Долгогодишниот капитен на Стоук, Рајан Шоукрос ќе го напушти клубот после 14 години и одлучи на 33 години да се пресели во МЛС лигата. Тој кариерата ќе продолжи во Интер Мајами, каде еден од сопствениците е Дејвид Бекам.
Легендарниот англиски фудбалер, неодамна за тренер на тимот го доведе неговиот некогашен соиграч од Манчестер Јунајтед, Фил Невил.
Рајан Шоукрос исто така потекнува од Олд Трафорд, но никогаш не доби шанса кај Алекс Фергусон. Одигра само два меча во Лига купот во сезоната 2006/2007, беше испраќан како позајмен играч во Антверпен и Стоук, кој го откупи во 2008. година.
Шоукрос во дресот на Стоук своевремено го стекна статусот на еден од најдобрите дефанзивци во англискиот фудбал, но за репрезентацијата заигра само еднаш. Мина вкупно 14 сезони во Стоук, од нив 10 Премиер лигата. Одигра вкупно 451 натпревар за клубот. Сепак, после скршеницата на ногата во 2019 година, последните две сезони малку играше.

Лидс на отворањето на ова коло во Премиерилигата загуби кај Вулверхемптон со 1:0, но мора да се признае дека тимот на Марсело Биелса е освежување во англискиот фудбал.
„Ел Локо“ е познат како ексцентрик, ова е инаку негов рекорд во клупскиот фудбал. Аргентинецот е во Лидс веќе две и пол години, што е подолг период отколку во неговите претходни клубови. Единствено подолг период има поминато на клупата на Аргентина и Чиле.
На крајот од оваа сезона му завршува договорот, а засега нема потврда за негово продолжување.
„Ако остане, ќе бидеме пресреќни да продолжиме. Ако групата е среќна со него, и јас сум среќен. Се е оставено на него. Ја чекаме неговата одлука, но во секој случај анализираме опции и што би правеле доколку Марсело не сака да продолжи со нас. Се надеваме дека ќе остане, но го подготвуваме клубот за секој случај. Мислам дека нема завршено тука. Мора да остане да ги види навивачите во Премиерлигата. Тоа е она што тој го заслужува како менаџер.“ – изјави сопственикот на Лидс.

Moизе Кин е одличен во ПСЖ, но клубот од Париз нема лесно да го добие неговиот потпис. Кин е на позајмица во ПСЖ од Евертон кој според информациите го проценил на неверојатни 80 милиони евра. Италијанецот скоро не покажа на „Гудисон Парк“, меѓутоа на позајмицата во ПСЖ игра одлично и постигна 14 голови на 25 натпревари, а беше стрелец и во вторникот против Барселона во осминафиналето од Лигата на шампионите. Евертон сега има намера неговите добри настапи солидно да ги наплати.

Колумбиецот Себастијан Херера би можел да биде изненадувањето на списокот на македонската фудбалска репрезентација за циклусот во март кога се играат мундијалските квалификации. Херера во Македонија пристигна во 2015 година, а после пет години лани направи трансфер во унгарски МТК каде што игра заедно напаѓачот на младинската репрезентација на Македонија Бојан Миовски. Колумбиецот веќе има македонско државјанство, а го исолнува и условот со пет години настап во Македонија за да може да игра за националниот тим. Поради новото правило на ФИФА клубовите да можат да им забранат на фудбалерите да патуваат за репрезентацијата поради ковид ситуацијата не се знае дали Ангеловски ќе може да смета на сите фудбалери. Херера затоа би можел да биде решение за левата бековска позиција. „Имам македонско државајнство, го добив неодамна и сега не постои пречка да играм за националниот тим на Македонија. Не сакам многу да зборувам предвреме, но мислам дека може да бидам викнат за натпреварите во март. Јас навистина посакувам такво нешто, ако треба и со една нога би стигнал до Скопје“, изјави Херера.

Манчестер Јунајтед е заинтересиран за португалскиот напаѓач на Ајнтрахт, Андре Силва. Англискиот фудбалски клуб е во потрага по централен напаѓач а актуелниот договор на Португалецот истекува во 2023 година. Силва во тековнава сезона има одиграно 22 меча за Ајнтрахт на кои постигна 19 погодоци. Фудбалерот за Португалија има одиграно 37 натпревари и постигнато 16 голови. Тој беше дел и од Светското првенство во Русија во 2018 година.

Тренерот на фудбалерите на Милан, Стефано Пиоли, изјави дека играчот за врска, Исмаел Бенасер се повредил на првиот натпревар од шеснаесеттина финалето во Лига Европа против Црвена Ѕвезда (2-2). Тоа ќе го спречи да учествува на дербито со Интер од 23. коло во Серија А. „Го изгубивме Исмаил, тој има проблеми со мускулите“, потенцираше кратко Пиоли. Бенасер во сезонава запиша 20 натпревари за Милан и направи 4 асистенции. Градското дерби меѓу Милан и „нероаѕурите“ се игра денес од 15.00 часот.

Драган Стојковиќ ќе биде новиот селектор на Србија. Пикси доби документи од Кина со кои се потврдува дека договорот со Гвангжу ќе биде раскинат. Тој ќе биде селектор на Србија во следните два циклуса, во борбата за пласман на Светското првенство во Катар и за следното Европско првенство. Проблемот со неговото именување за селектор на Србија беше во тоа што поранешниот ас на Црвена звезда имаше активен договор со Гвангжу, кој доби голема компензација за раскинување на договорот. Некои пишуваат дека сумата е близу четири милиони евра.

По минатосезонското срамно испаѓање од ЛШ за Барселона (пораз од Баерн Минхен со 8-2), во вторникот Каталонците во својот фудбалски храм доживеаја тежок удар од ПСЖ, 4-1.
И додека се чини дека актуелниот тренер на Барса, Холанѓанецот Роналд Куман се уште ги бара тактичките решенија и не успева да ја „разбуди“ екипата предводена од Лео Меси, шпанските медиуми наголемо пишуваат за Чави Ернандез кој е кормилар на катарскиот клуб Ал Сад. Иако јасно е дека катарската лига не може да се спореди со Ла Лига, сепак шпанските медиуми се погласно шпекулираат дека Чави ќе е наследникот на Куман на жешкото столче на „Ноу Камп“.

„Лисиците“ и оваа сезона играат фантастичен фудбал во Премиерлигата. Тимот на Роџерс е рамноправен во борбата за топ 4, по 24 одиграни кола се наоѓа на третото место со ист број на бодови како и Манчестер Јунајтед (46). Некогашниот шампион прави одлични потези и во трансфер периодите, а сега е ред за уште еден. Новинарот Фабрицио Романо пишува дека Лестер е на прагот на договор со Бубакар Сумаре, фудбалерот на Лил кој со францускиот клуб има договор до 2022. година. Лил, кој во моментот е лидер во француската лига, во јануари веќе го одбија интересот на Манчестер Јунајтед и Њукасл за нивниот фудбалер, а наводно Њукасл понудил сума од 32 милиони фунти. Раководството на Лил најверојатно ќе мора да го продаде одличниот играч за врска, доколку Сумаре не потпише нов договор наскоро.

Нема сомнежи дека Равел Морисон можеше да постигне многу повеќе во својата фудбалска кариера. Англискиот играч за врска беше дел од фудбалската школа на Манчестер Јунајтед, во генерацијата со Пол Погба. Сер Алекс Фергусон во неколку наврати изјавуваше дека Равел е најголемиот талент кој имал прилика да го тренира, но „лудата“ глава на Морисон имаше други планови. Познат по своето непочитување на клупските правила и дисциплината, Морисон никаде не се задржа подолго. После Манчестер, промени уште 11 клубови, а сега има прилика за соработка со Хадерсфилд. Некогашниот премиерлигаш не стои баш најдобро во Чемпионшип, се наоѓа на пет бода од опасната зона. Морисон веќе некое време тренира со нив, а тренерот Корберан не ја отфрла можноста да го регистрираат до крајот на сезоната. Равел е слободен играч откако ја раскина соработката со холандски АДО Ден Хах во јануари.