Шпанските медиуми пренесуваат дека мнозинскиот сопственик на фудбалскиот прволигаш Ваљадолид, бразилската легенда Роналдо, планира да ги ангажира Марсело и Дани Алвес.

Ваљадолид оваа сезона повторно ќе настапува во Ла Лига, па Роналдо посакува во тимот да ги доведе двајцата свои сонародници.

Како што е познато 34-годишниот Марсело неодамна се раздели со шампионот Реал Мадрид, додека 39-годишниот Алвес ќе си замине од Барселона но сака да продолжи со настапите во Шпанија.

Репрезентативецот на Австрија, Марсел Сабицер по само една сезона може да го напушти составот на Баерн Минхен, најавија денеска медиумите во Германија.

28-годишниот фудбалер иако беше купен од Лајпциг како големо засилување, сепак не ги оправда очекувањата на челниците на тимот.

Затоа Баварците се подготвени да го продадат за скромни 15 милиони евра а главен конкурент за неговиот потпис е италијанската Рома.

Ливерпул го потврди третото летно засилување, а станува збор за десниот бек на Абердин, Калвин Рамзи. „Црвените“ за 18-годишниот десен бек ќе платат 4,5 милиони фунти плус 3 милиони во форма на бонуси.

Рамзи минатата сезона беше избран за најдобар млад фудбалер на Шкотска, а денес потпиша 5-годишен договор со Ливерпул.

Тој ќе биде третото засилување за Ливерпул ова лето, после Фабио Карваљо и Дарвин Нуњес, а на „Енфилд“ треба да биде алтернатива за Александар Арнолд на десната бековска позиција.

Пари Сент Жермен сакал да го врбува Винициус и го наговарал да не потпишува нов договор со Реал Мадрид. Винициус Жуниор добил неморална понуда од ПСЖ кој барал да не потпишува нов договор со Реал Мадрид.

ПСЖ му нудел плата од 40 милиони по сезона, бонус од 100 милиони евра при потпис и маркетиншки договори со Катар.

Сепак, Бразилецот не ја прифатил понудата и одлучи да остане на „Сантиаго Бернабеу“ и да потпише нов договор.

Перез за намерите на ПСЖ дознал од самиот фудбалер кој не криел ништо од него и постојано му ги покажувал пораките што ги добива од Париз.

Барселона во наредните денови ќе му понуди нов договор на напаѓачот Мемфис Депај. До неодамна се мислеше дека Холанѓанецот ќе биде продаден ова лето, но се чини дека дошло до пресврт и газдите се подготвени да го задржат на „Камп Ноу“, пренесе „Спорт“.

Депај пристигна во клубот минатото лето како слободен играч, одбивајќи многу понуди од други клубови, бидејќи неговата желба беше да го облече дресот во Барса. На почетокот на сезоната беше солиден стартер, но по доаѓањето на Чави Хернандез ја загуби позицијата во тимот.

На крајот од сезоната, сепак, тој повторно имаше доста добри настапи и се чини дека токму со нив ја убеди управата да го задржи подолго.

Новиот договор на Депај ќе зависи и од одлуките на Генералното собрание на клубот. Доколку му се доделат дополнителни средства, газдите ќе седнат на преговарачка маса со напаѓачот.

Томас Тухел, се залага за напаѓачот на Манчестер Сити, Рахим Стeрлинг. Тренерот сака да ја зголеми конкуренцијата во нападот, откако минатата сезона имаше забелешки за неговите играчи кои настапуваат на предните позиции. Затоа го свртел вниманието кон членот на англиската репрезентација, тврди „Скај Спортс“.

До неодамна се сметаше дека „сините“ следат уште еден напаѓач на Сити, Габриел Жесус. Сепак, Бразилецот е блиску до трансфер во Арсенал. Покрај тоа, Тухел претпочита да го земе Стерлинг наместо него.

27-годишниот крилен напаѓач има договор со „граѓаните“ на уште една сезона, па неговата иднина во клубот е неизвесна. Се почесто се шпекулира дека газдите на „Етихад“ се подготвени да го продадат за добра понуда. Цената на играчот е околу 70 милиони евра.

ПСЖ се вклучи во трката за потписот на Ренато Санчез.

Португалскиот играч за врска блеска во дресот на Лил и беше на чекор од трансфер во Милан, но сега ПСЖ може да го „украде“ пред носот на „росонерите“.

Милан и Лил го договорија трансферот за 15 милиони евра, но бидејќи трансферот се уште не беше комплетиран ПСЖ понуди двојно повеќе, односно 30 милиони евра.

Новиот спортски директор на „светците“, Луис Кампос го донесе Португалецот во Лил, а нов тренер на ПСЖ ќе биде Галтие кој како прва желба го посочил Ренато Санчез.

Милан нема финансиска моќ да ја израмни понудата на ПСЖ, па најверојатно Португалецот ќе заврши во Париз.

Италијанските медиуми пренесуваат дека Јувентус подготви втора повисока понуда за Анхел Ди Марија во обид да го донесе во Торино. Аргентинскиот крилен напаѓач ја одбил првата понуда од „старата дама“, која била за едногодишен договор.

За Ди Марија интерес покажува и Барселона, но Аргентинецот преферира трансфер во Јуве.

34-годишниот Аргентинец го напушта Париз Сен Жермен, после истекот на договорот на крајот од месецот. Ди Марија за ПСЖ постигна 92 гола на 295 натпревари.

Челниците на европскиот и шпански првак Реал Мадрид планираат да му понудат нов договор на капитенот Карим Бензема. 

Иако Французинот има 34 години, тој ја одигра една од најдобрите сезони во кариерата и тоа беше доволно да ги убеди одговорните луѓе во клубот да подготват понуда за продолжување на договорот, кој истекува во јуни 2023 година.

Се очекува напаѓачот да седне на преговарачка маса во наредните недели. Се верува дека ќе добие предлог за продолжување на договорот на уште една година. 

Бензема мина 13 сезони во Реал Мадрид. Во овој период одигра 625 натпревари на кои постигна 303 гола.

Рафаел Варан е оптимист за новата сезона на „црвените ѓаволи“.

Тимот започнува претсезонски тренинзи на 27 јуни со новиот тренер Ерик тен Хаг.

Францускиот дефанзивец имаше тешка сезона на „Олд Трафорд“ и го мачеа повреди, а тимот се претстави лошо.

„Нова сезона, нов почеток, па сите се возбудени да видат како ќе работи новиот менаџер. Сакаме да се претставиме добро и целта е да победиме на секој натпревар. Мора добро да се подготвиме за тоа“, изјави Варан.

„Мислам дека атмосферата ќе биде поинаква. Секогаш е возбудливо да се игра пред нашите навивачи ширум светот“, додаде тој.