Екипата на Реал Мадрид забележа победа на домашен терен со 2:0 над РБ Лајпциг во рамките на второто коло од групата Ф во Лигата на шампионите.

Стрелци на головите за „кралевите“ беа Валверде и Асенсио. Остварената победа му донесе резултат за историја на тренерот Карло Анчелоти. Ова за италијанскиот стручњак беше стота победа во елитното натпреварување. Повеќе победи од него има забележано само сер Алекс Фергусон-102, што значи дека Анчелоти набрзо ќе стане нов рекордер. 

Дуелот помеѓу Арсенал и ПСВ Ајндховен во Лигата на Европа, кој требаше да се одигра утре е одложен за 20 октомври, потврди УЕФА.

Тоа предизвика и нови поместувања во распоредот на Премиер лигата, кој веќе беше нарушен поради одложувањето на колото минатата недела поради смртта на кралицата Елизабета. Премиер лигата потврди дека дербито помеѓу Арсенал и Манчестер Сити закажано за 19 октомври и официјално е одложено.

Единствениот слободен термин следниот месец е 19 октомври за кога е закажано вонредното коло во Премиер лигата, но распоредот во Октомври е пренатрупан, па овој меч може да се одигра дури на пролет.

Колумбискиот фудбалер, Хамес Родригез, ќе биде нов фудбалер на грчкиот шампион Олимпијакос.

Родригез веќе пристигнал во Грција, каде ќе следуваат лекарските прегледи за потоа да потпише и официјален договор со клубот од Пиреја, пренесува новинарот Фабрицио Романо.

Колумбиецот во Олимпијакос пристига од редовите на Ал Рајан од Саудиска Арабија, клуб за кој настапуваше минатата сезона.

Олимпијакос неодамна го ангажира и Бразилецот Марсело, кој во минатото му беше соиграч на Родригез во Реал Мадрид.

Европската куќа на фудбалот, УЕФА синоќа го одби барањето на Челзи, Манчестер Сити и Ренџерс за интонирање на британската химна пред почетокот на нивните натпревари во второто коло од Лигата на шампионите.

Разбирливо е дека британските клубови посакувале химната да се интонира во спомен на кралицата Елизабета Втора, која почина минатиот четврток.

„Нема да се свират национални химни, туку само химната на Лигата на шампионите, врз основа на одржување на доследната церемонија пред натпреварот, во тишина и без никакви славенички активности на терените во Обединетото Кралство, со што ќе покажеме почит како што направивме во четвртокот“, се наведува во соопштението на УЕФА.

Челзи утревечер ќе го пречека Салцбург, Сити ќе игра со Борусија Дортмунд, додека натпреварот помеѓу Ренџерс и Наполи е одложен за среда поради организациски проблеми поврзани со националната жалост поради смртта на кралицата.

Дефанзивецот на Ливерпул, Вирџил ван Дајк зборуваше за притисокот врз тимот по победата во натпреварот од групната фаза од Лигата на шампионите на УЕФА против Ајакс (2:1).

„Не слушајте ги луѓето однадвор, тоа е најважно. Смешно е – има многу поранешни фудбалери кои знаат низ што поминуваме, но кажуваат многу работи за да се обидат и да не повредат. Знаеме дека нашата игра минатата недела беше неприфатлива, но сега направивме чекор во вистинската насока“, изјави Ван Дајк.

Ливерпул оваа сезона освои три бода во Лигата на шампионите. „Црвените“ се на второто место на табелата во својата група. Од друга страна, Ајакс е на третото место со три бода, а во ова агрупа играат уште Наполи и Ренџерс.

Новото засилување на Манчестер Сити, Ерлинг Халанд е вториот 

најплатен играч на клубот. Тоа го пренесува „The Sun“. Според изворот, норвешкиот напаѓач добива 433.000 евра неделно или 22,5 милиони евра годишно.

Само еден играч добива повеќе од Халанд во Манчестер Сити – играчот од средниот ред Кевин Де Бруин. Според договорот потпишан во април 2021 година, Белгиецот добива 462.000 евра неделно (24 милиони евра годишно).

Во осум настапи за Манчестер Сити, 22-годишниот Халанд постигна 12 гола и имаше една асистенција. Договорот меѓу двете страни беше потпишан на пет години. Ерлинг Халанд дојде на „Етихад“ од Борусија Дортмунд.

Атлетико Мадрид и Барселона се блиску до нов договор за Антоан Гризман, објавија медиумите во Шпанија и Франција.

Се очекува клубот следното лето да плати 25 милиони евра за стекнување на правата на играчот. Францускиот крилен напаѓач е втора година на позајмица на „Ванда Метрополитано“ од Каталонците, а во договорот меѓу двете страни беше вклучена откупна клаузула вредна 40 милиони евра.

Сепак, со оваа сума не се задоволни од Атлетико Мадрид и токму поради оваа причина Гризман од почетокот на сезоната влегува во игра главно како резерва, така што условите кои автоматски би ги активирале договорите кои двете страни ги постигнале не би биле исполнети.

Младиот фудбалер на Барселона, Гави, се согласи на продолжување на договорот со каталонскиот клуб до 2026 година.

Гави на петти август наполни 18 години, а минатата сезона беше префрлен од вториот во првиот тим на Барселона.

Тој ќе може да го напушти клубот од „Камп Ноу“ пред истекот на новиот договор само во случај некој друг клуб да плати обештетување од една милијарда евра. 

Гави за Барселона одигра 53 натпревари и постигна два гола. За шпанската репрезентација има одиграно 10 натпревари на кои постигна еден гол.

Тренерот на Манчестер Сити, Пеп Гвардиола, потврди дека дефанзивецот во тимот, Џон Стоунс, се опоравил од повредата и дека ќе биде на располагање за натпреварот против Борусија Дортмунд во Лигата на шампионите.

Фудбалерите на Манчестер Сити го дочекуваат Дортмунд во рамките на второто коло од групата Г во ЛШ.

Сити во првото коло ја совлада Севиља на гостински терен со 4:0, а тој дуел поради повреда го пропушти Стоунс. 

Дел од португалските медиуми пренесуваат дека фудбалерот на Манчестер Јунајтед, Кристијано Роналдо, одбил понуда од 242 милиони евра за да потпише двегодишен договор со клубот Ал Хилал од Саудиска Арабија.

Водечките луѓе на првакот на Саудиска Арабија имале желба да го направат Португалецот убедливо најплатен фудбалер на светот и дополнително да ја засилат екипата.

Меѓутоа, Роналдо наводно ја одбил оваа висока понуда, бидејќи сакал да остане да игра високо ниво на фудбал и да настапува во тим кој настапува во Лигата на шампиони.

Се споменуваа голем број на клубови каде тој би ја продолжил својата кариера, како Атлетико Мадрид, Спортинг Лисабон, Наполи и Баерн Минхен, меѓутоа Роналдо на крајот остана во Манчестер Јунајтед.