Новото засилување на Пари Сент Жермен, Серхио Рамос успеал да го навлече гневот на сите во клубот со своето арогантно однесување, пренесува „Кадена Сер“.

Рамос, кој се пресели во ПСЖ како слободен играч од Реал Мадрид успеал многу брзо да го навлече гневот од соиграчите и вработените во клубот.

35-годишниот дефанзивец се однесувал надмено, арогантно, што предизвикало незадоволство кај останатите.

„Кадена Сер“ открива дека Рамос може и да не добие место во стартниот состав ако не го промени однесувањето.

Аргентинскиот фудбалски репрезентативец, Лео Меси, кој во текот на летово ја напушти Барселона, верува дека ќе му помогне на ПСЖ да ја оствари главната цел во новата сезона.

Французите не кријат дека го направија така наречениот „дрим-тим“ само за да дојдат до пехарот во Лигата на шампионите.

„Го имам истиот сон и желба да освојам уште една титула во Лига на шампиони. Се надевам дека можеме да ја постигнеме таа цел. Тоа би значело многу за клубот, за мене и за навивачите“, вели Меси.

Андреа Пирло не се прослави во својата прва задача како тренер и тоа во Јувентус, клубот во кој мина убави години како играч.

Пирло ненадејно доби шанса да биде предводник на првиот тим, предизвик кој го прифати, меѓутоа резултатите, играта на „бјанконерите“ не беа на посакувано ниво и најдобар доказ за тоа е што клубот едвај успеа да заврши во Топ 4 и да обезбеди место во ЛШ, додека пак во елитното натпреварување беше елиминиран од Порто во осминафиналето.

Поради сето ова тој заработи отказ од „бјанконерите“, ама без разлика на се тој нема намера во иднина да ја менува својата тренерска филозофија.

„Нема да ja променам затоа што само некои од резултатите не беа добри. Се уште мислам така за играта – да играм од позади, да се задржи топката и веднаш да се освои истата кога е потребно. Многу зависи од играчите што ви се достапни и од тоа што тие ви овозможуваат да го направите. Играчите се многу поважни од тренерите. Тренерите треба да се прилагодат“, заврши Пирло.

Милан е пред комплетирање на трансферот на Тиму Бакајоко.

Бакајоко пред две години играше на „Сан Сиро“ на позајмица, но тогаш „росонерите“ не го откупија, а минатата сезона ја помина во Наполи. Милан е во потрага по играч со неговите карактеристики да биде алтернатива за Кеси, па веќе постигнал договор со Челзи.

Французинот повторно ќе пристигне на едногодишна позајмица со право на откуп, но овој пат за многу помала сума.

„Скај Италија“ пренесува дека во следните денови Бакајоко ќе пристигне во Милано на лекарски прегледи.

Барселона ќе му даде уште една шанса на Филипе Кутињо да се докаже на Камп Ноу, на Бразилецот дури му е понуден и дресот со број 10, кој 13 години му припаѓаше на Лео Меси.

Барселона со месеци се обидува да најде купец за Филипе Кутињо, последните имформации говореа за трампа со Пјер Емерик Обамејанг од Арсенал, но по се изгледа нема да испадне ништо од ова.

Марка и Мундо Депортиво пренесуваат дека Каталонците ќе му дадат уште една шанса на Бразилецот да се докаже на Камп Ноу, Роналд Куман дал зелено светло за плејмејкерот да се врати во тимот.

Барса дури и му го понудила дресот со број 10, кој има посебна тежина поради фактот дека 13 години му припаѓаше на Лео Меси.

Напаѓачот на Тотенхем, Хари Кејн ги продолжи тренинзите со тимот. Кејн тренираше со своите соиграчи за прв пат во новата сезона.

Претходно беше објавено дека на стартот на подготовките, фудбалерот не се вратил во базата на тимот и пропуштил неколку тренинзи. На 12 август беше објавено дека Манчестер Сити му понудил на Тотенхем 150 милиони евра за Кејн.

На 15 август, 28-годишниот Англичанец не беше вклучен во составот на тимот за натпреварот против Манчестер сити во првото коло од англиското првенство.

Тотенхем и без својот најдобар играч и досегашен капитен, го победи шампионот Манчестер сити со 1-0.