Барселона побара натпреварот од Ла Лига против Виљареал да се одржи на 20 декември, како што првично беше планирано. Претходно се очекуваше тимовите да играат на 20 декември во Соединетите Американски Држави, но тие планови пропаднаа.

Сега, Барса има понуда да одигра пријателски натпревар во Перу против локален ол-стар тим на 22 декември. Патувањето би можело да му донесе на клубот меѓу 7 и 8 милиони евра.

Сепак, за Ла Лига и Фудбалската федерација да дозволат натпреварот да се одржи на 20 декември, треба да добијат официјална понуда од перуанскиот промотер. Во исто време, времето за одмор на играчите на Барса мора да биде во согласност со минималните барања од договорот на Шпанската асоцијација на фудбалери.

Реал Мадрид продолжи со победничката серија во Примера и вечерва без многу мака ја совлада Валенсија со убедливи 4-0 на „Сантијаго Бернабеу“ во натпревар од 11. коло. Тимот на Чаби Алонсо со оваа победа ја запиша шестата во низа и потврди дека се наоѓа во врвна форма.

Килиан Мбапе повторно беше главен протагонист, откако со два гола во првото полувреме го трасираше патот до нов триумф. Французинот прво реализираше пенал во 19. минута за 1-0, а потоа со уште еден прецизен удар во 31. минута ја удвои предноста на „кралевите“. Винициус Жуниор подоцна промаши пенал, но до паузата Џуд Белингем во 44. минута погоди за убедливи 3-0.

Во второто полувреме Реал без притисок го контролираше натпреварот и не дозволи изненадување. По серијата замени и падот на интензитетот, младиот Карерас во самиот финиш го постави конечниот резултат 4-0.

Со оваа победа Реал стигна до 30 бода, второпласиран барем моментално е Виљареал со 23, а Барселона следи со 22 и меч помалку.

Поранешниот француски репрезентативец Патрик Виеира повеќе не е тренер на Џенова, објави во саботата клубот кој моментално е последен во Серија А.

Од почетокот на новата сезона, Џенова освои само три бода во три нерешени натпревари и шест порази, што е нивниот најлош почеток на сезоната.

За среќа, по девет кола во Серија А има дури четири клуба кои сè уште не знаат за победа, па работите сè уште можат да се поправат.

Виеира ја презеде Џенова во ноември 2024 година откако Алберто Џилардино беше отпуштен. Тој го презеде тимот кога беше 17-то место на табелата, а на крајот од сезоната ги доведе до 13-то место. Иако се шпекулираше дека Рома и Интер го сакаат, тој ова лето потпиша нов договор до летото 2027 година.

Виеира е легендарен француски играч од средниот ред со 107 настапи за „Триколорите“, со кои го освои светското првенство.

Тој ја заочна тренерската кариера во 2016 година, а дотогаш ги водеше младинските тимови на Манчестер Сити. Пред италијанскиот клуб ги тренираше Њујорк, Ница, Стразбур и Кристал Палас.

Фудбалерите на Реал Сосиедад го победија Атлетик Билбао со 3-2 во 11. коло од шпанската Ла Лига.

Дербиот на Баскија се играше во Сан Себастијан, на стадионот „Реале Арена“ пред околу 30.000 луѓе. Натпреварот беше интензивен, Атлетик два пати се враќаше во натпреварот, на крајот херој на Сосиедад е Горотачеги.

Во 38-та минута Браиз Мендес ја затресе мрежата на Билбао, но радоста на домашните траеше само четири минути. Горока Гурусета изедначи на 1-1.

На почетокот од вториот дел од натпреварот, веднаш по почетниот удар, Португалецот Гонзало Гуедеш, со прекрасен потег се ослободи од својот чувар и им ја врати предноста на домашните.

Сепак, половина час подоцна, откако беше поништен голот на Закаријан за 3-1, Наваро успеа да погоди за 2-2 и да внесе дополнителна драма во баскиското дерби.

Реал Сосиедад победата ја обезбеди во втората минута од судиското надополнување на времето, на асистенција на Ојарсабал, Горочатеги го постигна голот за победа од 3-2.

Сосиедад го забележа третиот триумф, со 12 бодови се наоѓа на 13. место. Атлетик го доживеа третиот пораз во последните пет натпревари, со 14 бодови на табелата се наоѓа на 10-то место.

Пол Погба нема да дебитира за Монако овој викенд, откако на тренинг доби повреда на глуждот. Французинот требаше да се врати на терен против Париз ФК во Лига 1, но извитканиот глужд ќе го задржи надвор од составот.

Иако повредата не е сериозна, клубот од Азурниот Брег одлучи да не ризикува, очекувајќи Погба да биде целосно подготвен по репрезентативната пауза.

Навивачите и стручниот штаб со нетрпение го очекуваа неговото враќање, прво по повеќе од две години отсуство од натпреварувачки фудбал поради повреди и суспензија за допинг.

Во Монако остануваат оптимисти дека 32-годишниот играч ќе биде подготвен за настап наскоро и конечно ќе го облече дресот на клубот во официјален натпревар.

Поранешниот голман на Тотенхем, Алфи Вајтмен, на 26 години објави дека се повлекува од професионалниот фудбал за да ја следи својата креативна страст, режијата и фотографијата.

Вајтмен му се приклучи на Тотенхем кога имал само 10 години и помина цели 16 сезони во клубот, вклучувајќи и период на позајмица во Шведска. Иако ретко добиваше минути во првиот тим, беше дел од составот што минатата сезона го освои трофејот во Лига Европа, со што го заокружи своето долго патување од дете маскота до професионален играч со европски медал.

Покрај фудбалот, Вајтмен отсекогаш негувал интереси во уметноста. Посетувал часови по глума, се занимавал со фотографија и водел свое инди радио шоу. Наместо во луксузен автомобил, често патувал на тренинзи со јавен превоз, симбол на неговиот посебен пристап кон животот и спортот.

Во едно искрено признание, тој откри дека уште на 17 или 18 години почнал да се преиспитува дали фудбалот навистина е неговиот повик. Таа мисла со текот на годините созреала во одлука, да го напушти спортот и целосно да се посвети на креативните уметности.

Сега е потпишан со лондонско-лосанџелеската продукциска куќа „Somesuch“ и веќе работи на неколку филмски и фотографски проекти кои ги спојуваат раскажувањето и визуелната уметност.

Приказната на Вајтмен е инспиративен пример дека и спортистите можат успешно да преминат во сосема поинакви кариери, следејќи го она што навистина ги исполнува.

Артем Довбик оваа сезона не игра на завидно ниво за Рома.

Тимот на Гасперини е водечки на табелата на Серија А, го дели првото место со Наполи по девет кола, а како што пренесуваат италијанските медиуми големиот ривал Милан го сака Украинецот во своите редови.

Имено, големото засилување на „росонерите“ Сантјаго Хименез, кој стигна за 32 милиони евра минатиот јануари од Фејенорд, досега не постигна ниту еден гол во Серија А. Тој беше стрелец во Купот на Италија и тоа е се од него, па управата на клубот реши да доведе нов напад.

Довбик минатата година дојде во Рома од Џирона за 30 милиони европски парички.

Кристал Палас може да биде принуден да игра три натпревари во само пет дена, згуснатиот распоред им создава главоболки на популарните „орли“.

Кристал Палас забележа голема победа на Енфилд, го совлада Ливерпул со 0-3 во Лига купот, но ова им донесе многу главоболки на момците на Оливер Гласник.

Натпреварите од четвртфиналето против Арсенал треба да се играат на 16. или 17. декември, но проблем е тоа што Кристал Палас на 18. октомври имаат пресметка во Конференциската лига, а на 14. декември е закажан дуелот против Манчестер Сити во Премиерлигата.

Па сега се бара компромис за Кристал Палас да не треба да игра три натпревари во пет дена.

На оваа тема денес говореше и Микел Артета, и одговараше на прашање дали можеме да дојде во ситуација кога клубовите ќе мора да се откажат од некое натпреварување поради згуснатиот распоред.

„Доколку во преден план ни е здравјето на фудбалерите и нашите навивачи, мислам дека нема да дојдеме во таква ситуација. Се надевам дека нема да дојдеме во ситуација кога ќе се откажуваме од одредено натпреварување. Но доколку ги игнорираме фудбалерите и навивачите, тогаш се е можно“.

Поранешниот стратег на Шкендија и Шкупи, Ардијан Нухиу, ја продолжува својата тренерска кариера во Албанија, каде што го презема кормилото на екипата на Тирана. Тој на клупата ќе го замени Италијанецот Роберто Бордин, кој беше отпуштен поради серијата разочарувачки резултати.

Раководството на клубот од главниот град одлучи шансата да му ја довери токму на Нухиу, кој последно работеше во косовската Дрита. Тоа беше и неговиот единствен ангажман надвор од Македонија, по епизодите и со Шкендија и Шкупи.

Тирана моментално се наоѓа во тешка ситуација на деветтото, претпоследно место на табелата, со само еден бод повеќе од Фламуртари.

УЕФА ја претстави листата на градови кои изразиле интерес да бидат домаќини на најголемиот континентален фудбалски спектак, финалето на Лигата на шампионите во 2028 и 2029 година.

Интересно е што засега само германскиот Минхен поднел апликација за организација на финалниот натпревар во 2028 година. Токму „Алијанц арената“ беше домаќин и на овогодинешното финале, кога Пари Сен Жермен триумфираше над Интер со убедливи 5:0.

Следното финале ќе се игра во Будимпешта на „Пушкаш арената“, а во 2027 година елитниот натпревар ќе се пресели во Мадрид, на стадионот „Метрополитано“, каде што своите натпревари ги игра Атлетико.

За финалето во 2029 година интерес покажале два фудбалски гиганта, Лондон со легендарниот „Вембли“ и Барселона со реконструираниот „Камп Ноу“.

Од УЕФА нагласуваат дека процесот на пријавување сè уште е отворен и дека сите потенцијални кандидати имаат рок до 10 јуни 2026 година да ја достават својата апликација.

Можеби ќе ве интересира