Напаѓачот на Атлетико Мадрид Луис Суарез, вчера го постигна јубилејниот 500-ти гол во кариерата. 34-годишниот напаѓач го реши мечот со Алавес и му донесе нова победа на својот тим.
Тој во кариерата имаше 198 голови за Барселона, 111 за Ајакс, 82 за Ливерпул, 63 за Уругвај, 19 за Атлетико, 15 за Гронинген, 12 за Национал.
Минатото лето Суарез се пресели во Атлетико од Барселона. Оваа сезона се појави на 18 натпревари во шпанскиот шампионат постигна 19 голови (2 од пенал) и има 2 асистенции.

Јувентус разочара уште еднаш, овој пат на свој терен беа поразени од Беневенто со 1:0, што стави точка на амбициите за освојување на титулата. Доколку вака продолжи, Јувентус не само што ќе ја загуби титулата, туку ќе го загрози и пласманот во Лига шампиони идната сезона. По крајот на натпреварот, Паратичи изјави дека Роналдо ќе остане и идната сезона, но и дека раководството и понатаму верува во својот тренер. Дебитантската сезона на Пирло е шокантна, со него паѓа и доминантната ера на Јуве во Серија А, но се продолжува и неуспешната низа во Лигата на шампионите. Паратичи изјави дека верува во Пирло, што веројатно значи и негово останување на клупата, но сепак се знае „метата“, доколку Зидан објави дека ќе го напушти Мадрид, Јувентус ќе тргне по него. Алегри исто така е без ангажман уште од отказот од Јувентус, прашање е дали би можеле повторно да го ангажираат. Покрај овие две имиња, се споменува и Симоне Инзаги. Тој е одличен во Лацио, го врати римскиот тим во Лигата на шампионите. Се чини дека е вистински момент за нареден чекор во неговата кариера.

Воочи натпреварот помеѓу Јувентус и Беневенто во рамки на 28. коло од Серија А беше приредена мала церемонија во чест на Кристијано Роналдо. Португалскиот фудбалер неодамна стигна до бројката од 770 погодоци во кариерата, со што го сруши рекордот на легендарниот бразилски фудбалер Пеле. Во таа чест, претседателот на Јувентус, Андреа Ањели му врачи посебен дрес. На грбот, заедно со бројката на погодоци пишува Г.О.А.Т, кратеница на англиски јазик за најдобар на сите времиња. Роналдо во кариерата постигна 491 погодок со десна, 143 со лева нога и 134 со глава. Два погодоци постигна со останати делови од телото.

Арсенал е последниот англиски клуб се вклучи во трката за потписот на дефанзивецот на Лајпциг, Ибрахима Конате.
За 21-годишниот Французин веќе одамна интерес покажуваат Ливерпул и Манчестер Јунајтед, но Арсенал е спремен да ја победи конкуренцијата.
Имено, англиските медиуми тврдат дека Конате ќе биде примарна трансфер цел на „топџиите“ во летниот преоден рок.
Конате во договорот со Лајпциг има откупна клаузула од 45 милиони евра, а Арсенал наводно е спремен да ја плати таа сума и веќе стапил во контакт со неговиот агент.

ПСЖ сака што побрзо да потпише нов договор со Килијан Мбапе, бидејќи напаѓачот на лето влегува во последната година од договорот.
Францускиот шампион е блиску до продолжување на соработката со Нејмар, но со Мбапе преговорите не течат така лесно. Ако потишат двајцата нови договори тоа ќе потроши поголем дел од буџетот.
Француските медиуми пренесуваат дека понудата на ПСЖ за Мбапе изнесува 30 милиони евра во сезона плус бонуси.
Мбапе одолговлекува со одлуката, но како што стојат работите поблиску е да ја прифати понудата, бидејќи ниту еден друг клуб не е во состојба да му понуди толкава плата.

Селекторот на македонската фудбалска репрезентација, Игор Ангеловски, вчера ги повика Агим Ибраими и Стефан Ашковски во составот на нашата репрезентација, за престојните квалификациските натпревари за СП 2022 против Романија (25.03), Лихтенштајн (28.03) и Германија (31.03).
Ибраими го носи дресот на албански Кукс и е најдобар стрелец во тамошната лига, додека левиот офанзивен бек Ашковски, кој досега има три настапи за националниот тим настапува за романски Ботошани.
Овие двајца ќе ги пополнат местата на Ѓоко Зајков и Тихомир Костадинов кои се позитивни на ковид-19, а отпадна Иван Тричковски кој е повреден.

Јоаким Лев на клупата на германската репрезентација ќе седи уште само неколку месеци. Овој месец беше потврдено дека Лев ќе ја напушти Германија откако ќе заврши Европското првенство ова лето. Тој имаше одлични резултати како селектор на германската репрезентација со која во 2014. година застана на светскиот трон, но после 15 години одлучи за промена и наводно сега го бира првиот тим кој ќе го предводи. Како што пренесуваат медиумите во Шпанија, Лев веќе учи шпански јазик бидејќи планира да работи во Шпанија. Претходно Лев се поврзуваше со Реал Мадрид и јавна тајна е дека сака да работи во шпанскиот шампионат. Реал се интересираше за него откако во 2014. година го освои СП, па не е исклучена можноста токму тој на крајот од сезоната да го наследи Зинедин Зидан.

Светската фудбалска федерација (ФИФА) остварува завидни финансиски резултати и покрај пандемијата на коронавирус, обелоденувајќи дека до почетокот на Мундијалот 2022 во Катар очекува во целост да го реализира планираниот четиригодишен приход од 6.44 милијарди долари. ФИФА во својот годишен финансиски извештај наведе дека вкупната потрошувачка во 2020 година изнесувала 1.04 милијарди долари. Во оваа сума се вклучени грантови во висина од 270 милиони долари наменети за националните фудбалски асоцијации, донацијата од десет милиони долари за Светската здравствена организација, како и редовниот годишен бонус од еден милион долари за претседателот на ФИФА, Џани Инфантино. Светската куќа на фудбалот посочи дека најголем дел од заштедите се благодарение на откажувањата на организацијата на младинските турнири, годишниот конгрес што требаше да се одржи во Етиопија и доделувањата на наградите на свечената церемонија во Милано. Расходите за администрацијата од 169 милиони долари биле за 42 милиони долари помалку од планираниот буџет за минатата година. Патувањата се сведени на минимум, а голем број состаноци и тренинзи се одржаа онлајн, што произведе значителна заштеда на трошоците, соопшти ФИФА.

Роналд Куман ужива голема доверба во соблекувалната, но и од новата управа предводена од Жоан Лапорта, но што ако стане реално да се врати Пеп Гвардиола? ЕСПН ги „потресе“ социјалните мрежи со информацијата дека Гвардиола не ја отфрла можноста да се врати во својата Барселона, откако Жоан Лапорта се врати на чело на клубот. Сепак, тоа е можност само доколку Гвардиола ја освои Лигата на шампионите оваа сезона, бидејќи со самото тоа, заедно со третата титула која веќе му е осигурана, ќе го заокружи својот циклус на „Етихад“. Гвардиола повеќепати повторуваше дека е среќен во Сити, дека тешко повторно ќе биде тренер на Барселона, но многумина веруваат дека тоа би можел да го промени Лапорта, кој никогаш и не криеше дека би сакал да се врати Пеп.