Последниот натпревар од Купот на Италија, финалето меѓу Аталанта и Јувентус може да се одигра на стадионот „Олимпико“ во Рим, а не на „Сан Сиро“ во Милано, како што првично беше планирано. Финалето на Купот на Италија традиционално се одржува на Олимпискиот стадион во Рим, но оваа година УЕФА побара натпреварот да се игра на друг стадион, поради подготовките на стадионот „Олимпико“ за ЕП 2020. Сега УЕФА може да дозволи натпреварот да се одржи во главниот град на земјата, но наверојатно ќе биде одлучено да се игра оваа средба без гледачи на трибините. Италијанската фудбалска федерација ќе треба да се договори со УЕФА и да го организираат овој натпревар во Рим. Последниот натпревар од Купот на Италија кој го играат Аталанта и Јувентус ќе се одржи на 19 мај.

Хамес Родригез сака да го напушти тимот и да се врати во Мадрид, објавија неколку медиуми на Островот.
Според истите, колумбискиот фудбалер е незадоволен од временските услови во Англија и сака да се пресели во Атлетико Мадрид.
Оваа сезона, 29-годишниот Родригез одигра 16 натпревари во Премиер лигата, на кои постигна пет гола и направи три асистенции. Поранешниот играч на Реал Мадрид се пресели во Евертон пред почетокот на тековната сезона. Неговиот договор со англискиот клуб трае до летото 2022 година. Порталот Трансфермаркт го проценува играчот на 35 милиони евра.
Претходно, Хамес играше за Баерн Минхен, Реал Мадрид, Монако, Порто, аргентински Банфилд и колумбиски Енвигадо.

Матиас Погба е нов играч на словенечкиот прволигаш Табор од Сежана.
Клубот од малото место со шест илјади жители на социјалните мрежи се пофали со доведувањето на 30-годишниот напаѓач, кој е брат на фудбалерот на Манчестер Јунајтед, Пол Погба.
Матиас Погба во Словенија пристигнува како слободен играч, откако половина сезона помина во Расинг од Мурсија. Претходно, играше за неколку нисколигаши како Врексам и Кру во Англија, Пескара во Италија, Тур во Франција, Сиудад и Лорка во Шпанија.
За Мурсија не одигра ниту еден натпревари, а најмногу настапуваше во дресот на Кру, каде одигра 63 натпревари и постигна 21 погодок.
Матиас е роден во Гвинеја, а за таа репрезентација има пет настапи.

Париз Сен Жермен во првиот натпревар од осминафиналето на Лигата на шампионите ја „прегази“ Барселона со 1:4. Јунак на натпреварот е Килијан Мбапе, францускиот напаѓач кој беше незапирлив за одбраната на домашната екипа. Мбапе постигна три од четирите погодоци за францускиот шампион. Со тоа, Мбапе стана само третиот играч кој против Барселона постигнал хет-трик на Камп Ноу, по Фаустин Асприља и Андреј Шевченко. И двајцата тоа го направија во 1997. година, Асприља во дресот на Њукасл, а Шевченко за киевски Динамо. Мбапе стана и првиот фудбалер кој на стадионот на Барселона во нокаут фаза на Лигата на шампионите постигнал два или повеќе погодоци, а неговиот ПСЖ е првата екипа која славеше во на Камп Ноу во елиминационен натпревар по Баерн во 2013. година.

Ашраф Хакими би можел на лето да го напушти клубот и да се врати во Реал Мадрид. Како што пренесуваат шпанските медиуми Интер се уште не почнал да му ги плаќа ратите на Реал Мадрид за трансферот на Хакими вреден 45 милиони евра. Последниот рок кој го поставија „кралевите“ истекува на 31 март, па постои шанса доколку Интер не ја уплати првата рата да биде во голем проблем. Не само што Хакими ќе биде вратен во Мадрид по завршувањето на сезоната, туку и Интер да биде казнет од УЕФА за не завршување на своите обврски кон други клубови.

Суперталентираниот фудбалер на Работнички, Лука Станковски, од јуни кариерата ќе ја продолжи во Италија. Негов следен клуб ќе биде Монца. Раководствата на двата клуба ги договорија сите детали за трансферот што треба да се случи во летниот преоден рок. „Горди сме што може да објавиме дека еден од најталентираните македонски фудбалери Лука Станковски од јуни кариерата ќе ја продолжи во италијанскиот клуб Монца. Двата клуба ги договорија деталите за трансферот што треба да се реализира во летниот преоден рок. Можам да кажам дека имаше многу понуди за Лука Станковски, но донесовме заедничка одлука со фудбалерот и со неговите родители, Монца да биде идниот клуб, каде ќе продолжи да се развива и да се надградува. Среќни сме што Работнички успешно ја продолжува стратегијата за реализација на трансфери на млади и талентирани фудбалери во странство и горди што во еден исклучително тежок период на глобална пандемија на коронавирусот, Работнички оствари два трансфери, Давид Тошевски во Ростов и Лука Станковски во Монца“, изјави претседателот Драган Поповски. Лука Станковски до крајот на сезоната ќе го носи дресот на Работнички, а потоа ќе биде промовиран во редовите на Монца. Тој во првиот дел од сезоната постигна седум гола и беше четврти стрелец во првенството на Македонија.

Милан е силно заинтересиран за ѕвездата на Порто, Отавио. Бразилецот на крајот на сезоната ќе биде слободен агент, а веќе одби да го продолжи договорот со Порто. „Скај Италија“ пренесува дека Милан веќе стапил во конаткт со неговиот агент и испратил понуда за четиригодишен договор тежок 1,5 милиони евра по сезона. Весникот „А Бола“ тврди дека големи се шансите Отавио на лето да се пресели во Серија А, каде покрај Милан интерес за играчот покажуваат уште Рома и Јувентус.

Македонската фудбалска репрезентација на домашен терен во Скопје, против селекцијата на Словенија ќе ја одигра последната тест средба, пред почетокот на Европското првенство. „Црвено жолтите“ генералката ќе ја одиграат на 29 мај, а според сите очекувања до тогаш ќе треба да биде дозволен ограничен број на публика на стадионите за испраќање како што и доликува на репрезентацијата на ЕП. Македонија во Романија ќе се пресели на 8 јуни, а пет дена подоцна ќе го одигра дебитанскиот натпревар на континенталните собири. Прв ривал на Македонија е селекцијата на Австрија. Покрај австриската селекција противници на Македонија во групата и се репрезентациите на Украина и Холандија.

Динамо Загреб го доведе талентираниот играч на ПСВ, Џастин Де Хас. Станува збор за играч кој е капитен за тимот до 21 година на ПСВ, игра како стопер, но по потреба може да покрива и на левата бековска позиција. Договорот на Де Гас истекува ова лето и ако левоногиот стопер се докаже на „Максимир“ би можел да дојде бесплатно. Според „Трансфермарк“ неговата вредност во овој момент е 350.000 евра. Наводно Динамо се договорил во последните моменти од зимскиот преоден рок кој во Хрватска заврши вчера.