Останува дилемата дали селекторот на Белгија, Роберто Мартинез, ќе се реши да го започне мечот в четврток против Данска со првата ѕвезда, Кевин Де Бруин, кој се врати на тренинзите откако го пропушти воведниот дуел против Русија.

Како што е познато, искусниот кретаор на играта се здоби со повреда во финалето од Лигата на шампионите, откако доби напукнатини на носната и јагодична коска по судирот со Рудигер.

Белгија е еден од главните фаворити на Европското првенство и засилена со квалитетите на 29 годишниот, Де Бруин, несомнено ќе биде уште посилна во продолжението од европскиот турнир.

Шпанија на натпреварот против Шведска (0:0) имаше 953 додавања, што е најмногу на европските првенства откако од 1980. година се води и таа статистика.

Швеѓаните имаа вкупно 180 додавања. Само во првото полувреме „Фуријата“ имаше 419 додавања, а Шведска само 59. Во првото полувреме, Лапорт имаше 62 додавања, Торес 61, а Алба 60, додека сите 11 стартери за Шведска имаа вкупно 59. Тимот на Луис Енрике имаше и повеќе од 80 отсто од поседот на топката.

„Не не интересира премногу колку додавања имаа. На крајот, се работи само за постигнување голови.“ – рече дефанзивецот на Шведска, Виктор Линделоф додавајќи: „Мислам дека станаа доста фрустрирани. Имаа голем посед, но што подолго траеше играта, беа уште пофрустрирани, што беше добро за нас.“

Шпанската репрезентација во текот на натпреварот имаше 17 удари кон голот, што е најмногу за нив без постигнат погодок на ЕП и СП уште по 2010. година и натпреварот против Швајцарија. Тогаш, Шпанците имаа 25 удари, но не го совладаа швајцарскиот голман.

УЕФА денес го одреди Аргентинецот, Фернандо Рапалини, да биде главен судија на мечот в четврток меѓу Македонија и Украина кој ќе биде одигран во рамките на 2 коло во групата Ц на Европското првенство.

Натпреварот ќе го одиграме на арената во Букрешт а за првпат во историјата на едно Европско првенство ќе се појави судија кој не е од Европа.

Помошници на Рапалини ќе му бидат Диего Бонфра и Хуан Пабло Белати. Чеврти судија ќе биде Славко Винчиќ од Словенија.

Англискиот тим Тотенхем во следните 72 часа ќе објави склучување на договор со Пауло Фонсека. Ова денес го објавија неколку медиуми во Англија.

Претходно беше објавено дека двете страни постигнале договор. Фонсека ќе потпише тригодишен договор. Португалскиот специјалист ќе добива 4 милиони евра по сезона во Тотенхем. Да потсетиме, Фонсека се прости од Рома на крајот на сезоната 2020/21.

На негово место, во тимот дојде уште еден португалски стручњак – Жозе Мурињо, кој беше отпуштен токму од Тотенхем. Претходно, медиумите го поврзуваа Пауло Фонсека со Спартак Москва и Доњецк Шахтјор, на чие чело работеше пред да се пресели во Италија. Под водство на Фонсека, Рома го освои седмото место во Серија А за сезоната 2020/21.

Македонскиот фудбалски шампион, Шкендија, ќе ги одмери силите со екипата на Мура од Словенија во првото елиминациско коло за влез во елитната конкуренција на Европа.

Првата средба ќе биде одиграна во нашава земја на  6/7 јули додека реваншот е предвиден за 13 или 14 во истиот месец во Словенија.

Мура во претходната сезона за прв пат во долгогодишната историја успеа да го освои шампионскиот пехар во елитната конкуренција на Словенија.

Херојот на победата на репрезентацијата на Чешка над Шкотска беше Патрик Шик. Напаѓачот ги постигна двата погодоци во победата на својот тим, а со вториот испиша историја, постигнувајќи го од 45 метри.

„На секој противник му е тешко кога игра против Чешка, имаме многу играчи кои на теренот се многу вредни. Шкотска е жесток ривал, но ние бевме подготвени за нивната тактика.“ – рече Шик.

Потоа, фудбалерот на Баер Леверкузен откри како успеа да го реализира овој неверојатен подогок.

„Видов дека голманот стои далеку од линијатаа. Уште во првото полувреме забележав дека има таква навика и знаев дека таква ситуација ќе се повтори. Пред шутот, погледнав каде стои.“ – рече напаѓачот.

Аргентина во првото коло на Копа Америка киксираше и одигра „само“ 1:1 против Чиле.

Натпреварот во Рио де Жанеиро го одбележа погодокот на Лионел Меси во 33. минута. Најдобриот аргентински фудбалер мајсторски го изведе слободниот удар од 25 метри, го префрли живиот ѕид и го матираше голманот на противничката репрезентација.

Мајсторијата на Меси сепак не беше доволна за три бода на Аргентина, бидејќи на почетокот на второто полувреме, Едуардо Варгас го израмни резултатот.

Марко Арнаутовиќ беше во центарот на вниманието по навредите упатени кон Алиоски на мечот против Македонија.

Арнаутовиќ го постигна третиот гол за Австрија, а потоа влезе во вербален конфликт со Алиоски. Медиумите открија дека имало навреди на националистичка основа.

Многумина го обвинија Арнаутовиќ и за расизам. Тој денеска се извини за неговиот гест и ги отфрли таквите обвиненија.

„Вчера имаше некои жестоки зборови кажани во емоции на натпреварот за кои би сакал да се извинам, посебно на моите пријатели од Македонија и Албанија. Би сакал да кажам една работа јасно: Не сум расист! Имам пријатели од речиси секоја земја и се залагам за различности. Секој кој ме знае е свесен за тоа. Извинете“, напиша Арнаутовиќ.