Поранешниот англиски фудбалски репрезентативец Пол Гаскоњ е хоспитализиран, објави „The Sun“.

Педесет и осумгодишниот Англичанец бил пронајден дома во бесознание. Неговата состојба моментално се смета за стабилна. Се очекува Гаскоњ да помине неколку дена во болница.

Гаскоњ е освојувач на ФА Купот, двократен шампион на Шкотска и освојувач на Шкотскиот Куп.

Во 2002 година, тој влезе во Куќата на славните на англискиот фудбал.

Контроверзниот Гаскоњ по завршувањето на кариерата имаше проблеми со алкохолот и често пати беше фотографиран во непристојна состојба. Во едно интервју пред неколку години кажа дека живее како бездомник и дека е алкохоличар.

Атлетико Мадрид подготвува понуда за дефанзивецот на Челзи, Ренато Веига, кој во претходната сезона импресионираше во Јувентус но, мораше да се врати на „Стемфорд Бриџ“ откако истече договорот за позајмица.

Тој дефинитивно не влегува во плановите на менаџерот на „сините“, Енцо Мареска и затоа ќе мора да бара нова средина. Англичаните се подготвени да го продадат за пониска сума.

Шпанците веруваат дека може да ја добијат трката со англиските состави Борнмут и Вулверхемптон кои исто така се заинтересирани за потписот на Португалецот.

Ал-Хилал нема да игра на Суперкупот на Саудиска Арабија во август поради замор на играчите и кратка пауза по Светското клупско првенство, објави клубот. Во полуфиналето на турнирот од 19 до 23 август, тимот од Ријад требаше да игра против Ал-Кадисија, додека другиот натпревар ќе биде помеѓу Ал-Наср и Ал-Итихад.

Ждрепката за Суперкупот се одржа на 19 јуни, само еден ден по првиот натпревар на Ал-Хилал против Реал Мадрид во групната фаза на Светското клупско првенство. Во САД, претставникот на Саудиска Арабија стигна до четвртфиналето, кое се одигра на 4 јули.

По тој натпревар, тимот мораше да остане во Орландо уште три дена поради ограничувања за патување, што го намали одморот на играчите. Затоа, Ал-Хилал одлучи да го одложи почетокот на подготовките за претстојната сезона. Покрај тоа, распоредот за домашните натпреварувања, објавен на 1 јуни, не споменуваше дека Суперкупот ќе се одржи во Хонг Конг.

Одлуката на Ал-Хилал да се повлече од Суперкупот беше донесена откако голем број играчи беа физички прегледани и покажаа знаци на екстремен замор по исцрпувачката сезона што траеше една година и една недела. Многу играчи учествуваа и во тренинг камповите на националните тимови без одмор, одејќи директно на Светското клупско првенство.

Фудбалерите на Вардар кои набрзо ги очекуваат мечевите со Лозана во второто коло во Конференциската Лига на УЕФА, денеска ги дознаа можните противници за наредната рунда.

„Црвено-црните“ доколку го поминат тимот од Швајцарија ќе одат на мегдан со подобриот од пресметките меѓу Зимбру од Молдавија и Астана од Казахстан.

Првите натпревари од третото коло во Конференциската лига на УЕФА се играат на 7 август а реваншите се седум денови подоцна.

Хакан Чалханоглу ова лето најверојатно ќе го напушти Интер, бидејќи изрази желба кариерата да ја продолжи во Турција.

Интерес за него покажуваат Галатасарај и Фенербахче, а самиот инсистира да се пресели во Турција.

Интер веќе почна да бара негова замена, а „Газета дело Спорт“ открива дека изборот паднал на Гранит Џака.

Швајцарскиот репрезентативец е на изнезна врата од Леверкузен и се поврзуваше со трансфер во Милан.

33-годишниот Џака може да го напушти клубот за само 12 милиони евра, сума која Интер е спремен да ја плати.

Алваро Мората, капитен на шпанската репрезентација и искусен голгетер, е новиот напаѓач на италијанскиот Комо.

За трансферот се зборуваше веќе некое време, а сега угледниот италијански инсајдер Николо Шира потврди дека сè е договорено.

Мората ги договори личните услови со италијанскиот клуб, а на крај се усогласија и сите три вклучени клуба – Галатасарај, Милан и Комо.

Трансферот беше прилично замрсен бидејќи во целата приказна беа вклучени три страни. Мората официјално е под договор со Милан, но моментално игра на заем во Галатасарај, што трае до почетокот на следната година.

Турскиот гигант има и опција за откуп на договорот за осум милиони евра, но и покрај таа клаузула, Мората се враќа во Италија!

Клучната улога во трансферот ја одигра неговиот поранешен соиграч од репрезентацијата и актуелен тренер на Комо, Сеск Фабрегас (38), кој лично го посака во соблекувалната.

Фабрегас интензивно гради респектабилен проект во Серија А, а со доаѓањето на Мората дополнително го засилува силниот напад.

Вест Хем го официјализираше трансферот на англискиот дефанзивец Кајл Вокер-Питерс, кој потпиша тригодишен договор со клубот од Лондон.

28-годишниот бек пристигнува како слободен агент по истекот на договорот со Саутемптон, каде ги мина последните пет сезони. Во дресот на „светците“ одигра 202 натпревари, постигна седум голови и забележа 12 асистенции во сите натпреварувања.

Вокер-Питерс своето фудбалско школување го мина во Тотенхем, каде доби шанса и во првиот тим, пред да замине во Саутемптон во потрага по поголема минутажа. Има настапи за сите младински селекции на Англија, а во 2022 година забележа и два меча за сениорскиот состав, против Швајцарија и Брегот на Слоновата Коска.

Со искуство во Премиер лигата и континуитет во изминатите сезони, Вокер-Питерс се очекува да биде значајно засилување за тимот на Вест Хем во новата сезона.

Францускиот фудбалер, Пол Погба, кој на времето играше за Манчестер Јунајтед, го критикуваше раководството на тимот за одлуката да се раздели со Маркус Рашфорд.

„Лудо е, но среќен сум за него бидејќи тие го отпишаа. Јунајтед губи одличен играч. Штета за нив. За Барселона е одлично, да бидам искрен.

Манчестер Јунајтед купи неколку нови играчи а новиот тренер претпоставувам сака да изгради нешто негово“, потенцираше Погба кој по паузата поради допинг скандалот конечно се врати на терените.

Фудбалерите на Вардар ќе поделат премија од 100.000 евра доколку го минат и второто квалификациско коло во Конференциската лига во кое играат против Лозана од Швајцарија.

Вардар го мина првото квалификациско коло од ова натпреварување откако со вкупни 5-2 ја совлада екипата на Ла Фиорита од Сан Марино. За овој успех црвено-црните поделија премија од 50.000 евра.

Сега раководството на клубот им вети двојно повеќе пари за успех против швајцарскиот претставник кој минатата сезона заврши на петтата позиција во домашната лига.

Лозана ќе биде вистински предизвик и слика за квалитетот на овој тим на Вардар.

Првиот натпревар меѓу Вардар и Лозана се игра на 24. јули (четврток) во Скопје, реваншот е седум дена подоцна во Швајцарија.

Македонскиот напаѓач Илија Несторовски нема да биде подготвен за почетокот на новата сезона во хрватскиот шампионат, откако на подготовките во Словенија заработи незгодна повреда.

Несторовски беше еден од клучните играчи на Славен Белупо во минатата сезона, но сега го чека пауза од најмалку две недели, што значи дека дефинитивно нема да биде во комбинација за првите натпревари од новата кампања.

Славен Белупо ќе мора да бара алтернативи во нападот додека Несторовски се рехабилитира и се враќа во форма.