Лоша вест за навивачите и љубителите на пивото, кои планираат да ги следат натпреварите од Светското првенство во Катар на крајот на годината во живо.

Повикувајќи се на свој извор, агенцијата „Ројтерс“ ексклузивно ја објави веста дека трибините на стадионите на Светското првенство во Катар ќе бидат без алкохол, а продажбата на пиво надвор од стадионот ќе биде дозволена само пред и по некои натпревари и на одредени локации.

Овогодинешното Светско првенство е првото што ќе се одржи во муслиманска земја со строга контрола на алкохолот, што претставува уникатен предизвик за организаторите на Мундијалот, кој често се поврзува со љубителите на пивото и е спонзориран од светски брендови на пиво.

Така, одлучено е алкохолот да не се служи за време на натпреварите на стадионите, туку навивачите ќе можат да го купат за време на Светското првенство на ограничено време и во одредени делови од фан зоната на ФИФА во Доха, главниот град на Катар.

Досегашниот фудбалер на Тотенхем Стивен Бергвијн потпиша петгодишен договор со екипата на Ајакс.

Трансферот на 24-годишниот играч е вреден 26,4 милиони фунти. Фудбалерот го напушти Тотенхем поради фактот што не успеа да се избори за поголема минутажа во составот на тренерот Антонио Конте.

Бергвијн пристигна во Тотенхем во јануари 2020 година од ПСВ Ајндховен. Тој за клубот од Лондон одигра 83 натпревари и постигна осум гола. 

Артуро Видал ќе му се приклучи на Фламенго со слободен трансфер. 35-годишниот Чилеанец ги договорил условите за раскин на договорот со Интер, пренесуваат италијанските медиуми.

Висината на обештетувањето на крајот од договорот ќе биде 4 милиони евра. Видал ќе потпише двегодишен договор со Фламенго. Неделава ќе ги мине лекарските прегледи, по што и официјално ќе биде објавено потпишувањето на договорот.

Во сезоната 2021/22, Видал постигна 2 гола и направи 4 асистенции на 40 натпревари за Интер.

Како што јавуваат медиумите во Германија и Англија, еден од најдобрите фудбалски дефанзивци во светот, 22-годишниот Матијс де Лихт ќе го напушти Јувентус ова лето.

Според објавите, Де Лихт ги договорил личните услови со гигантот Баерн Минхен. Сега останува само Баварците да постигнат договор со Јувентус околу висината на обештетувањето. 

Клубот од Торино за Де Лихт бара 90 милиони евра, а Баерн се надева дека ќе успее да ја намали цената за фудбалерот чиј договор со бјанконерите му истекува за две години.

Познатиот новинар Фабрицио Романо излезе со информација дека Тотенхем е на чекор до договор со играчот на Барселона Клемент Ленгле.

Францускиот дефанзивец се очекува да потпише договор за едногодишна позајмица во тимот предводен од тренерот Антонио Конте.

Личните услови помеѓу фудбалерот и Барса се договорени, а сега само се очекува дефинирање на договорот помеѓу двата клуба.

Продолжува сагата околу потенцијалниот трансфер на Левандовски во Барселона. Играчот кој влегува во последната година од договорот со Баерн Минхен сака да си замине, но Баварците немаат голема желба толку лесно да го пуштат. Но од Барселона не се предаваат и веќе испратија нова официјална понуда.

Оваа информација ја потврди и првиот човек на Барселона, Жоан Лапорта.

„Испративме понуда и чекаме одговор. Се надеваме дека одговорот од Баерн ќе биде позитивен“, истакнува Лапорта.

Според добро упатени извори висината на понудата изнесува околу 35 милиони евра плус пет милиони во бонуси

Напаѓачот на Лил, Едом Жегрова може да ја продолжи кариерата во Арсенал, пренесуваат медиумите на Островот.

Арсенал испратил понуда за 23-годишниот репрезентативец на Косово, кој до јануари играше за Базел.

Скаутите на „топџиите“ го следат веќе подолго време и се убедени дека одлично ќе се вклупи во тимот на Артета.

Фудбалерот на Манчестер Јунајтед Бруно Фернандеш во новата сезона ќе носи дрес со друг број на грбот.

Како што објави клубот на социјалните мрежи, Португалецот во наредната сезона ќе го носи дресот со број 8.

Во претходниот период Фернандеш за Јунајтед настапуваше со број 18, а осумката му припаѓаше на Хуан Мата. Сега откако Мата ја напушти екипата, неговиот број е слободен и му припадна на Фернандеш.

Бруно во Манчестер Јунајтед е од јануари 2020 година. Минатата сезона тој постигна 10 гола и запиша 13 асистенции.

Централниот дефанзивец Александар Ристевски е најновото засилување на Брегалница за престојната сезона во Првата македонска фудбалска лига.

30-годишниот Ристевски изминатава година настапуваше во редовите на косовскиот прволигаш Приштина, од каде сега доаѓа во редовите на Брегалница засилувајќи ги дефанзивните позиции во тимот.

Ристевски има богата прволигашка кариера зад своето име настапувајќи за Металург, Скопје, Победа, Пелистер, Ренова, Струга ТЛ и Работнички во македонскиот шампионат, како и за екипата на Влазнија во албанското првенство.

Низ досегашниот преоден рок Брегалница се засили и со досегашниот фудбалер од средниот ред на Академија Пандев, Адис Хаџановиќ од БиХ, Белгиецот Фајсел Касми, поранешниот македонски репрезентативец Горан Силјановски, долгогодишниот капитен на Борец, фудбалерот од средниот ред Ѓорѓи Ѓорѓиев, левокрилниот дефанзивец Александер Борха Кордоба како и црногорскиот голман Немања Шчекиќ.

Јувентус е подготвен да му плаќа на сенегалскиот дефанзивец од Наполи Калиду Кулибали 7 милиони евра годишно, објави познатиот инсајдер Николо Шира на социјалната мрежа.

Според новинарот, Јувентус веќе испратил официјална понуда до Сенегалецот. Клубот од Торино му нуди на играчот договор до 2025 година. Од тимот очекуваат дека тој ќе може да го замени дефанзивецот на холандската репрезентација Матијс де Лихт, кој има голема веројатност да го напушти клубот.

Договорот на Калиду Кулибали со Наполи истекува на крајот од сезоната 2022/23. Претходно италијанските медиуми објавија дека Сенегалецот поради лојалноста кон клубот сака да ја заврши кариерата во Наполи и сака да го продолжи договорот. Тој веќе ги одбил понудите на Барселона и Јувентус.