Напаѓачот на Милан, Златан Ибрахимовиќ ќе потпише нов договор со клубот. Двете страни се согласиле да го продолжат договорот за една година, пренесуваат извори блиску до клубот.
„Росонерите“ веќе неколку недели преговараат со Швеѓанецот и конечно успеале да постигнат договор. За детали за договорот се уште се преговара.
Наскоро се очекува и официјално да биде објавено потпишувањето на нов договор со 39-годишниот фудбалер.
Раководството на Кристал Палас не планира да го продолжи договорот со тренерот Рој Хоџсон. Според изворот, раководството на клубот веќе започнало да бара нов тренер. Тренерот на Рома, Пауло Фонсека и поранешниот тренер на Челзи, Френк Лампард се сметаат за главни кандидати за менаџерската позиција во Кристал Палас. Прелиминарните преговори веќе се водат со двајцата тренери. Покрај Фонсека и Лампард, кандидати се и главниот тренер на Барнли и предводник на Свонси Сити, Стив Купер. Рој Хоџсон на 9 август ќе наполни 74 години, а самиот тренер постојано повторуваше дека размислува да стави крај на тренерската кариера. Неговиот договор со Кристал Палас завршува на крајот на оваа сезона. Хоџсон ги предводи фудбалерите на оваа екипа од 12 септември 2017 година.
Џејдон Санчо се уште се опоравува од повредата здобиена на почетокот на март и не е подготвен да се врати во тимот за овонеделните средби во Лигата на шампионите. 21-годишниот Англичанец, најверојатно ќе биде надвор од составот на „милионерите“ за првиот натпревар од четвртфиналето во Лигата на шампиони против Манчестер Сити закажано за утре. Санчо не тренираше во неделата, а денеска се очекува да замине на нови лекарски тестови. Германските медиуми велат дека Борусија (Д) нема да го форсира неговото враќање на оваа средба, туку ќе се обиде да го има максимално подготвен за реваншот на 14 април.
На денешен ден пред 10 години, Дејан Станковиќ го постигна еден од најубавите погодоци со волеј удар во Лигата на Шампионите на сите времиња.
Овој погодок сигурно сеуште го памти еден од најдобрите голмани на денешница Мануел Нојер, кој во тоа време беше чувар на мрежата на Шалке 04.
Шарл Де Кетелар од Бриж најверојатно ќе биде новото летно засилување за италијанска Аталанта. Составот од Бергамо е заинтересиран за услугите на 20-годишниот Белгиец и веќе почнал преговори со неговиот агент. Аталанта во Де Кетелар гледа како на потенцијална замена за Јосип Иличиќ, кој е близу до заминување од клубот ова лето. Според информациите, Аталанта подготвува сума од околу 16 милиони евра, на колку што во моментов е проценет младиот Белгиец. Инаку Де Кетелар потекнува од фудбалската академија на Бриж, а во тековнава сезона одигра 38 натпревари и постигна 4 гола за својот актуелен клуб.
Претседателот на Реал Мадрид Флорентино Перез, му даде подарок на тренерот Зинедин Зидан кој со победата против Еибар прослави јубилеј на клупата на „кралевите“. За францускиот стратег тоа беше 250-от натпревар. „Живеам за фудбалот и секој ден што го поминувам како тренер на Реал Мадрид. Не сакам јубилеи, бидејќи не живеам во минатото туку во сегашноста“, вели Зидан. Најмногу натпревари на клупата на„белите“ има легендарниот Мигел Муњоз (605).
Напаѓачот на Тотенхем и Англија, Хари Кејн се запиша во историјата на Премиер лигата со рекорд на постигнати голови. Кејн ги постигна двата гола за Тотенхем на нивното гостување кај Њукасл во натпреварот од 30. коло во Премиер лигата. Натпреварот заврши без победник – 2:2, а Кејн веќе има 84 голови за Тотенхем на гостински терен во Премиер лигата. Ова е рекорд за играч во дресот на тим во Премиер лигата, а мора да се потенцира дека на Кејн му беа потребни само 120 натпревари за да ја достигне оваа импресивна бројка. Тимот предводен од Жозе Мурињо е петти на табелата, со ист број на бодови како Ливерпул и Вест Хем, а „чеканите“ имаат помалку средби.
Лоши вести од Манчестер пристигнуваат за француската репрезентација, имено оваа селекција на Европското првенство би можела да биде без Ентони Марсијал. Марсијал заработил повреда минатата недела за време на мундијалските квалификации. Проценката прво била дека не станува збор за многу тешка повреда, но изгледа дека не е баш така. Вчера Солскјер изјави дека сезоната за него најверојатно е завршена, а можно е и да го пропушти Евро 2021. „Ентони има повреда на коленото. Секогаш кога има репрезентативна пауза се надевате дека сите играчи ќе ви се вратат здрави. Од Франција ни кажаа дека не е ништо сериозно, но излезе големо разочарување. Веројатно нема да сметаме на него до крајот на сезоната“, изјави Солскјер.
Жереми Бога игра фантастична сезонона во дресот на Сасуоло и го привлече вниманието на неколку италијански гиганти.
24-годишниот крилен напаѓач покажа дека е голем потенцијал и може да се развие во еден од најдобрите играчи во Серија А.
Бога пристигна во Сасусоло од Челзи, па откако „сините“ не ја искористија можноста да го вратат, сега италијанскиот клуб ги има комплетните права над играчот.
Најсилен интерес за Бога покажуваат Аталанта и Наполи, кои веќе стапиле во контакт со неговиот агент и започнале преговори.
Дефанзивецот на Интер, Милан Шкрињар е близу до трансфер во Тотенхем. Клубовите наводно се близу до зделка што би можела да се заврши во текот на летниот преоден рок.
Тотенхем сакаше да го ангажира Шкрињар и оваа зима, но Интер не беше подготвен да го продаде. Да потсетиме, претходно Интер одби да ги пушти напаѓачите Лаутаро Мартинез, Ромелу Лукаку и играчот од средниот ред Николо Барела да заминат во Барселона.
