Фудбалскиот клуб Рома денеска соопшти дека 166 навивачи, кои присуствуваа на убедливиот пораз во Норвешка од Бодо Глимт, ќе добијат бесплатни влезници за финалниот натпревар од Лигата на конференциите против Феенорд во Тирана.

Клубот на тој начин им се заблагодарува на навивачите, кои беа во Норвешка на 21 октомври, кога Рома беше поразена со 6-1 од домашната екипа, во натпревар од Лигата на конференции од групата Ц.

Списокот на навивачи е формиран врз основа на податоците за продажба на билети, кои ги испратил норвешкиот клуб, изјавија од Рома.

Тренерот на Рома, Жозе Мурињо претходно изјави дека неговиот пораз од Бодо Глимт е еден од најлошите во европските натпреварувања.

Рома подоцна го елиминира норвешкиот тим во четвртфиналето на Конференциската лига.

Според Дејли Мејл, шампионот на Англија, Манчестер Сити планира ова лето да се засили со нов играч за врска. Според информациите Сити наредната сезона сака да ја започне со три нови засилувања.

Се очекува во екипата да пристигнат напаѓачот Ерлинг Халанд од Борусија Дортмунд, младиот Алварез веќе и официјално ќе пристигне од Ривер Плата, а како најново летно засилување се споменува и играчот од средниот ред на Барселона, Френки де Јонг.

24-годишниот фудбалер беше блиску до трансфер на „Етихад“ и во 2019 година, но тогаш тој се одлучи за премин на „Камп Ноу“.

ПСЖ наскоро ќе ја активира клазулата и ќе го официјализира откупот на Нуно Мендеш од лисабонскиот Спортинг.

Младиот Португалец оваа сезона ја помина на позајмица од Спортинг, а во неговиот договор има клазула според која може да биде откупен за 40 милиони евра.

Нуно Мендеш ќе остане во Париз и ќе потпише договор до 2026 година со што во ПСЖ си ја обезбедија левата страна во одбраната откако и Ашраф Хакими потврди дека е среќен и дека сака да остане.

Сепак, најголемото внимание во Париз е насочено кон ситуацијата со Килијан Мбапе. Во ПСЖ прават се за да го убедат да го продолжи договорот кој му завршува на крајот од сезоната, а ќе видиме дали ќе успеат.

Весникот „Сан“ пренесува дека идниот тренер на Манчестер Јунајтед ,Ерик тен Хаг, сака големата ѕвезда на екипата, Кристијано Роналдо да остане во тимот и наредната сезона.

Досега се веруваше дека Роналдо нема да е дел од проектот на Тен Хаг за иднината на Јунајтед, но според „Сан“, Холанѓанецот бил импресиониран од играта на Португалецот на натпреварот против Брентфорд и смета дека е неприфатливо клубот да загуби толку важен играч како него.

Оваа сезона Роналдо досега одигра 29 натпревари за „црвените ѓаволи“ во Премиер лигата, постигнувајќи 18 голови и три асистенции. Тој запиша и шест гола во Лигата на шампионите.

Тренерот на Барселона Чави зборуваше за претстојното продолжување на договорот со играчот од средниот ред Гави .

„Двете страни сакаат да продолжат да работат заедно, така што ова е одлична вест за навивачите на Барселона. За нас е многу важно да го задржиме Гави. Гави е дел од идниот проект на Барселона и имам одличен однос со неговиот агент. Го обновуваме договорот со него“, изјави Чави на новинарот Фабрицио Романо на Твитер.

17-годишниот Гави постигна два гола и имаше шест асистенции на 43 натпревари во сите натпреварувања. Актуелниот договор на играчот со тимот истекува на крајот на следната сезона.

Фиорентина ќе ја плати сумата од 15 милиони евра што Арсенал ја бара за продажба на Лукас Тореира ова лето.

Италијанските весници тврдат дека „Ла Виола“ сега е „блиску“ до трајно ангажирање на уругвајскиот играч од средниот ред во летниот трансфер период. Фиорентина е подготвена да плати 15 милиони евра за постојан договор ма Тореира кој оваа сезона игра за позајмица.

Во Арсенал не се подготвени да прават никакви попусти за Тореира.

Тренерот Пеп Гвардиола нема одговор дали Манчестер Сити некогаш може да ја освои Лигата на шампионите. Сити испадна од турнирот откако во полуфиналето беше елиминиран од Реал Мадрид.

 „Не знам дали Сити може да триумфира во Лигата на шампионите. Немам одговор на тоа прашање. Понекогаш ми поставуваат прашања на кои немам одговор. Фудбалот е неверојатно непредвидлив. Тоа го видовме. Можеби грешам, но имам чувство дека луѓето од Абу Даби го купија овој клуб и инвестираа толку многу пари во инфраструктурата и играчите не само за да ја освојат Лигата на шампионите, тие го направија тоа за клубот да може да го освои секој турнир. Можеби не сум доволно добар за да му помогнам на тимот да го постигне ова во Лигата на шампионите. Никој не знае што ќе се случеше доколку имаше други играчи или тренер“, изјави Гвардиола.

Турскиот гигант, Фенербахче е заинтересиран за доведување на напаѓот од Норвич, Тиму Пуки. 

32-годишниот Финец, со сигурност ќе го напушти премиерлигашот кој не успеа да избори опстанок во лигата. Според информациите од Турција, претставници на Фенербахче веќе оствариле контакт со менаџментот на играчот за кого сметаат дека ќе биде солидно засилување за нападот на екипата.

Пуки оваа сезона постигна 10 гола во Премиер лигата, но тие не беа доволни за спас на Норвич од испаѓање во Чемпионшип.

Премиерлигашот Челзи и официјално потврди дека се договорени условите за купување на клубот од страна на конзорциумот на Тод Боели.

„Фудбалскиот клуб Челзи може да потврди дека се договорени условите за продажба на клубот. Од вкупната инвестиција, 2,5 милијарди фунти ќе бидат искористени за купување акции во клубот, а средствата ќе бидат депонирани на замрзната банкарска сметка во Велика Британија, со намера 100% да се донира во добротворни цели, како што потврди Роман Абрамович. За таквиот трансфер ќе се бара одобрение од Владата на Обединетото Кралство.

Дополнително, новите сопственици ќе одвојат 1,75 милијарди фунти за дополнителна инвестиција во корист на клубот. Ова вклучува инвестиции во стадионот, академијата, женскиот тим и тековно финансирање на Фондацијата Челзи.

Се очекува продажбата да заврши до крајот на мај, по сите потребни регулаторни одобренија. Тогашќе бидат соопштени повеќе детали“, соопштуваат од Челзи.

Иднината на Роберт Левандовски е главна тема во Германија веќе неколку недели.

Левандовски влегува во последната година од договорот, силен интерес за него покажува Барселона, па се шпекулираше дека ова лето би можел да направи трансфер.

Меѓутоа, Баерн не размислува за продажба и му понуди нов договор, а тренерот Нагелсман тврди дека преговорите течат добро.

„Разговарав со раководството и ми кажаа дека преговорите течат добро. Мојата позиција е јасна и сакам Роберт да остане и да го продолжи договорот. Сите знаеме дека неговиот агент Захави е човек кој обожава да преговара, па треба да имаме малку трпение“, изјави Нагелсман.