтересирани за португалскиот репрезентативец, Ренато Санчез, објавија дел од медиумите на „чизмата“.

Тој втора сезона игра фантастично во Лил со што го привлече вниманието на многу европски гиганти. Санчез е еден од најдобрите на неговата позиција и на Европското првенство.

Според наводите, францускиот состав за потписот на Португалецот бара 30 милиони евра.

Финска и Данска пријавија ковид-позитивни фанови по враќањето од шампионатот

Данска пријави 16 позитивни тестови за корона-вирус на нејзините навивачи кои присуствуваа на последниот натпревар во рамките на групната фаза на Евро 2020 против Русија во Копенхаген, вклучувајќи четири со варијантата Делта.

Вчера беше потврдено дека и неколку фински навивачи имале позитивен тест по враќањето од Русија по последниот натпревар од групната фаза на Евро 2020 против Белгија. Медиумите во Финска објавија дека досега кај 86 лица е дијагностициран ковид-19.

Илјадници фински навивачи отпатуваа за Санкт Петерсбург за да го бодрат нивниот состав против Белгија. Од нив најмалку 800 на враќањето дома ја преминаа границата без да бидат тестирани за ковид-19. Затоа финските власти очекуваат да има повеќе позитивни случаи.

Реал Мадрид „полуде“ по шведската сензација

Реал Мадрид има висок интерес за потписот на Александар Исак, пишува шпански АС.

Иако не постигна ниту еден погодок, шведскиот напаѓач воодушеви со своите игри на Европското прнвество и за него пројавуваат интерес се повеќе големи европски клубови. Покрај Реал, заинтересиран е и Арсенал, кој веќе воспостави контакт со Сосиедад и со агентот на играчот, па се наоѓа во најдобра позиција да го доведе.

АС тврди дека 21-годишниот Исак има желба да заигра за Реал, кој е во потрага по нов напаѓач. Желбата на Флорентино Перез е Килијан Мбапе и(ли) Ерлинг Халанд, но Реал во моментот не може да си дозволи такви трансфери. ПСЖ наводно за Французинот бара 200 милиони евра, а Борусија нема да го ослободи Халанд ова лето за помалку од 130 милиони евра.

Исак е многу поприфатлива опција, иако Реал Сосиедад не сака да спушти на помалку од 70 милиони евра, колку што изнесува клаузулата во неговиот договор.

Симеоне добива нов договор со Атлетико Мадрид

Тренерот на Атлетико Мадрид, Диего Симеоне е многу близу до потпишување нов договор со клубот.

Двете страни преговараа веќе некое време и се блиску до постигнување договор, со само некои ситни детали што треба да се прецизираат пред официјално да се објави договорот.

Новиот договор на Симеоне ќе биде до 2024 година, а се очекува да има и зголемување на платата на тренерот.

На „Ванда Метрополитано“ не може да не бидат задоволни од работата на 51-годишниот Аргентинец, кој минатата сезона го водеше клубот до титулата во Ла Лига. Тој е на кормилото на оваа екипа веќе десет години, носејќи му на клубот две титули на домашен терен, еден Куп на Шпанија, еден Суперкуп на Шпанија, двапати ја освои Лигата на Европа и двапати го крена Суперкупот на Европа.

Познат календарот на новата сезона во Бундеслигата

Екипите на Баерн Минхен и Борусија Дортмунд на гостински односно на домашен терен ќе ја започнат новата натпреварувачка сезона во германската Бундес лига.

„Баварците“ во првата рунда гостуваат кај Борусија Менхенгладбах, додека „милионерите“ на домашен терен го пречекуваат Антрахт Франкфурт.

Сезоната стартува на 14 август, а бранител на трофејот е Баерн Минхен.

Прво коло:

Борусија Менхенгладбах – Баерн Минхен

Арминија Билифилд – Фрајбург

Аугсбург – Хофенхајм

Борусија Дортмунд – Ајнтрахт Франкфурт

Келн – Херта

Мајнц – Лајпциг

Штутгарт – Гројтер Фурт

Унион Берлин – Баер Леверкузен

Волфсбург – Бохум

Легендата Болд го напушти Арсенал по 33 години

Aрсенал ја отпушти легендата на клубот Стив Болд после 33 години.

Како фудбалер Болд беше член на Арсенал, а по завршувањето на кариерата се врати во Арсенал. Започна како тренер во младите категории за потоа да биде помошник на Арсен Венгер. Претходно долго време работеше како тренер на дефанзивците во стручниот штаб на Венгер.

Кога Венгер замина во 2019 година тој го презема резервниот тим. На крајот на оваа сезона управата на клубот реши да не ја продолжат соработката.

Менаџерот на академијата на Арсенал, Пер Мертезакер изјави дека Болуд секогаш ќе биде важна фигура во историјата на клубот.

Пандев дел од идеалниот тим на групната фаза на Европското првенство

Холандскиот веб портал „НОС Спортс“ направи избор на играчи кои дадоа белег на групната фаза од ЕП во фудбал.

На 36 одиграни натпревари во првата фаза свој добар настап според „НОС Спортс“ имале играчи од врвот на Европскиот фудбал, а меѓу нив се најде и нашиот Горан Пандев. Пандев е во иделаниот состав на групната фаза, не само поради својот фудбалски квалитет на теренот, туку и поради односот надвор од теренот.

Македонската фудбалска легенда на најдобар можен начин се прости од репрезентативниот дрес, а со своите одлични игри на Европското првенство не остана незабележан и од страна на странските медиуми.

Во најдобриот состав на „НОС Спортс“, Пандев е во друштво на Роналдо, Бејл, Де Бруин, Вајналдум, кои исто така ги предводат своите репрезентации.

Вчера елитниот „Би-Би-Си“ во својот избор го смести нашиот Езџан Алиоски во идеалниот тим од првата фаза на Европското првенство.

«< 1036 1037 1038 1039 1040 >»