Брентфорд го заврши потпишувањето на двегодишниот договор со англискиот фудбалер и поранешен капитен на Ливерпул, Џордан Хендерсон, по неговото неодамнешно заминување од Ајакс, објави Би – Би Си Спорт.

35-годишниот Хендерсон, помина 12 години во Ливерпул, каде што ја освои Премиер Лигата, Лигата на шампиони, ФА Купот, два Лигашки купа, Комунити Шилд, Супер куп и Куп на светски клубови.

Во јули 2023 година, се приклучи на саудискиот клуб Ал-Етифак, управуван од поранешниот соиграч од Ливерпул, Стивен Џерард, но шест месеци подоцна неговиот договор беше поништен и се приклучи на Ајакс. Минатата недела, холандскиот клуб се согласи да го прекине договорот со Хендерсон година порано. Хендерсон доби повик за Англија во март од новиот менаџер Томас Тухел.

Ливерпул ја отфрли првата официјална понуда на Баерн Минхен за крилниот напаѓач Луис Диаз. Се верува дека понудата е вредна 58,5 милиони фунти (67,5 милиони евра) – и клубот ја одби целосно, јави „Скај Спортс њуз“ од каде тврдат дека Ливерпул му одговорил на Баерн дека Дијаз не е на продажба.

Сепак, Баерн верува дека Диаз е заинтересиран да им се придружи. Според „Скај“ во Германија, Баерн подготвува уште една понуда за Дијаз, кој останува врвен приоритет за германските шампиони.

Доколку го сторат тоа, тогаш Ливерпул треба да донесе уште една одлука – но ставот на клубот досега ова лето е недвосмислен.

Тие сметаат дека не е на продажба и не сакаат никакви понатамошни понуди. За нив Диaз останува важен играч не само за претстојната сезона, туку и за остатокот од неговиот договор, кој има уште две години до истекување.

Се смета дека клубот од „Енфилд“ им го ставил тоа јасно до знаење на сите заинтересирани клубови, што ја вклучува и Барселона ова лето.

Внатрешното сметководство на Ливерпул го проценува Диаз на повеќе од 86 милиони фунти (100 милиони евра+), но клубот не поставил продажна цена бидејќи немаат намера да го продадат.

Челниците на фудбалскиот состав Њукасл испратиле понуда од 70 милиони евра за напаѓачот на Ајнтрахт Франкфурт, Уго Екитике, објавија дел од медиумите повикувајќи се на експертот за трансфери, Фабрицио Романо.

Според него, Англичаните чекаат со надеж дека сумата што ја бараат Германците од 100 милиони драстично ќе се намали.

Во претходната сезона во Бундес-лигата, Екитике се појави на 33 натпревари со ефект од 15 голови и 8 асистенции.

Претставници на Ливерпул се сретнале со напаѓачот на Кристал Палас, Жан-Филип Матета, и неговиот агент. Според новинарот Себастијан Дени од Foot Mercato, ова се случило пред неколку дена во Париз.

28-годишниот Французин, кој во минатата сезона постигна 17 гола и направи четири асистенции за Кристал Палас на 46 натпревари во сите натпреварувања, има договор со „орлите“ до 2027 година. Се верува дека Лондонците го оценуваат на 50-60 милиони евра.

Милан, исто така, е заинтересиран за Матета, кој беше дел од Олимпискиот тим на Франција минатата година. На тој турнир, тој постигна пет гола на шест натпревари.

Во Британија се сигурни дека Ливерпул ќе доведе нов централен напаѓач, и досега многу имиња беа поврзувани со „црвените“. Најпосакуван е голгетерот на Њукасл, Александар Исак, но таков трансфер тешко може да се реализира во моментов. Југо Екитике и Виктор Осимен, исто така, се поврзуваат со англискиот шампион. Меѓутоа, пред да доведе нов голгетер, клубот треба да го продаде Дарвин Нуњес.

Ливерпул има интерес и за друг фудбалер на Кристал Палас – централниот бек Марк Геи.

Голманот на Барселона, Марк-Андре тер Штеген, не учествуваше на првата тренинг сесија на каталонците од предподготвителниот период на тимот.

Германскиот голман остана во фитнес салата, каде што изведуваше вежби одвоено од групата.

Тој го заврши сезоната 2024/25, опоравувајќи се од сериозната повреда на коленото, се врати како стартер под рамката на голот во Барселона и започна како стартер за Германија во двата натпревари од финалето на Лигата на нациите пред летниот одмор.

Тер Штеген се соочува со период на несигурност поради доаѓањето на Жоан Гарсија, додека според сите медиуми во Шпанија, Ханзи Флик му кажал дека нема да смета на него.

Манчестер Јунајтед покажува интерес за Корентен Толисо, соопшти француското издание “Екип”.

„Црвените ѓаволи“ воспоставиле контакт со претставниците на играчот од среден ред на Лион, кој веќе одби две понуди од Турција ова лето.

Лион сака да го задржи играчот и да ја гради екипата околу него во следната сезона. Од друга страна, евентуалната продажба би го олеснила финансиското потешкотии на клубот, бидејќи Толисо е највисокоплатениот фудбалер во тимот.

“Екип” тврди дека ситуацијата околу Толисо ја следи и новиот член на елитната дивизија на Саудиска Арабија Неом, како и Атлетико Мадрид. „Јорганџиите“ во лицето на светскиот шампион гледаат добра замена за Родриго де Пол, кој е пред трансфер во Интер Мајами.

Толисо е играч од младинскиот погон на Лион. Дебитираше за првиот тим на „лавчињата“ во 2013 година, а во 2017 година беше продаден на Баерн (Минхен) за тогаш рекордни 41,5 милиони евра во историјата на клубот. Во 2022 година играчот од среден ред се врати во Лион како слободен играч.

Еспањол доби нова сопственичка структура. Како што е објавено во официјалното соопштение на клубот, досегашниот мнозински сопственик, кинеската групација RASTAR, постигна договор со англиско-американскиот холдинг Velocity Sport Limited (VSL), кој е сопственик и на старо-новиот англиски премиерлигаш Барнли.

Ова не е класична продажба, туку стратешка алијанса. Со овој договор, Еспањол и Барнли стануваат дел од иста инвестициска група, со што се создава моќна фудбалска оска помеѓу Ла Лига и Премиер лигата.

Според договорот, групацијата RASTAR на кинескиот бизнисмен Чен Јаншенг ги интегрира своите акции во холдингот VSL, со што VSL ја презема контролата врз Еспањол. Главен човек на операцијата е Алан Пејс, сопственикот на Барнли, кој веќе пристигна во Барселона за да го финализира договорот.

Душан Тадиќ ќе настапува за мадридски Атлетико следната сезона, објави српски „Телеграф“. Искусниот офанзивец имаше неколку сериозни понуди, меѓу кои и финансиски многу великодушна опција од Црвена звезда, актуелниот шампион на Србија.

Сепак, одлучи да ја продолжи кариерата во значително посилна конкуренција. Тадиќ го избра Атлетико Мадрид.

Во главниот град на Шпанија патува веќе утре, а целиот трансфер треба да биде завршен до крајот на неделата. Доаѓа како слободен играч бидејќи му истече договорот со Фенербахче и се очекува дека ќе биде значаен додаток во кадарот за напад кој го води Диего Симеоне.

Во интервју за „Арена Спорт“, првиот човек на Звезда, Звездан Терзиќ, рече: “Самиот се изненади кога ја виде понудата што му ја подготвив со деталите од финансиските услови. Ни би зборувал за бројките, не е коректно, но ќе беше најплатениот играч во историјата на српскиот спорт“.

Централниот дефанзивец на калчолигашот Аталанта, Џорџо Скалвини, би можел ова лето да се пресели во Манчестер Јунајтед, објави денеска весникот „Сан“.

Претходно се појавија информации за интересот на Њукасл за 21-годишниот дефанзивец, а голем број клубови од Серија А, како и Тотенхем, исто така, се заинтересирани за трансфер на италијанскиот фудбалер.

Според најавите, трансфер цената на Скалвини ќе изнесува 50 милиони евра.

Скалвини го пропушти поголемиот дел од минатата сезона поради сериозна повреда и одигра само осум натпревари.

Договорот на италијанскиот дефанзивец со Аталанта е со важност до лето 2028 година.

Константин Чешмеџиев има нов клуб и потпиша со Радник Бијелина од Босна и Херцеговина.

Македонскиот дефанзивец кој последно настапуваше за Гостивар, сега се сели повторно на интернационален предизвик. Тој потпиша со босанскиот тим и ја задолжи опремата со број „5“.

Пред Гостивар во кариерата Чешмеџиев настапуваше за Хајер од Саудиска Арабија, Влазниа од Албанија, Септември и Славија Софија од Бугарија, Вележ од БиХ, а во мак-фудбалот настапуваше за Шкупи, Шкендија, Брера, Македонија ЃП, Љубанци и Пелистер.