Френк Лампард, наскоро може да се врати во тренерската професија. 42-годишниот поранешен играч за врска, кој беше отпуштен од неговиот омилен клуб во јануари, е фаворит за наследник на Рој Хоџсон во Кристал Палас. Хоџсон повторно ја исполни својата задача и го задржа местото на Кристал Палас во елитата, но неговиот договор истекува по крајот на сезоната и според информациите во англиските медиуми, раководството верува дека е време за промена. Конечната одлука сè уште не е донесена, но „Телеграф“ вели дека Френк Лампард е прв на списокот на потенцијални заменици на Рој Хоџсон. Постојат гласини дека Лампард може да биде поканет да го води англискиот тим до 21 година, но според истиот извор, тој не е заинтересиран за оваа работа и повеќе би сакал да се врати како менаџер во Премиер лигата.

Холандската ревизорска компанија КПМГ го објави список на најскапи фудбалери во светот. Конечниот резултат е добиен од неколку фактори, кои вклучуваат нивото на играчот, неговиот статус, времетраењето на договорот и тековната форма. На прво место е напаѓачот на ПСЖ, Килијан Мбапе со цена од 189 милиони евра. Норвешкиот напаѓач на Борусија Дортмунд, Ерлинг Халанд е на втората позиција, неговата цена е 131 милиони евра. Капитенот на Тотенхем, Хари Кејн ја комплетира водечката тројка со цена од 127 милиони евра.
Најскапите фудбалери на светот според КПМГ:
1 Килијан Мбапе (ПСЖ) – 189 милиони евра;
2 Ерлинг Халанд (Борусија Дортмунд) – 131 милиони евра;
3 Хари Кејн (Тотенхем) – 127 милиони евра;
4 Маркус Рашфорд (Манчестер Јунајтед) – 121 милиони евра;
5 Рахим Стерлинг (Манчестер Сити) – 119 милиони евра;
6 Нејмар (ПСЖ) – 116 милиони евра;
7 Кевин Де Бруин (Манчестер Сити) – 113 милиони евра;
8-10. Џејдон Санчо (Борусија Дортмунд) – 110 милиони евра;
8-10. Мохамед Салах (Ливерпул) – 110 милиони евра;
8-10. Трент Александар-Арнолд (Ливерпул) – 110 милиони евра.

Европската куќа на фудбалот (УЕФА) и официјално потврди дека финалето во Лигата на шампиони ќе се игра во Порто на стадионот „Драгао“. Финалето требаше да се игра на 29-ти мај во Истанбул, а УЕФА објасни дека се преместува во Порто поради потешкотиите англиските фанови да патуваат во Турција. Се шпекулираше дека мечот може да се игра на „Вембли“ затоа што во прашање се две англиски екипи, меѓутоа британската Влада не можеше да даде гаранции за присуство на фанови. Во Порто ќе има по 6.000 фанови на Манчестер Сити и Челзи, двата англиски клуба кои ќе се борат за трофејот.

Рома е силно заинтересирана за играчот на Тотенхем, Ерик Ламела. Жозе Мурињо одлично го познава Ламела бидејќи двајцата соработуваа во Тотенхем и сака да го донесе во Рома ова лето. Аргентинецот својата фудбалска афирмација ја доживеа токму во Рома, од каде се пресели во Тотенхем. Ламела не добива голема минутажа оваа сезона и е спремен да се врати во Серија А. 28-годишниот Аргентинец на лето влегува во последната година од договорот, а Тотенхем за неговата слобода бара 15 милиони евра.

Со победата над Рапид со 2-0, Салцбург и официјално ја комплетираше новата шампионска титула во австриската Бундеслига. Пред големото дерби, тимот на Џеси Марш имаше доволно бодови да го потврди освојувањето на осмата шампионска титула по ред, но најефикасниот стрелец во лигата, Петсон Дака, не остави ништо на случајот. Ова е трета двојна круна по ред за „биковите“, и 15-та шампионска титула.

Чедомир Јаневски ќе има нова улога во неговата кариера – ќе биде дел од стручниот штаб на репрезентацијата на Јужна Африка! Во псоледната сезона македонскиот стратег оствари одлични резултати со Олимпијакос Никозија, па така го привлече вниманието. Во репрезентацијата на Јужна Африка тој ќе биде асистент на тренерот Хуго Брос. Играчката кариера Јаневски ја заврши во 1999 година во клубот Даринг Клаб Бланкенберге и таму ја започна и тренерската кариера. Во периодот од 2012 до 2013 година тој беше и селектор на македонската репрезентација.

Кристијано Роналдо го постигна стотиот погодок во дресот на Јувентус, но ова лето би можел да го промени клубот. Јувентус би можел да остане без Лига на шампиони наредната година, а тоа не ги задоволува амбициите на Роналдо. Со тоа, Јувентус тогаш не би можел да си ја дозволи платата на Роналдо во висина од 30 милиони евра. На почетокот од неделава, Роналдо со сопственикот на Јувентус, Андреа Ањели беше во посета на фабриката на Ферари. Тој се „почасти“ со автомобил вреден 1,6 милиони евра. Сопствениците на Јувентус на тој начин се обидоа да ја расположат својата најголема ѕвезда, бидејќи познато е дека Роналдо е голем љубител на скапи автомобили. Роналдо во својата гаража веќе има два скапи Бугати (Чирон и Вејрон), Мекларен Сена, Ламборџини Авентадор, Шевролет Камаро, Мерцедес АМГ ГЛЕ, Ролс Ројс Кулинан, Континентал ГТ, Ферари Ф12 ТДФ и Мерцедес Класа Г Брабус. Неговите автомобили вкупно вредат околу 18 милиони евра. Португалецот за околу 10 милиони евра купи и Бугати Чентодиечи. Такви постојат само десет во светот, а еден од сопствениците е Роналдо.

Легендата на шпанскиот фудбал, Чави Ернандес сепак нема да го наследи Роналд Куман на клупата на Барселона за новата сезона. Ова е потврдено откако легендарниот Чави ја прифати понудата од Ал Сад за нов двегодишен договор. „Заедно постигнавме многу, победуваме и даваме голови. Оваа поддршка е најдоброто што еден тренер може да посака. Не постои клаузула за предвремен раскин на договорот на сметка на Барселона. Имам двегодишен договор и го почитувам.“ – вели Чави.

Јувентус изгледа конечно пронајде клуб за Даглас Коста и тоа клубот од младоста на Бразилецот. Кога минатиот месец првпат се појави можноста Коста да се гласи во Гремио навивачите на овој клуб беа воодушевени. Потоа се огласи од клубот и соопштија дека финансиите не дозволуваат да размислуваат во тој правец. Но, изгледа дека во последните денови работите се промениле – Даглас Коста е на чекор од Гремиo! Бразилските медиуми пренесуваат дека утрово бил одржан клупски состанок во Порто Алегри на кој присуствувал и самиот Коста. На состанокот биле најважните луѓе на Гремио и менаџерот кој го застапува фудбалерот на Јувентус, Жорж Машадо.

Душан Влаховиќ оваа сезона прикажува фантастични настапи во дресот на Фиорентина. Влаховиќ оваа сезона успеа да се избори за место во стартниот тим, a својата шанса и тоа како знаеше да ја искористи. Овој 21 годишен напаѓач во досегашниот дел од сезоната одигра 37 натпревари и постигна 21 гол во сите натпреварувања со што го привлече вниманието на себе на повеќе европски клубови. Во Фиорентина се свесни дека тешко ќе го задржат Влаховиќ во своите редови и сакаат да извлечат што е можно повеќе пари за неговиот трансфер. „Газета“ денес објави дека челниците на Фиорентина одредиле цена за овој 21 годишен напаѓач и дека Влаховиќ може да го напушти клубот ако некој за него плати 80 милиони евра.