Францускиот фудбалски стратег, Зинедин Зидан се обиде да им објасни на навивачите на „кралевите“ зошто се одлучи по втор пат во кариерата како тренер да го напушти Реал Мадрид.
Зидан тврди дека не ја добил договорената поддршка и тоа е основната причина за неговиот потег.
„Драги мадридисти,
Пред 20 години стапнав во градот Мадрид и го облеков белиот дрес, од првиот ден вие ми ја дадовте вашата љубов. Отсекогаш чувствував дека има нешто многу посебно меѓу нас. Имав голема чест да бидам играч и тренер на најважниот клуб во историјата, но пред се јас сум само уште еден играч на Реал Мадрид. Поради сето ова сакав да го напишам ова писмо за збогум и да ја објаснам мојата одлука зошто го напуштив клубот.
Во март 2019 година се сложив да се вратам како тренер на Реал Мадрид по пауза од околу осум месеци, го направив тоа поради тоа што претседателот Флорентино Перез ме побара и се разбира бидејќи вие секој ден ми го велевте тоа. Кога сретнав еден од вас на улица, ја почувствував поддршката и желбата да бидам повторно со тимот. Бидејќи ги делам истите вредности на Мадридисимо, овој клуб кој припаѓа на членовите, на фановите, на целиот свет. Се обидував овие вредности да ги пренесам од мене во се што работев, се трудев да бидам пример. Поминувањето 20 години во Мадрид беше најубавата работа која некогаш ми се случила мене и знам дека тоа му го должам нему, ексклузивно на Флорентино Перез кој ме донесе во 2001 година, кој се бореше за мене, кој направи да дојдам кога имаше луѓе кои беа против тоа. Го кажувам ова од моето срце, секогаш ќе му бидам благодарен на претседателот за тоа. Секогаш.“ – напиша Зидан.
Сити се вклучува во трката за Рамос
Капитенот на Реал Мадрид и репрезентацијата на Шпанија, Серхио Рамос би можел ова лето да се пресели во Манчестер Сити. Според пишувањата на „ЕСПН“ англискиот клуб е спремен да му понуди договор на две години.
На Рамос му остана помалку од еден месец до истекот на актуелниот дсоговор со „кралевите“, а клубовите на големо проценуваат какви се шансите да дојдат до 35 годишниот дефанзивец.
Свои шанси на фудбалскиот пазар гледа и актуелниот шампион на Европа и англиски шампион кој пред два дена остана без важен трофеј.
Според „ЕСПН“ Сити е спремен на Рамос да му понуди договор на две години со веројатно подобри услови од оние што би му ги дал Реал од каде што доаѓа како слободен играч.
Ристовски: Фановите заслужуваат да ја видат репрезентацијата
Македонската репрезентација ја очекува првиот тест пред настапот на Европското првенство, дуелот со Словенија на домашен терен и тоа со ограничен број на гледачи на трибините на нашиот најголем стадион.
На прес-конференцијата како најава на дуелот зборуваше дефанзивецот Стефан Ристовски кој рече дека е среќен што конечно на нашиот стадион ќе се вратат навивачите и ќе може да ги бодрат од трибините.
„Имаме два натпревари пред нас и сме фокусирани на нив. Мислам дека имаме доволно време за подготовка пред почетокот на Европското првенство. Првиот меч на ЕП го играме против Австрија. Пред две години не победија убедливо во Скопје, јас тогаш реагирав незадоволно поради начинот на кој што се претставивме. Но, мислам дека тоа беше чувството кај сите нас. Одамна не сме играле пред публика. Навистина македонската нација заслужи да нè гледа по толку време“, рече Ристовски.
По натпреварот со Словенија, Македонија ќе има уште еден тест натпревар со Казахстан исто така на домашен терен.
Милер: Среќен сум што се вратив во репрезентацијата
Томас Милер, враќањето во германската репрезентација за Европското првенство го гледа како краткорочна авантура. Напаѓачот кој доби повик од селекторот, Јоаким Лев, не сака да открие дали и по континенталниот собир ќе остане дел од „панцерите“.
„Не сакам да размислувам што ќе биде по Европското првенство. Среќен сум што ќе имам можност да и помогнам на Германија. Работите се променија од 2019 година, сега сите сме обединети за тоа што не чека“, изјави Милер.
Неговата селекција в пресрет на Евро-шампионатот се подготвува во базата во Австрија.
Одигра 17 минути, а има четири трофеи во ЛШ!
Матео Ковачиќ со последниот трофеј од Лигата на шампионите освоен со Челзи, стигна до бројката од четири вакви одличја, иако интересно е што во сите финалиња има поминато само 17 минути на теренот.
Тој беше дел од трите по ред титули на Реал Мадрид во Лигата на шампионите, но без ниту една минута на теренот во финалните натпревари. Во првата во 2016-та кога мадрискиот тим беше подобар од својот градски ривал Атлетико по пенали, Ковачиќ воопшто не беше во составот, но си доби медал и прва титула во Лигата на шампионите во кариерата.
Следната година, во 2017-та кога Реал Мадрид беше подобар од Јуветнус со 4:1 во финалето, Ковачиќ беше на клупата, не доби шанса, но пак си доби медал.
Во 2018-та, кога Реал го освои третиот по ред трофеј после победата од 3:1 над Ливерпул, Ковачиќ беше на клупата и не влезе во игра, но го доби третиот медал без минута во финалињата.
Во дресот на Челзи на натпреварот против Сити пак, влезе во игра во 80-тата минута и одигра 17 минути, со оглед на тоа што имаше седум минути продолжение на овој меч.
ЕУРО 2020 – 14. Чешка одблиску
Чесите се секогаш фаворит од сенка, и овојпат имаат респектабилен тим. Фудбалската репрезентација на Чешка ја претставува Чешка на меѓународните фудбалски натпреварувања и е под контрола на Фудбалската Асоцијација на Чешка (FAČR). Историски гледано, репрезентацијата на Чешка учествувала во натпреварувања организирани од ФИФА и УЕФА под разни имиња како Бохемија, Австроунгарија и Чехословачка.
Репрезентацијата е основана во 1901 година и постоела под претходно споменатите имиња сè до распадот на Чехословачка во 1993 година. Денешната репрезентација на Чешка е основана во 1993 година, а својот прв официјален натпревар го одиграла на 23 февруари 1994, победувајќи ја Турција со 4-2 во Истанбул. Првото натпреварување на кое се пласирала Чешка било Европското првенство 1996, на кое стигнале до финалето во кое загубиле од Германија. Своето деби на Светските првенства го направиле во 2006 година, каде биле елиминирани уште по групната фаза со една победа и два порази.
Финалето на „Вембли“ најголем успех на чешкиот репрезентативен фудбал. На Европското првенство во Англија, Чешка беше во група со Германија, Италија и Русија. Во првиот натпревар на турнирот тие беа поразени од Германија со 2-0. Во вториот натпревар Чешка ја победи Италија со 2-1, со головите на Павел Недвед и Радек Бејбл. Во последниот натпревар од групната фаза и одлучувачки за пласман во четвртфиналето, Чешка играше против Русија. На полувремето Чешка водела со 2-0 со головите на Јан Сухопарек и Павел Кука, но во второто полувреме Русија постигнала дури три гола и повела со 2-3, за сепак преку Владимир Шмицер, Чешка да стигне до реми кое се испостави доволно за пласман во четвртфиналето. Во четвртфиналето Чешка се сретна со Португалија и избори победа со 1-0 која ја одведе во полуфиналето. Стрелец на единствениот гол во натпреварот беше Карел Поборски на почетокот на второто полувреме. Противник на Чешка во полуфиналето одиграно во Манчестер беше Франција. Откако по регуларното време и продолженија немаше голови, натпреварот стигнал до изведување на пенали како би се одредил првиот патник во финалето. Откако првите 10 пенали биле прецизно изведени, во шестата серија Рејналд Педрос промаши за Франција, односно одбрани голманот на Чешка Петр Коуба. Подоцна Мирослав Кадлец беше прецизен и ја одведе Чешка во финалето. Во финалето против Германија, Чешка прва дојде во водство со голот на Патрик Бергер во 59. минута од пенал, меѓутоа Германија со двата гола на Оливер Бирхоф, прво во 73. минута а потоа и златниот гол во петтата минута од првото продолжение дојде до победа и го освои Европското првенство. Со настапот во финалето Чешка го оствари својот најголем успех до денес во историјата на Европските првенства.
Патрик Шик најголема денешна чешка ѕвездa
Својата кариера Шик ја започнал во Спарта Прага. Минувајќи низ младинските категории на клубот, тој го оствари своето деби за првиот тим на 16 април 2014 година во натпреварот против Јаблонец во Купот на Чешка во поразот на неговиот тим со 3-1. Неколку недели подоцна тој го направи своето деби во лигата, на 3 мај 2014 година, влегувајќи во игра од клупата за резерви на местото на Јосеф Хушбауер во 84. минута во поразот со 3-1 од Теплице. На 18 ноември истата година, Шик го постигна својот прв професионален гол во кариерата во ремито 1-1 против Прибрам во Купот на Чешка. На 11 декември 2014 година првпат настапи во Лига Европа во поразот со 2-0 од швајцарскиот Јанг Бојс.
Следеше развој на кариерата во Италија, каде настапубаше за Сампдорија и Рома, а блесна и во Бундеслигата за РБ Лајпциг и Баер Леверкузен.
Шик играл за сите младински селекции на Чешка почнувајќи од онаа под 16 до под 21 година. Тој е најдобар стрелец во квалификациите за Европското првенство за играчи под 21 година 2017, постигнувајќи 10 гола во 9 натпревари помагајќи и на Чешка да се квалификува за завршниот турнир. Во јуни 2017 година, Шик бил повикан во чешката репрезентација под 21 година и за завршниот турнир во Полска.
На 27 мај 2016, го оствари своето деби за сениорската репрезентација на Чешка во пријателскиот натпревар против Малта, влегувајќи во игра во 66. минута на местото на капитенот Томаш Росицки и постигна гол во завршницата за да го постави конечниот резултат на натпреварот (6-0).
Анри се врати во репрезентацијата на Белгија
Славниот француски фудбалски репрезентативец Тиери Анри се враќа во стручниот штаб на белгиската репрезентација како еден од помошниците на селекторот Роберто Мартинез на Европското првенство, објави Белгискиот фудбалски сојуз.
Анри беше асистент на Мартинез на ЕП 2016 во Франција и на СП 2018 во Русија, на кое Белгија го освои третото емсто.
Потоа, започна со самостојна тренерска кариера, но следеа неуспешни епизоди во Монако и Монтреал и во последните неколку месеци беше без ангажман.
„Воодушевени сме што Тиери може да ни се приклучи за Европското. Неговото искуство со турнирските натпреварувања и знаењето поврзано со репрезентативниот фудбал е голема вредност за нашиот стручен штаб.“ – вели селекторот Мартинез.
Анри ќе биде на клупата на Белгија веќе наредната недела, кога репрезентацијата на Хрватска гостува во Брисел.
„Ова ќе биде продолжување на незавршената приказна и ќе направиме се таа да има успешен резултат.“ – изјави Анри.
Копа Америка остана без домаќин!
Јужноамериканската фудбалска федерација (КОНМЕБОЛ) го откажа домаќинството на Аргентина на само 13 дена пред почетокот на Копа Америка, натпреварувањето кое требаше да се одржи во таа земја.
Планот беше едно од најсилните првенства на светот да се игра во Колумбија и Аргентина од 13. јуни до 11. јули, но пред десетина дена домаќинството беше предадено само на Аргентина поради нередите во Колумбија со протестите против претседателот Иван Дуке.
Денеска пристигна информација дека ниту Аргентина, поради проблеми со коронавирусот, не може да биде домаќин, иако репрезентациите веќе наголемо се подготвуваат за натпреварувањето, како и за натпреварите од квалификациите за СП.
Копа Америка требаше да се одржи минатата година, но беше одложена поради коронавирусот. Сега, се уште не е познато што ќе се случи, со оглед на тоа дека КОНМЕБОЛ бара нов домаќин.
Балак во ноќен клуб игнорира танчарки за да го следи финалето во ЛШ! (видео)
44-годишниот Михаел Балакл во саботата со пријатели беше во ноќен клуб, каде настапуваа атрактивни танчарки.
Легендарниот фудбалер не им посвети премногу внимание, бидејќи преку мобилниот телефон го следеше преносот на финалето од Лигата на шампионите помеѓу Челзи и Манчестер Сити.
Балак играше за Челзи од 2006. до 2010. година и е нивни голем фина. Финалето не можеше да го пропушти, па го гледаше натпреварот на мобилен сместен на масата.
Додека сите останати се забавуваа гледајќи ги танчарките, легендарниот Германец не обрна многу внимание што се случува околу него, а снимката веднаш стана вирален хит на социјалните мрежи.
Репрезентацијата на Македонија ги продолжи подготовките за претстојното Европско првенство. Атмосферата во тимот е одлична, а нашите фудбалери максимално се фокусирани на најголемиот настан ова лето.
Офанзивниот играч на Македонија, Даниел Аврамовски со нетрпение го очекуваа настапот на Европското првенство.
„Македонија постигна голем успех со пласманот на Европското првенство, но не планираме да застанеме тука. Веќе имам настап на едно вакво натпреварување со младата репрезентација на Македонија, но ова е нешто сосема различно, со оглед на тоа што играме против најдобрите репрезентации и најдобрите фудбалери. Нашите очекувања се зголемија, што е нормално, со оглед на победата против Германија. Тоа е нормално, тоа е фудбалот, секој може да победи секого. Се надевам дека ќе одиграме добри натпревари, ќе ги изненадиме репрезентациите кои ни се противници на ова првенсто и ќе ја израдуваме македонската јавност. Ќе го дадеме максимумот на секој натпревар, а останатото ќе дојде само по себе. Знаеме дека публиката секогаш е наш 12 играч и затоа се надеваме дека ќе бидат во колку е можно поголем број. Сигурно ќе дадеме максимум и ќе гинеме за светиот дрес и на крајот дека ќе ги израдуваме сите.“ – вели Аврамовски.
Стефан Спировски вели дека е голема чест што е дел од оваа репрезентација.
„Ми претставува огромоно задоволство што ќе ја претставувам Македонија на едно вакво натпреварување, се радувам на предизвикот наречен Европско првенство. Веруваме во себе и подготвени сме да ја израдуваме нацијата. Тренираме напорно и максимално сме фокусирани на првиот натпревар што го играме против селекцијата на Австрија. Ни значи поддршката од медиумите и од луѓето. Во мојот клуб АЕК среќни се што првпат ќе имаат фудбалери во мене и Тричковски кои ќе ги претставуваат на големо натпреварување. Македонија ќе има многу навивачи во Кипар. Се надевам дека Македонија ќе ја претставиме во вистинско светло.“ – изјави битолчанецот.
