Очекуваниот трансфер на Марк Гехи во Ливерпул драматично пропадна, иако дефанзивецот на Кристал Палас веќе го имаше поминато медицинскиот преглед и беа разменети сите неопходни документи. 

Зделката вредна 35 милиони фунти требаше да биде потврдена на последниот ден од преодниот рок, а Гехи веќе се договори со Ливерпул за петгодишен договор. Но, трансферот неочекувано беше откажан во последен момент. 

Причината? Кристал Палас не успеа навреме да обезбеди соодветна замена. 

Палас го имаше таргетирано дефанзивецот на Брајтон, Игор Хулио, како наследник на Гехи, и тој дури помина медицински преглед. Но, во неочекуван пресврт, Хулио реши да се пресели во Вест Хем, оставајќи го Палас без посакуваната алтернатива. 

Иако клубот го донесе младиот штопер Џејди Канво од Тулуз, јасно беше ставено до знаење дека се потребни двајца нови играчи за Гехи да биде пуштен. Тренерот Оливер Гласнер остана цврст во ставот дека тимот мора да ги задржи клучните фудбалери доколку сака да остане конкурентен оваа сезона. 

Поради тоа, Гехи, кој има уште само една година од договорот и веќе им соопштил на клубските челници дека нема намера да го продолжи, засега останува на Селхурст Парк. И покрај пропаднатиот трансфер, тој и понатаму останува клучна фигура во Палас, каде што носи капитенска лента и има одиграно голема улога во успесите на тимот изминативе сезони. 

Во значаен потег пред почетокот на новата фудбалска сезона, Николас Џексон се пресели на позајмица од Челси во Баерн Минхен. Договорот беше официјализиран на 2 септември 2025 година и се смета за стратешка одлука од двете страни, со цел да му се овозможи на 22-годишниот напаѓач повеќе време на теренот во една од најсилните европски лиги. 

Џексон, ветувачки сенегалски напаѓач познат по својата брзина, техника и флексибилност, минатата сезона имаше ограничена минутажа во Челси поради силната конкуренција во тимот. Баерн, од друга страна, имаше потреба од засилување во нападот по последните промени во составот, а Џексон совршено одговара на нивните барања. 

Актуелниот шампион на Бундеслигата се надева дека Џексон ќе донесе свежина и длабочина во нивниот напад, додека тие стремат кон нова титула во Германија и силен настап во Лигата на Шампионите. За Челси, позајмицата претставува можност за развој на играчот, а истовремено и за зголемување на неговата пазарна вредност. 

Сезоната штотуку започна, а фудбалската јавност ќе следи внимателно како Џексон ќе се снајде во германскиот фудбал и каков придонес ќе има во офанзивната игра на Баерн. 

Емилијано Мартинез ќе продолжи да брани за Астон Вила откако потенцијалниот трансфер во Манчестер Јунајтед пропадна. И покрај сериозниот интерес од клубот од Олд Трафорд, не беше поднесена официјална понуда, а и играчот и клубот се согласија да ја продолжат соработката во пресрет на клучна сезона која вклучува и Светско Првенство. 

Разговорите со Манчестер Јунајтед никогаш не надминаа почетна фаза. Финансиските аспекти, вклучувајќи ја платата на Мартинез и неговата возраст, беа клучни фактори зошто Јунајтед се одлучи за помлад голман пред крајот на преодниот рок. Иако Мартинез покажал желба за трансфер и ги истражувал можностите внатре во клубот, договорот не се реализираше. 

Интерес стигна и од Турција, каде Галатасарај понуди значителен износ во обид да го донесе Аргентинецот за својата кампања во Лигата на Шампиони. Сепак, Мартинез ја одби понудата, одлучувајќи да остане во конкурентната Премиер Лига со цел да остане во топ-форма пред настапите со Аргентина. 

Астон Вила, од своја страна, јасно ја потврди намерата да го задржи својот сигурен голман. Со договор што трае до 2029 година, клубот го гледа Мартинез како клучна фигура во своите амбиции за новата сезона. Одлуката да остане беше пречекана позитивно и од навивачите и од управата. 

Летото 2025 година е лето на заминување на легендите од „Етихад“. По Кевин де Брујне, Џек Грилиш, Кајл Вокер и Едерсон, сега замина и – Илкај Гундоган.

Германецот не е во плановите на Пеп Гвардиола откако пристигна Тиджани Рејндерс, а Германецот ќе добие дозвола да замине без обештетување иако договорот му беше автоматски продолжен до 2026 на почетокот на летото.

Гундоган ги постигна сите услови со Галатасарај, ќе потпише договор на две години и ќе биде уште едно големо засилување по Лирој Сане и Виктор Осимен.

Да потсетиме, Гундоган првпат пристигна во Сити летото 2016 година, токму по желба на Пеп Гвардиола од Борусија Дортмунд за 27.000.000 евра и го оправда секој цент. Освои сè што можеше да се освои, учествуваше во освојувањето на дури пет титули во Премиер лигата, беше и капитен на тимот кој ја освои Лигата на шампионите во 2023 година, по што само за една сезона замина во Барселона, па се врати минатото лето.

Во Сити пристигна ред на смена на генерации, останува да видиме дали требаше да замине и Пеп, или Каталонецот ќе успее да ја врати старата сјајност на својот обновен тим…

Во Првата женска фудбалска лига викендов на програмата беше некомплетното трето коло.

Во четири одиграни меча по две победи за гостинските и домашните екипи, а најубедлив беше составот на ЖФК Истатов со триумфот од 11-0 во соочувањето со ЖФК Вардар.

По два пати меѓу стрелците се впишаа Севим Иљаз, Кристина Петрушевска и Меланија Грозданова, а по еден погодок постигнаа Ива Здравевска, Елма Шемсовиќ, Миа Головска и Андреа Коловска.

Гостинска победа забележа ЖФК Топ Гол по триумфот над ЖФК Речица со 5-3.

ЖФК Скопје ја совлада ЖФК Тиверија Брера со 2-1 додека АС Јунајтед славеше над ЖФК Каменица Саса со 2-0.

Поради настапот во квалификациите за пласман во Лигата на шампионките, ЖФК Љуботен натпреварот против ЖФК Кочани ќе го одигра на трети септември.

Трансферот на напаѓачот Александар Исак од Њукасл во Ливерпул стана трет најскап во историјата на светскиот фудбал. Шведскиот напаѓач му се придружи на клубот од „Енфилд“ за 125 милиони фунти (145 милиони евра).

Само два трансфери досега беа поскапи: трансферите на Килијан Мбапе од Монако и Нејмар од Барселона во Пари Сен Жермен. За Французинот беа платени 180 милиони евра, а за Бразилецот 222 милиони евра.

Да потсетиме дека трансферот на Исак стана и најскапиот трансфер во историјата на англискиот фудбал. Претходниот рекорд за трансфери исто така му припаѓа на тимот на Арне Слот. Офанзивниот играч за врска Флоријан Вирц го напушти Баер Леверкузен и се пресели во Ливерпул за 125 милиони евра.

Нашата најдобра фудбалска репрезентација за краток период ќе одигра два меча. Првиот е пријателски со Саудиска Арабија на 4 септември во Прага а вториот доаѓа во Мундијалските квалификации со Лихтенштај на седми во Скопје. Стоперот, Ѓоко Зајков, очекува две победи.

„Без разлика дали е пријателски или квалификациски натпревар, мислам дека и досега покажавме карактер и секогаш треба да одиме на победа. Така градиме слика за нас како репрезентација и општо на тој начин за сите ривали повеќе да не почитуваат.

Нормално дека е главна цел натпреварот со Лихтенштајн од квалификациите. Имаме доволно денови да се подготвиме и да одиме на победа. Тоа е приоритет“, потенцираше нашиот дефанзивец.

Италијанскиот фудбалски состав, Рома, успеа да го ангажира дефанзивецот, Јан Зиелковски, објави официјалната веб-страница на калчо-лигашот.

Договорот со 20-годишниот Полјак ќе биде валиден до летото во 2030 година. Тој доаѓа од екипата на Легија.

Корпулентниот стопер во претходната сезона се појави на 28 натпревари, постигна 2 гола и имаше 2 асистенции.

Мароканскиот фудбалер Елиес Бен Сегир потпиша петгодишен договор со Баер Леверкузен до 30 јуни 2030 година.

Висината на трансферот не е официјално објавена, но извори блиски до Монако наведуваат дека изнесува 32 милиони евра, со бонус од пет милиони евра и процент од следната продажба на играчот.

20-годишниот играч од средниот ред е продукт на младинската школа на Монако. Во „малото кнежевство“ во 2023 година ја започна професионалната кариера.

Спортскиот директор на Леверкузен, Симон Ролфес, истакна дека тој е „првокласен техничар, интелигентен и имагинативен во дриблингот, со прецизно и разновидно додавање“ и додаде дека „ќе внесе дополнителна енергија во офанзивната игра“.

Тренерот на Монако, Ади Хитер, исто така го пофали младиот фудбалер, истакнувајќи дека созреал во Монако и дека го очекува успешна кариера во Германија.

Македонската А репрезентација ги започна подготовките за претстојните натпревари, контролен против Саудиска Арабија (04. септември, Прага) и Лихтенштајн (7. септември, Скопје) од квалификациите за СП 2026.

Поради повреда, Димитар Митровски нема да биде дел од септемвриските пресметки. Фудбалерот од средниот ред на Олимпија Љубљана ќе ги пропушти натпреварите поради повреда на задната ложа здобиена на загревање пред синоќешниот натпревар од словенечкото првенство. На првиот тренинг отсуствуваа Елиф Елмас и Дарко Чурлинов, двајцата утре ќе се стават на располагање на селекторот Милевски.

Бојан Миовски, кој пред само два дена го реализираше својот голем трансфер во шкотскиот гигант Глазгов Ренџерс, ги сподели своите очекувања од новата страница во клупската кариера, како и очекувањата од натпреварите до националниот тим.

„Кога дојде понудата од Ренџерс не се двоумев, тренерот ми даде дополнителна поддршка и среќен сум поради тоа. Дебитирав против Селтик, прв пат почувствував таква атмосфера, знаеме какво е ривалството меѓу двете екипи. Во Џирона не беше се сјајно, имавме лоша сезона, колективно и индивидуално. Едноставно бев во погрешно време таму и морав да донесам одлука за мојата иднина. Се вратив во шкотската лига кадешто претходно настапував во Абердин, но сега во многу поголем историски клуб“.

„Имаме позитивна форма во репрезентацијата, се надевам дека ќе го продолжиме тој добар ритам и на натпреварите кои ни следуваат. Треба добро да се подготвиме за Саудиска Арабија која е многу сериозна репрезентација, а потоа максимално да се фокусираме на Лихтенштајн. Денеска нема слаби селекции и однапред добиени натпревари“.